Yesaia 51 - ICIGHAN BIBILO

¹ Ver nen ato her a Mo, ne mba ne ze a perapera ityô, ne mba ne keren TER; nenge nen sha vande u i tsehe ne ker yô, man shin ihungwa henpe i tim ne yô.

² Nenge nen sha Aberaham ter wen kua Sara u a mar ne la, gadia zum u a lu tswen la, M yila un, M ver un doo doo, M ser un iyenge.

³ Gadia TER sur Shion ishima, A sur atse a agar a na cii ishima, A gema desereti na hingir er ka Eden nahan, taaikôngo na kpaa er ka sule u TER yô; á zua a msaanyol kua iember her, ishughun kua imo i icam kpaa.

⁴ Ver nen ishima her a Mo, ne ior Av, ver nen ato her a Mo, we ikurior Yam; gadia ityesen ia due her a Mo, Me ver mimi Wam una hingir iwanger i akuraior.

⁵ Mhembe Wam mgbôghom, myom Wam due ken igbar, ave Am aa ôr akuraior ijir; ityar i hen kpe u zegemnger ia keghem, ia suur sha uwegh Agh.

⁶ Kende nen ashe a en sha Usha, nenge nen shin tar, gadia Usha vea kar kera er mnyim nahan, tar kpaa ua bee iyol er ikondo yô, mba ve tem shin u kpaa, vea kpe er amunan nahan; kpa myom Wam una lu gbem sha won man á kar a perapera Wam kera kpaa ga.

⁷ Ver nen ato her a Mo ne mba ne fe perapera, ne ior mba atindi Am a lu ken asema a en yô; de cie nen mlaha u ior ga, ishima i̱ de nyian ne sha ci u ityuhwanev vev mbi tuhwan kpaa ga.

⁸ Gadia ivina ia ya ve er ikondo nahan, ijôô kpaa ia ya ve er ul nahan; kpa perapera Wam una tsôr gbem sha won, myom Wam kpaa una lu sha ikov ikov cii.

⁹ Nder, nder wa agee iyol, we, uwegh ku TER; nder er sha ayange a atsuaa la nahan, a sha ikov i ngise la. Kera ka We U paa Rahabi avur avur, shi U kuma darakon kpaa gaa?

¹⁰ Ka We U uma zegemnger, mngerem ma zan tsung la; man U gema aiv a zegemnger, hingir gbenda sha ci u mba i paa ve, ve̱ per gaa?

¹¹ Mba TER A paa ve la vea hide, vea nyôr ken Shion a atsam zwa, iember i tsôron ia lu ve sha ityo, vea zua a iember kua msaanyol, ishimavihin man ishimashirin ia yevese kera.

¹² Ka Mo, M surun ne ishima ye! Ka nyi man we u cie or u nana va kpe man wan u or u á gema nan á hingir er toho kpaa yôô?

¹³ man TER u A gbe u la hungul we, Un u A samber Usha, man A tim imagh ki taregh la; man u shi cian didi sha ci u iyugh i orkighir, zum u a kohol iyol sha u timin la. Nahan iyugh i orkighir ngi han hegen ase?

¹⁴ Orkwar u nan var inya la á pase nan á tuhwa fese, nana kpe ga, nana sen shin ihungwa ga, kwaghyan u nan kpaa una ban nan ga.

¹⁵ Gadia Mo M ngu TER, Aôndo wou, ka M kpianger zegemnger, je agôndo a na a ta kume; TER u akum a Sha, ka iti Yam je la.

¹⁶ M ver akaaôron a Am ken zwa wou, M yer u ken mure u ikevwe Yam; M samber Usha, M tim imagh ki taregh, M kaa a Shion kpaa Mer: Ne mba ior Av je.

¹⁷ Nder, nder, mough tile sha, we Yerusalem, we u u me iyongo i iyugh sha ikev i TER; u ma iyongo i nan zuzu, u ma i ndeera.

¹⁸ Ônov nav mba a mar cii, mô u hemen un gbenda nan ngu ga; ônov nav mba a yese cii kpaa, mô u kôron un uwegh nan ngu ga.

¹⁹ Akaa a ahar ne á tser u; ka anti nana zungwe we? Myôhôr kua mtim man ijen kua sanker; Me er nan man Me sur u ishima?

²⁰ Ônov ou hume, ve yav sha ityouv mbi igbendav mbi ken gar cii er ka ashim u ken kper nahan; ve iv a iyugh i TER, mzehe u Aôndo wou.

²¹ Nahan yô, shi ungwa ase kwagh ne, we u ican i tser u ne, we orhunden ne, kpa ka sha wain ga;

²² Teru, TER, Aôndo wou, u A te ikaa ken ior Nav sha kwagh u tseren ve la, ngu kaan nahan er: Nenge, M ngohol iyongo i nan zuzu sha uwegh ough kera, ka kuca u iyugh Yam je la, mayange ú kera kimbir u man u ga;

²³ Me gema u, Me na sha ikev i mba ve eren we ican la; ve mba ve kaan a we er: Ngurum nen, sé unde sha a ven; man u gema ijime you hingir er inya nahan, man er ka gbenda u mba ve zenden sha u yô.