Yesaia 54 - ICIGHAN BIBILO

¹ Wa atsam, we ikômkwase u u mar ga ne, hii ember sha atsam; genger imo, we u u toghor mar ga ne; gadia ônov mba kwase u a lu tseeneke la, hemba ngeen a mba kwase u lun a nom, kape TER A kaa la.

² Ver ian i tenti wou i̱ gbangese; i̱ naregh akondo a yisan a utenti ou mba u tem ker la; de yangen ga, seer ikor you i̱ lihe, taver amande a ou.

³ Gadia ú samber ken iyan kua ken imese kpaa; ka vor wou je ua tema tor sha akuraior ye, agar a i hembe a kera kpaa, ú na ior vea tema ker.

⁴ De cie ga, gadia ú ya kunya ga; i̱ de kondon we iyol kpaa ga, gadia ú va ahenge ga; gadia kunya u iyev ou ua hungul we, iheen you i sha mlu u kwasecôghol la kpaa, ú kera umbur i ga.

⁵ Gadia u A gbe u la, ka nomu je la, iti Na er, TER u akum a Sha je; man Icighan u Iserael ka Orpaan wou; á yila Un er Aôndo u sha won cii.

⁶ Gadia TER yila u er kwase u i gbihi nan kera man ishima i vihi nan ken vanger yô, man er kwase u i er nan iyev man i hir i vende nan yô, kape Aôndo wou A kaa la.

⁷ M gbihi u kera sha anshighe kpeghee tsô, kpa Me hide a we sha mhôônom ma zungwen ma vesen.

⁸ Ka sha ishima i nyoon M yer u ishigh Yagh sha anshighe kpeghee ye; kpa M zungwe u mhôônom sha erdoo u tsôron, kape TER Orpaan wou A kaa la.

⁹ Gadia kwagh ne ngum er sha ayange a Noa la nahan; er M bum Mer, mngerem ma deemee ma Noa maa kera cir tar mayange ga nahan kape M bum Mer Me kera yuwe ga je la, mzehe kpaa Me zôhô a we ga.

¹⁰ Shin iwo ia kar kera, man agungu kpaa aa kpegher nahan kpaa erdoo Wam a we yô, una kar hen a we kera ga; ikuryan Yam i bem kpaa ia kpegher ga, kape TER u A zungu u mhôônom, A kaa la.

¹¹ We u ican i tser u, man ijeverahumbe kpaa a te sha a we, u lu a ishima i surun ga ne, yô, nenge, Mo Me maa awen a ou sha inya i engem, Me tim imagh you sha usafir.

¹² Me er ityouv mbi ayoughouv ou sha urubi, ihindagar you kpaa sha ukarbunkel, man gilgar wou cii kpaa á lu sha awen a injaa.

¹³ Ônov ou ci ca kpaa vea lu mba TER A tese ve yô; mkpeyol u ônov ou kpaa una vese je.

¹⁴ Ka sha perapera ú tile taveraa ye; fa er u gbe ica a mkighir u sha ican yô, gadia gba u ú cia ga; man u gbe ica a kwagh u tan mciem iyol kpaa, gadia una sosom a we ga.

¹⁵ Aluer ior mba kpoghol num kpaa, ka Mo M ne zwa ga, hanmôv mba vea kohol vea mough num a we yô, vea ta sha a we vea kar á za gba.

¹⁶ Nenge, ka Mo je M gbe orvareniwa u suwen akpa a iwaagh sha akausu man nan var ityumugh ki tswamegh sha mfetom u nan la; man ka Mo kpaa M gbe ortiminakaa sha u nana tim akaa ye.

¹⁷ Hanma ityumugh ki i var sha ci u vihin we iyol, ikôl ia lagh ki ga; hanma zwa u ua mough ua hendan a we sha ijir kpaa, ú hemba u. Kwagh ne ka dyako u mbayev mba TER kua perapera ve u a dugh her a Mo je ne, kape TER A kaa la.