Yesaia 62 - ICIGHAN BIBILO

¹ Sha ci u Shion yô, Me huan ving ga, man sha ci u Yerusalem kpaa Me mem ga, saa perapera na una mondo er iwanger nahan, myom na kpaa er imenger i yeghen yô.

² Akuraior aa nenge perapera wou, utor cii kpaa vea nenge icivir you; man á yila u sha iti i he, i zwa u TER ua ii yô.

³ Wea lu tsar u tor u engem ken uwegh ku TER, man idyer i tor ken uwegh ku Aôndo wou.

⁴ Á kera yila u er, Uitekera ga, á kera yila tar wou er Ice kpaa ga, kpa á yila u er, Hepeshiba (doom a na) man tar wou kpaa er, Bula (kwase u ngohol); gadia doo TER a we, tar wou kpaa ua hingir er kwasengohol nahan.

⁵ Gadia er wanyekwaor ka nan er iniunkwase nahan, kape ônov ou vea ngohol we la, man er orkwasehe ka nan ember kwasehe nahan, kape Aôndo wou kpaa Una ember we la.

⁶ M ver mbakuran sha ugir ou, we Yerusalem, mayange vea huan ving ga, tugh kua tetan kpaa; ne mba ne lu mbaumbur TER akaa, de memen nen ga,

⁷ man de deen nen Un kpaa ga, zan zan tsô Una taver Yerusalem man Una gema un á hingir kwagh u iwuese sha won.

⁸ TER bum uwegh Nagh ku yanegh man uwegh Nagh ku ageegh, er: Mayange Me kera na alakema wou a̱ hingir kwaghyan u mbaihomov ou ga; ior mba iniongo igen kpaa vea kera ma zar u atam a wain a ou, a u er tom u ican sha mi la, ga;

⁹ kpa mba ve kur a mi la, vea ya un man vea wuese TER; man ve mba ve kohol un kpaa, ka ve, vea ma un ken ityembe i icighanjiir Wam ye.

¹⁰ Nyôr nen, nyôr nen sha ihindagar, sôr nen ior gbenda, haa nen inya guree, haa nen inya sha igbudu guree, kohol awen kera, kende tuta sha sha ior!

¹¹ Nenge, TER yôô zan zan ar ken ikighir i tar je, er: Kaa wankwase u Shion wer: Nenge, myom wou ngu van; nenge, injar Na ngi a Na, man iyevoron Na kpaa ngi zan Un sha hemen.

¹² Á yila ve er, uicighanmbaiorov, Mbaipaave mba TER; man á yila u kpaa er, Asarior man Gar u i te un kera ga yô.