Yesaia 47 - ICIGHAN BIBILO

¹ Hungwa, tema shin vuulevu, we, iniunkwase i Babilon; shar inya, de tem sha ikônough ki torough ga, we, wankwase u Mbakaldi; gadia á kera yila u er u ngu kwase u lun iyol vel vel, u nan fe ican ga, ga.

² Tôô nase, wua mwem; bugh ikondo i yisan ishigh you, kôvor ikondo sha, tor ikondo shin agbelan, per iwagh.

³ Á pase idyelegh wou, een, á nenge a kunya wou. Me or iyev, Me tsegha or môm ga.

⁴ Oryiman wase, ka TER u akum a Sha, ka iti Na je la, Icighan u Iserael.

⁵ Tema ving, yem ken ime, we, wankwase u Mbakaldi, gadia á kera yila u er, kpamkwase u ityartor ga.

⁶ Ishima vihim a ior Av, M hôngor a dyako Wam, shi M na ve sha ikev you, mayange u zungwe ve mhôônom ga; mbatamen kpaa u kighir ve igbur you i yuhwan tsung la sha mon.

⁷ Man shi u kaa wer: Me tema kpamkwase gbem; kpa u ver ishima sha akaa ne ga, u kera umbur mkur u a kpaa ga.

⁸ Hegen yô, ungwa kwagh ne, we, u i maan we iyol a ishar i haan iyol la, we, u u tem a mkpeyol, u kaa ken ishima you wer: Mo ne, ugen ngu ga saa mo; me tema kwasecôghol ga, man me fa msaa u ônov kpaa ga;

⁹ kpa akaa ahar ne aa tser u fese, sha iyange i môm: msaa u ônov man u teman icôghol; aa tser u jimin, shin er ahir a ou a ngee, man akaasôron a ou la a taver nahan kpaa.

¹⁰ Gadia u suur sha ifer you; u kaa wer: Ma or ngu nengen ga. Mfe wou kua kwaghfan wou la ve tsume a we; man u kaa ken ishima you wer: Mo ne, ugen ngu ga saa mo.

¹¹ Ka sha ci u nahan man kwaghbo una tser u ye, ú fa msôr na kpaa ga; kwaghbo una tser u, ú fatyô u mgbeghan un kera ga; mtim kpaa una bur u, kwagh u u fe un ga yô.

¹² Gba zan hemen a akaasôron a ou kua ahir a ou a a ngee yum ne, a u lu eren tom u zan we iyol sha mi, hii sha iyev ou la je; alaghga ú fatyô u eren ma kwagh, alaghga ú ta mciem iyol!

¹³ U vôr a mbamhen ou mba kpishiv la; yô, de, mba ve paven Usha, mbanengen asan, mba ve lu ôron we kwagh u á va eren sha iwer iwer la, ve̱ mough ve̱ tile sha, ve̱ yima u sha akaa a á va tser u la.

¹⁴ Nenge, ve hingir er atighir a toho nahan; usu hia ve kera; ve fatyô u waren ayol a ve sha agee a usu ga; ka akausu a ôson ga, shin usu u á tema hen u kpaa ga.

¹⁵ Kape akaa a u ye ican i nyoon iyol sha mi, aa lu her a we la; mba ve teen we kasua hii sha iyev ou la, vea yem hanma or hen ijiir i nan; ma or nana lu u yiman we ga.