Yesaia 61 - ICIGHAN BIBILO

¹ Jijingi u Ter AÔNDO ngu sha a Mo, sha ci u TER shighem mkurem; A verem er M̱ sur mba asema a vihi ve la asema, M̱ yôô i̱ pase mbakwarev man i̱ bugh gaadi u mba i hee ve ahye la.

² Shi M̱ yôô inyom i erdoo u TER, man iyange i iyevoron i Aôndo wase; man mba ve zungu cii, M̱ sur ve asema.

³ Shi M̱ ver mba ve zungu ken Shion la, tsar u hweegh sha ityough ki mtwe, mkurem ma msaanyol sha ityough ki mzungu; ikondo i cirin i iwuese sha ityough ki ishima i zunguluu; sha u á yila ve er, ikon i ouki i perapera, ka mmôôr u TER, sha er i̱ civir Un yô.

⁴ Vea maa ayou a i vihi a ngise hingir atse la, vea hide á kor ajiir a ngise i yôhôl a la, vea sôr agar a i yôhôl a, a a lu atse ikov kar imôngo la.

⁵ Ior mba ken iniongo igen vea tile, vea kura akumauile a en, akur agen aa hingir mbashilen ne man mbaeren ne tom u ikon i wain.

⁶ Kpa ne yô, á yila ne er upristi mba TER; á yila ne er, mbatomov mba Aôndo wase, nea ya akaa a injaa a akuraior, man nea ta ihagh sha icivir ve la kpaa.

⁷ Sha ityough ki kunya u ne ye yô, á kimbi ne kwa har; sha ityough ki iheen kpaa vea ember kwar ve; nahan vea ya dyako ken tar ve kwa har vea ember iember i tsôron je.

⁸ Gadia Mo TER, ijirôron i mimi doom, kpa M kôr mngohol u i ngohol ior akaa sha apera la ihom kua ifer kpaa; Me na ve injar sha shighe vough, Me ya ikur i tsôron a ve.

⁹ Vor ve kpaa á fa u ken akuraior, man tsombor ve kpaa ken ior kpishi; mba vea nenge a ve cii, vea pase er, mban ka vor u Aôndo A ver u doo doo yô.

¹⁰ M ember tsung ken TER, uma wam kpaa ember ken Aôndo wam; gadia A haam akondo a myom iyol, A cirim riga u perapera, er orkwasehe ka nan kange tsar u hweegh sha ityou er pristi nahan, man er kwasehe kpaa ka nan er hwe iyol sha asa a nan nahan.

¹¹ Gadia er inya ka i due a akaa a menden a i man er sule kpaa ka u na akaa a i lee ken u a mende nahan, kape Ter AÔNDO Una na perapera man iwuese vea due sha ishigh ki akuraior cii la.