Yesaia 43 - ICIGHAN BIBILO

¹ Kpa ahegen yô, TER u A gbe u, we Yakob, Un u A maa u, we Iserael, ngu kaan nahan er: De cie ga, gadia M paa u, M yila u sha iti, uwe u ngu u Wam je.

² Zum u wea peren gidamnger yô, Me lu a we; wea peren uifi kpaa, vea uve u ga; wea zenden ker atô usu kpaa, ua hia u ga; nomborusu kpaa ua kôr u ga.

³ Gadia Mo, M ngu TER, Aôndo wou, Icighan u Iserael, Oryiman wou; M na Igipiti hingir kwagh u paan we a mi, man Etiopia kua Seba kpaa sha ityough you.

⁴ Er u lum kwagh yum, man kwagh u icivirigh, shi u doom ishima kpaa yô, sha ci u nahan yô, Me na ior sha ityough you, man akuraior sha ci u paan uma wou.

⁵ De cie ga, gadia M ngu a we; Me za va a tsombor wou sha ityoughkitaregh, Me za kura u shin ityôtar kera;

⁶ Me kaa a imbusutarimese Mer: Na; shi Me kaa a imbusutariyan kpaa Mer: De kera luun a mi her ga, va a ônov Av mba nomso mba ken ica la kua ônov Av mba kasev mba ken ikighirtar la kpaa;

⁷ hanmô u i yer nan sha iti Yam, u M gbe nan sha ci u icivir Yam, u M maa nan, u M er nan la.

⁸ Due a ior mba ve pir ashe, shin ve lu a ashe nahan kpaa, man mba ve kondo ato, shin er ve lu a ato nahan kpaa.

⁹ Akuraior cii, a̱ kohol imôngo, ior cii ve̱ zua imôngo. Ka anti ken ve je nana fatyô u pasen kwagh ne, man nana tese se akaa a a vande karen kera? Ve̱ va a ushiada vev sha er vea zua a ishô yô, ve̱ ungwa, ve̱ kaa er: Ka mimi je.

¹⁰ Ka ne ne lu mbashiada Av ye, kape TER A kaa ne, wanakiriki Wam u M tsough, sha er ne̱ fam, ne̱ nam jighjigh, ne̱ kav er M lu Un kpaa yô; aôndo ugen vande lun a Mo ga, ken ijime Yam kpaa una lu ga.

¹¹ Ka Mo M lu TER ye; á lu Mo ga yô, ma Oryiman ugen ngu ga.

¹² Mo M pase, M yima, man shi M yôô kpaa; ma aôndo ugen lu her a ven ga, ka nahan man ne ne lu mbashiada Av ye, kape TER A kaa ne; ka Mo M lu Aôndo ye.

¹³ Hii nyian zan zan ayange a ken hemen kpaa, ka Mo Un her; mô u yiman sha ikev Yam ngu ga. Mo M eren tom, ka an je nana yange?

¹⁴ TER, Orpaan wen, Icighan u Iserael ngu kaan nahan er: Ka sha ci wen je Me tindi sha Babilon ye; Me sen a Mbakaldi cii, vea hingir mbayevese, ken utso vev mba ve ember sha mi la.

¹⁵ Mo M ngu TER, Icighan wen, Orgban u Iserael, Tor wen.

¹⁶ Kape TER A kaa ne, Un u A er gbenda shin zegemnger, man gbenda u karen shin mngerem ma vesen kpaa;

¹⁷ Wen u A ve a ikyekyeutya man nyinya kua ikumutya man ortaveryol; mba yaven imôngo, vea kera mough ga, ve saa kera, i pir ve er ka mou u imenger nahan:

¹⁸ De kera umbur nen akaa a ngise ga, man de kera waan akaa a a er tsuaa la iko ga.

¹⁹ Nenge, eren Yam kwagh u he; una due hegen je, ne kera nenge a mi gaa? Me er gbenda ken desereti man uifi ken taaikôngo.

²⁰ Inyamtoho ia civir Mo ugbaseela kua ukonkofi, sha ci u M ne mngerem ken desereti man uifi ken taaikôngo, sha u Me na ior Av mngerem ve̱ ma, ka uicuwan Av je la.

²¹ Ior mba M maa sha ci Wam iyol Yam je, vea pase iwuese Yam.

²² Nahan kpaa u yilam ga, Yakob; kwagh Wam kumbur we iyol kpaa ga, Iserael.

²³ U vam a iyôngo i nagh ough ku nanden ga, u civir Mo sha nagh ough ku sôngon kpaa ga. Mo M kighir we Mer, va nam nagh ku sha samuyia ga, M za u iyol sha nagh ku nanden ku human doon kpaa ga.

²⁴ U yamen kalamu u human doon sha inyar ga man u nam ahôm a iniav youv mbila wer i̱ saan Mo iyol, ga; u er i nyôrom iyol a asorabo a ou la, u zam iyol sha aferakaa a ou.

²⁵ Ka Mo je M ese atindi a ou a peren kera sha ci Wam iyol Yam; Me kera umbur asorabo a ou kpaa ga.

²⁶ Umbur Mo kwagh, va se hen nen kwagh imôngo; ôr kwagh wou, sha er ú zua a ishô yô.

²⁷ Teru u hiihii la, er isholibo, mbapasen we kwagh kpaa ve per atindi a Am.

²⁸ Nahan M hôngor mbavesen mba icighanjiir, M gema Yakob M na i tim un purututu, Iserael kpaa hingir kwagh u aheenegh.