Yesaia 57 - ICIGHAN BIBILO

¹ Orperapera ka nan saa kera, kpa ma or nan wa iko her ga; mba tôôn mba ve we Aôndo iko mbala kera, kpa ma or nan kera hen ken ishima i nan er i lu sha ci u palegh kwaghbo man i tee orperapera kera nahan ga;

² nan kar nan nyôr ken bem; mba memen sha ugambe vev, hanmô u nan lu zenden jighilaa yô.

³ Kpa ne yô, kporom nen heen, ne ônov mba kwase u eren ahir, vor u idyaor man u agbaga.

⁴ Ka an ne neen iyar sha nanaa? Man ka an ne aver zwa, ne dughun nombor sha nanaa? Ka ne ônov mba peren atindi, vor u aiegh ne gaa?

⁵ Ne mba asaren a iyolough a mgbegh ne hen ikon i terebin, shin itine i hanma kon u ndor yô; ne mba ne woo mbayev shin pev, shin ikwe i avande kpaa.

⁶ Ci wou ngu hen awen a kôngor a shin pev, ka a je alu kwar wou je ye, ka a je u hee a nagh ku man shi u ve a a nagh ku sha samuyia kpaa ye. Nahan Me rumun akaa angana?

⁷ U tar gambe wou sha uwo u taven u kenden sha; ka shaala je, u undu u za ne nagh ku sôngon ye.

⁸ Ken ijime i ihinda man ikpandeihinda u ver ikav i umbur we a mi; gadia er u undum kera u bugh gambe wou, u unde sha mi, u gbanger un kpaa, u ôr injar a mba gambe ve a doo u ishima la, u nenge a idyelegh ve kpaa.

⁹ U za hen Moleki kpaa a mkurem ma ishin, man shi u seer mkurem ou ma human doon ma ngee, u tindi mbatyomov ou ken ca, ve yem shin, ve za ar shin Sheol je.

¹⁰ U vôr a zende wou u caa la; nahan kpaa mayange u shi kaa wer, ka iyolnyoon gbilin ga; hide shi taver we iyol, ka nahan man iyol i kera kpe u ga ye.

¹¹ Ka an je nan cier we iyol, u cie nan je u nyer eren aie; Mo kpaa, u kera umbur Mo ga, u kera wa iko her kpaa ga. Ka er M huan ving ica i gbe man u kera ciem ga yee?

¹² Me pase perapera wou kua aeren a ou kpaa, aa kera lu u a inja ga.

¹³ Zum u u vaa yô, mba u kohol ve la, ve̱ yima u ase; kpa ahumbe aa kura ve kera, iôôn ia kar a mi kera cii; kpa u nan suur sha a Mo yô, nana ya dyako u tar la, shi nana ya dyako u icighanwo Wam kpaa.

¹⁴ A kaa er: Haa nen inya guree, haa nen inya guree, sôr nen gbenda, tôô nen ityôkwagh i nan gbev mbu nôngon sha gbenda u ior Av kera.

¹⁵ Gadia u A lu Sha, u A hemba Sha, Un u A tem sha ajiir a tsôron gbem, Un u iti Na i lu Icighanti je yô, ngu kaan nahan er: M tem sha ijiir i Sha i i tsegh i yô, shi M tem hen un u a lu a jijingi u vaan afanyô man u hiden a iyol ijime, man Me nder ishima i mbavaanafanyô la.

¹⁶ Gadia Me kera zôhô zan zan ga, man shi Me kera yuwe gbem kpaa, ga; gayô jijingi una ule sha ishigh Yagh, kua uuma mba M er la.

¹⁷ Ka sha ci u ifer i hua na, M yuwe, M gbidye un, M yer ishigh Yagh kera sha ishima i vihin ye; nahan kpaa a hulugh a gba zan gbenda u sha ishima na tsô.

¹⁸ M nenge igbenda na, Me sôr un una wanger; Me hemen un kpaa; Me shi Me sur un ishima, ka mbanav mba ve zungu je la.

¹⁹ M gba atam a ityumbuzwaagh; bem, bem sha ci u u nan lu ca la kua sha ci u u nan lu ikua ikua la kpaa, kape TER A kaa la; Me sôr nan nana wanger.

²⁰ Kpa aferaior nga er zegemnger u kpianger nahan; gadia fetyô u teman gil gil ga; man mngerem nam ma saar angbiôr kua ihôghonov duen a mi sha.

²¹ Ma bem kera ngu sha ci u aferaior ga, kape Aôndo wam A kaa la.