Yesaia 50 - ICIGHAN BIBILO

¹ TER ngu kaan nahan er: Takerada u paven ivôson i ngôu, u M te kera la, ngu hana? Man shi ka hanma or u yaren Mo injô, M tee nan we? Nenge, ka sha ci u akaabo a en i tee ne ye, man ka sha ci u afer a en man i te ngô wen kera kpaa ye.

² Ka sha ci u u nyi man zum u M va la, M kohol ma or ga? Zum u M yila kpaa, ma or vengese ga? Uwegh Agh kôvor, je kua kera fatyô u paan gaa? Shin M ngu a tahav mbu Me yiman gaa? Nenge, sha mzehe Wam ka M uma zegemnger, ka M gema uifi ve hingir desereti, ishu ve kpaa i human sha ci u mngerem ma ga yô, i kpe sha ci u imura.

³ Ka M cir Usha sha angôghime, M gema ibashôhô hingir ve ikondo i cirin.

⁴ Ter AÔNDO nam nombor u ior mba henen kwagh, sha u Me fa er Me suwe wen u a ver la, sha kwaghôron yô. Hanma sev ka A nderem, ka A bughum ato er M̱ ungwa er ior mba henen kwagh nahan.

⁵ Ter Aôndo bugh ato Am, M hendan ga, M hide ijime kpaa ga.

⁶ M gema ijime Yam M na mbagbidyen, ahenge Am kpaa M na mbagbelanice; M yer ishigh Yagh kera sha u cian kunya kua azer a haan ga.

⁷ Kpa Ter AÔNDO wasen Mo; nahan yô, kunya kôrom ga; ka nahan kpaa M ver ishigh Yagh er ka iwen i gberusu nahan, shi M fe, Me va ahenge kpaa ga ye.

⁸ Wen u a nem ishô la, ngu ikua ikua; ka an je i sar nan u yilan Mo ijiri? Sé mough nen sha imôngo! Ka an nan lu orhendan a moo? Nana̱ kporom ase her a Mo.

⁹ Nenge, Ter AÔNDO wasen Mo; ka an je nana nam ibo? Nenge, ve cii vea hingir mbabeenyol er ikondo nahan; ivina ia ya ve.

¹⁰ Ka anti wen nan lu u cian TER, nan we iko sha imo i Wanakiriki Naa? Zum u nan zenden ken ime man nan lu a iwanger kpaa ga yô, nana̱ suur sha iti i TER, nana̱ lian ken Aôndo u nan kpaa.

¹¹ Yô, ne mba ne keer usu cii, mba ne zeren akagh a usu iyol, zende nen ken nomborusu wen, man ken akagh a usu a ne tsar yô. Ka sha ikev Yam je kwagh ne una tser ne ye: nea yav inya a mnyoonom iyol.