Yesaia 52 - ICIGHAN BIBILO

¹ Nder, nder, we Shion, wa agee a ou iyol, haa akondo a ou a dedoo, we Yerusalem, icighangar; gadia ken hemen yô, oripusu man orhôngorough vea kera nyôr ken a we ga.

² Nduur ihundu iyol kera; mough, tema sha, we Yerusalem; sagh ikangenev sha mon wou kera, we wankwase u kwaregh u Shion.

³ Gadia TER ngu kaan nahan er: I tee ne gbilin, nahan á paa ne sha inyar kpaa ga.

⁴ Gadia Ter AÔNDO ngu kaan nahan er: Hiihii la ior Av za ken Igipiti, za lu shir ker, man Mbaashiria er ve ican sha ityôikaa ga.

⁵ Nahan hegen yô, ka nyi M lu a mi heene, kape TER A pin la, er i gbe kuran ior Av kera gbilin nahana? Mba ve ye tor sha a ve mba eren akenge, kape TER A kaa la, man hanma sev kpaa mba shi tuhwan iti Yam.

⁶ Nahan ior Av vea fa iti Yam; sha iyange la vea fa er i lu Mo, M er kwagh yô; Mo M ngun heen ne.

⁷ Angahar a or u nan ve a loho u dedoo, a doo u nengen a mi sha iwo tsô, u nan yee bem, u nan ve a loho u dedoo, u nan yee myom, man nan kaa a Shion er: Aôndo wou ya tor!

⁸ Ungwa! imo i mbakuran we! Mba genger imo, mba wan icam imôngo, gadia mba nengen sha ashe ve je, er TER A lu hiden hen Shion yô.

⁹ Ger nen iember, wa nen icam imôngo, ne atse a ayou a ken Yerusalem ne, gadia TER sur ior Nav asema, A paa Yerusalem.

¹⁰ TER bugh icighanwe Na sha ashe a akuraior cii; akighir a tar cii kpaa, aa nenge myom u Aôndo wase.

¹¹ Mough nen, mough nen, due nen ken ijiir la kera, de benden nen ma kwagh u hôngorough ave ga; due nen ker atô na kera; wanger nen ayol a en, ne mbatôôn ikav mbi TER.

¹² Gadia nea due fele fe fele ga, nea yevese a yevese kpaa ga; gadia TER Una kar Una hemen ne, Aôndo u Iserael kpaa Una lu orkuran wen ken ijime.

¹³ Nenge, á kpe Wanakiriki Wam iyol, á na Un icivir, á kende Un sha tsung je.

¹⁴ Er ior kpishi i kpiligh ve iyol a We— mluashe Na vihi je, kera bee er ka or ga nahan, man mlu u iyol na kpaa kera bee mlu u ônov mba iorov ga—

¹⁵ kape Una cier akuraior iyol kpishi la; utor vea kusu ijô ve sha ci Na, gadia kwagh u i lu a kaa ve ga je, vea nenge, kwagh u ve lu a ungwa ga kpaa, vea kav un.