Yesaia 53 - ICIGHAN BIBILO

¹ Ka an je nan ne kwagh u i pase se la jighjighii? Man i pase uwegh ku TER hen ana?

² Gadia A vese sha ishigh Nagh er zamkon nahan, man er mise u shin inya i ombor yô, lu a ma mkomashe, shin icivir i sé kenger Un ga, lu a ma dooashe u Una sar se kpaa ga.

³ I laha Un, ior kpaa ta Un kera; lu or u yan ican, hool Un a angev kpaa, A lu er or u ior ve gem ishiv vev hen nan kera yô; i laha Un man se kpaa se wa Un iko ga.

⁴ Mimi je, ka angev asev je A tee sha iyol Na ye, atsan ase kpaa A tôô a; kpa se yô, lu se er kwagh tser Un a tser je yô, man er Aôndo kpaa tsaha Un, shi A kighir Un a ican kpaa yô.

⁵ Kpa i kuma Un sha ci u akaabo ase, i vihi Un iyol sha ci u aferakaa a ase; mtsaha u van se a bem la, gema lu sha a Na; ka sha igbidiv Nav man i wanger se ye.

⁶ Se cii se tsume er iyôngo nahan, hanmô wase hulugh sha u zan sha gbenda u nan, kpa TER gema na ibo yase cii i shile sha a Na.

⁷ I er Un ican je, nahan kpaa A rumun er i̱ hee Un, zwa tsô kpaa A bugh ga; er waniyôngo u i ze a mi sha u za sôngon yô, man er iyôngo ka i lu ving sha ishigh ki mbatôndon i aive nahan, kape A bugh zwa Na ga la.

⁸ I tôô Un ken mkighir u sha ican kua ijirôron kera; man kov Na yô, ka anti je nan hen er i gber Un ken tar u mbaumav kera? Lu sha ci u atindi a peren a ior av, kwaghbo tser Un ye.

⁹ I ver Un war a mbaerenakaabo imôngo, kpa ken ku Na yô, A lu a mbanyarev imôngo; gadia A er ma kwagh u ifer ga, icugh kpaa lu Un ken zwa ga.

¹⁰ Nahan kpaa lu ishima i TER je u vihin Un iyol; A haa Un angev iyol kpaa; shighe u Una gema iyol Na Una na nagh sha mi sha ci u isholibo yô, Una nenge a tsombor Na; Una tsa sha won, man á kpe kwagh u TER A ver ishima sha mi la iyol sha uwegh Nagh;

¹¹ sha mtoghor u uma Na, Una nenge a min je, á kuma Un; sha kwaghfan Na, wanakiriki Wam u perapera la, Una gema ior kpishi vea hingir mbaperapera; Una tôô afer a ve sha iyol Na kpaa.

¹² Nahan Me na Un kwar a ashagbaior imôngo, Una kar ishar a mbataveryol imôngo kpaa, sha ci u A gbihi uma Na ken ku je, shi i wa Un ken mbaaferev kpaa; nahan kpaa, ka Un je A tee isholibo i ior kpishi sha iyol Na, man A shi A sôn sha ci u mbaaferev kpaa ye.