Yesaia 63 - ICIGHAN BIBILO

¹ Ka an or nan lu duen ken Edom, a akondo a nyian bong ken Bosera, nan civir ashe sha akondo a nan lu a mi iyol la, nan zenden ken tahav mbu nan mbu vesen laa? Ka Mo u M er kwagh u perapera man M lu a agee a yiman ne.

² Ka nyi akondo a ou a nyian, man uriga ou kpaa ve lu er or u shoghol atam a wain shin ihungwa nahana?

³ M shoghol atam a wain shin ihungwa Mo mtswen, akuraior kpaa, ma or môm lu a Mo imôngo ga; een, M shoghol ve angahar sha ishima i vihin Yam, M dyendegh ve sha iyugh Yam; awambe a uma ve gema haam sha akondo, zure kôrom sha akondo cii.

⁴ Gadia iyange i iyevoron lum ken ishima, man inyom i myom Wam kpaa i va.

⁵ M yenge, kpa ma or u wasen lu ga; kpiligh Mo iyol, kpa ma or u wan uwegh lu ga; tsô uwegh Agh wasem, iyugh Yam kpaa suwem.

⁶ M ndyar akuraior sha ishimavihin Yam, M na, ve hunde sha iyugh Yam, man M haa awambe a uma ve inya.

⁷ Me ter uerdoo mba TER, aeren a TER a a kom iwuese la, akaa a TER A er se cii yô, man mdoom ma vesen ma sha ya u Iserael ma A er ve sha mhôônom Nam ma zungwen man sha mngee u uerdoo Nav.

⁸ A kaa er: Ve, ka ior Av je, ka ônov mba vea er sha icugh ga; man A hingir Oryiman ve kpaa.

⁹ Sha ican ve i yan la cii, Un kpaa lu yan ican, man Ortyom u sha ishigh Nagh la kpaa yima ve; sha dooshima Na man mhôônom Nam ma kôron A paa ve, A tôô ve, A yese ve sha ayange a tsuaa la cii.

¹⁰ Kpa ve je, ve gema ve hendan a Na, ve vihi Icighan Jijingi Na ishima; Nahan A gema a hingir er ka orihom ve nahan, A nôngo ityav a ve iyol Na kpaa.

¹¹ Kpa A umbur ayange a tsuaa la, man Mose kua ior Nav kpaa. Wen u A dugh orkuran u ikumuile Na shin zegemnger la, ngu hana? Wen u A ver Icighan Jijingi Na hen atô ve la, ngu hana?

¹² Wen u lu na uwegh Nagh ku icivirigh ku zan a uwegh ku yanegh ku Mose imôngo man A pav mngerem sha ishigh vegh, sha u Una er iti Na i̱ tsôr sha won;

¹³ Wen u A per a ve shin aiv a zegemnger laa? Er nyinya ken desereti nahan, kape ve nôngo gbev ga la.

¹⁴ Er ilev ka mbi ndôôr senen shin pev nahan, kape Jijingi u TER na ve u ve mem la; kape U hemen ior Ou, sha u nan iti You i̱ hingir i icivirigh la.

¹⁵ Hen ijiir You i teman i tseghan kua i icivirigh la, shir ashe shin, nenge. Gbashima Wou kua aeren a Ou a utaha nga hana? Mhôônom Ou ma kôron tsung ma ken ishima kua mhôônom Ou ma zungwen la kera ma a mo ga.

¹⁶ Gadia We U ngu Ter wase je, shin er Aberaham a kera fe se ga, man Iserael kpaa a kera rumun se ga; kpa We TER, U ngu Ter wase, man Orpaan wase, ka iti You ngise je la.

¹⁷ TERE, ka nyi U de Wer, se̱ undu igbenda You, shi U cighir se asema kpaa Wer, se̱ de cie U ga nahana? Hide sha ci u mbayev Ou, ikwe i dyako Wou la.

¹⁸ Ka ayange kpuaa tsô, uicighanmbaiorov Ou ve lu a mi ye; mbaihomov asev shoghol angahar sha icighanjiir Wou.

¹⁹ Se hingir we ior mba ve lu a lu sha ikev You mayange ga nahan; beer er ka ior mba i lu a yila ve sha iti You je ga yô.