Yesaia 44 - ICIGHAN BIBILO

¹ Kpa hegen yô, ungwa, we wanakiriki Wam Yakob, man Iserael kpaa u M tsough la.

² TER u A er u, A maa u ken uya je, man A wasen we la, ngu kaan nahan er: De cie ga, we Yakob, wanakiriki wam, man we, Yeshurun u M tsough ne.

³ Gadia Me haa mngerem sha tar u imura i ker u yô, man uikuwanmbamngerev kpaa hen ikpoghonya; Me haa Jijingi Wam sha mbayev ou, kua iveren Yam kpaa sha tsombor wou;

⁴ vea mende er toho ken atô u mnger nahan, er ikon i wilou i hen kpe u ukungômbamngerev yô.

⁵ Ugen nana kaa er: Mo m ngu u TER je; ugen kpaa nana tôô iti i Yakob; ugen yô, nana nger sha uwegh ku nan er: Ka kwagh u TER je, nana seer iti i nan er, Iserael.

⁶ TER, Tor u Iserael man Orpaan na kpaa, TER u akum a Sha ngu kaan nahan er: Mo M ngu u hiihii, shi M ngu u masetyô kpaa; ma aôndo ugen ngu ga, saa Mo.

⁷ Ka anti nan lu er Mo nahana; yô, nana̱ yôô, nana̱ pase nana̱ verem kwagh la sha ishi M ver ikurior i tse la, tsuaa je. Ve̱ pase akaa a a ve la, man a aa va er la.

⁸ De cie nen ga, mciem ma̱ de gbe ne iyol ga; M tsengaôron ne ngise je, M pase ne gaa? Ka ne je ne lu mbashiada Av ye. Ma aôndo ugen ngu jee, saa Mo tsô gaa? Mimi je, ma Vande ugen ngu ga, M fa mô ga.

⁹ Ve mba ve gbe ieev, ve cii ka agbilinaior tsô, man akaa a doon ve yum la, aa lu ve a inja ga; ushiada vev mba nengen ga, mba fe kwagh kpaa ga, nahan kunya ua kôr ve.

¹⁰ Ka an nan gbe aôndo, shin nan ker eev mbu mbu lu a inja sha ma kwagh ga ne ase?

¹¹ Nenge, mba ve nyer nongo a nan cii, kunya ua kôr ve; mbatomov je kpaa, ka ior tsô; de ve cii, ve̱ kohol ijiir i môm, ve̱ mough, ve̱ tile sha; vea cia, kunya kpaa ua kôr ve imôngo cii.

¹² Orvareniwa ka nan er tom u mbu sha aka, nan var mbu sha mbamsabe, nan er tom sha mbu sha uwegh ku nan ku ageegh je; ijen kpaa i kôr nan, agee a yina nan iyol, mngerem tsô kpaa nan ma ga, zan zan iyol i kpe nan cii.

¹³ Orgbankwagh ka nan ta kor u karen kwagh a mi nan kpela mbu hwange sha pensel, nan sôr mbu sha mbaityôv, nan nger mbu sha iyôgh ki karen kwagh, nan er mbu sha inja i mlu u or, sha inja i mluashe u or, sha er mbu̱ lu ken iyou yô.

¹⁴ Ka nan gber usedar sha ci u nan, nan tôô kon u shiperu man u ouki, nan de u môm u̱ mende u̱ vese sha ci u nan ken ikô nan môôr kon u pain, tsô ura u gbaa vesen u tsô.

¹⁵ Tsô u gema u hingir kwagh u or nana wa usu a mi, nan pande u, nan ôso usu, shi nan wa, nan kaa bredi a mi, shi nan er aôndo a mi kpa, nan gule nan civir un; nan gba eev sha u, nan gule mbu inya.

¹⁶ Nan nande tiôn ugen sha usu, tiôn ugen la nan ya inyam a mi, nan mgbagh inyam sha mi, nan ya nan ide; shi nan ôso usu nan kaa er: Ehe! gba tseen mo ve, m nenge a usu ve!

¹⁷ Tiôn u masen shin la, nan gema nan er aôndo a mi, ka eev mbu nan mbu gban a gba je la; nan gule mbu sha ishi, nan civir, nan er mbu msen, nan kaa er: Yimam, gadia ka we u lu aôndo wam ye.

¹⁸ Ve fa ga, mba henen kwagh ken asema ve kpaa ga, gadia i cir ve ashe sha u vea fatyô u nengen ga kua asema a ve kpaa, sha u vea fatyô u kaven ga yô.

¹⁹ Mô môm kpaa nan kera hen ken ishima i nan ga, kwaghfan ngu ga, shin mkav kpaa u vea kaa er: Tiôn na ugen m keer usu a min, m kaa bredi sha aka na kpaa, man m mgbagh inyam, m ya; nahan m tôô tiôn na u a shi la, m̱ er kwagh u ndôhôrshima a mini? m̱ gule m̱ civir tiônkono?

²⁰ Ka mtwem nan ye ye; icugh i ken ishima, i tsume a nan sha gbenda je, nan kera fatyô u yiman uma u nan ga; u pinen er: Ka aie a lum ken uwegh ku yanegh ye gaa, kpa nan pine ga.

²¹ Umbur akaa ne, we Yakob, kua we Iserael kpaa, gadia u ngu wanakiriki Wam; ka Mo M maa u ye; u ngu wanakiriki Wam; Iserael, hungul Yam we ga.

²² M ese atindi a ou a peren kera er irkpiigh nahan, man asorabo a ou kpaa, er ibeenegh yô; hide her a Mo, gadia M paa u.

²³ Ember nen, ne Usha, gadia ka TER A er nahan ye; er nen ikenge, ne ajiir a zan a shin tar; ger nen atsam a wan, ne iwo, man we ikô, a hanma kon u kimi cii, gadia TER paa Yakob, Una pase icivir Na ken Iserael.

²⁴ TER, Orpaan wou, man u A maa u ken uya je, ngu kaan nahan er: Ka Mo M lu TER u M er akaa cii ye, M samber Usha, Mo tswen, M samber tar sha won; ka an nan lu vea Mo?

²⁵ M bundu uivande mba uprofeti mba aiev, M gem mbakpehenasor ve hingir abumeaior; M hir a mbafankwagh ijime, M gem kwaghfan ve a hingir ibumegh.

²⁶ M taver kwaghôron u wanakiriki Wam, M kur kwagh sha imo i mbatyomov Av vough; M kaa a Yerusalem Mer: Ior ve̱ tema ker; man a agar a Yuda kpaa, Mer: I̱ maa a her, Me shi Me maa atse a na,

²⁷ M kaa a aivamnger, Mer: Uma kera; Me uma uifi ou;

²⁸ M kaa sha Shirushi, Mer: Ka orkuranilev Wam je, una er kwagh u a doom ken ishima u eren cii je, una kaa a Yerusalem er: I̱ maa u her, tempel kpaa i̱ tim imagh nagh.