Yesaia 40 - ICIGHAN BIBILO

¹ Sur nen ior Av asema, sur nen ve asema je; kape Aôndo wen A kaa la.

² Ôr nen kwagh u pever Yerusalem ishima, yila nen un genger genger, kaa nen ner, ayange a na a yan ican bee ve, i de un iferkwagh na kpaa; a ngohol mtsaha sha ikev i TER sha asorabo na cii, kuma kwa har je.

³ Imo gba yilan kaan er: Sôr nen gbenda u TER ken desereti, kôôm nen kômgbenda ken taaikôngo sha ci u Aôndo wase.

⁴ Á kondo hanma pev, hanma uwo man hanma igungu kpaa á sar ve; kwagh u a lu gbeen gbe gbeen la, una hingir vaanaa; ajiir a a lu awen awen aa hingir gbulumuu;

⁵ iengem i TER ia ande ken igbar, uumace cii vea nenge a i imôngo, gadia ka zwa u TER u kaa nahan ye.

⁶ Imo gba kaan er: Yôô ase! Ugen pine er: M̱ yôô nyi? Uumace cii mba er toho nahan, mdooashe ve cii kpaa ngu er imondon u ken toho nahan;

⁷ toho ka u uma, imondon a use, zum u iôôn i TER ka ia ta sha mi yô; mimi je, ior ka toho tsô.

⁸ Toho ka u uma, imondon a use, kpa kwaghôron u TER wase yô, una lu her gbem sha won.

⁹ Unde sha uwo u taven, we Shion u u yee loho u dedoo ne; genger imo taver taver, we Yerusalem u u yee loho u dedoo ne, genger imo de cie ga, kaa agar a Yuda wer: Nenge, Aôndo wen Ngun!

¹⁰ Nenge, Ter AÔNDO Una va sha agee, Una kura tar sha uwegh Nagh je; nenge, injar Na ngi a Na; iyevoron Na kpaa kar ngi zan Un sha hemen.

¹¹ Una koso ilev Nav er orkuranilev nahan, Una kohol ônovmbaiyôngov sha uwegh Nagh, Una tôô ve Una wa sha ikum Na, una za a mbi amben ônov tegh tegh.

¹² Ka an nan kar gidamnger sha ikevwe i nan, shi nan kar Usha sha ishiva, nan kohol vuulevu u tar shin ikagh ki karen kwagh a mi, man nan kar iyohov mbu iwoov sha ikaren, man agungu kpaa sha iyôgh ki karen kwagh a mini?

¹³ Ka an nan lu wa Jijingi u TER kwagh, shi nan lu orwasen Un henen kwagh, nan tesen Unu?

¹⁴ Ka an A hen kwagh a nan man nan pase Un kwagh, nan tese Un gbenda u vough, nan seer Un mfe man nan pase Un gbenda u kaven kwagh ase?

¹⁵ Nenge, akuraior nga er ibelegh ki mngeregh ki ki lu shin ika yô, man er ihundu i puer i i hee sha iyôgh ki karen kwagh a mi nahan; nenge, acile a shin zegemnger nga er vuulevu u lun lueen u i tsenda kera yô.

¹⁶ Lebanon kpaa kuma u keer usu a mi ga, ishôso i sha mi kpaa kuma u nan nagh ku nanden a mi ga.

¹⁷ Akuraior cii kpaa nga sha ishigh Nagh er ka ma kwagh ga yô; nga Un er ka ma kwagh je ga, man er gbilinkwagh tsô yô.

¹⁸ Tsô né kar Aôndo sha ana? Man ka hanma mluyol a kom u karen sha a Naa?

¹⁹ Eev mbu haan yô, ortom ka nan haa mbu, orvarenzenaria nan cir mbu zenaria iyol, nan var mbu mshirim ma azurfa.

²⁰ Or u nan gbe ican yum nan yen sha nagh kura yô, nan tsuwa kon u ua vôngo ga yô, nan ker orfan eev dedoo, sha er nana̱ gba eev mbu mbua tenger ga yô.

²¹ Ne fa gaa? M-ongo kpaa, ne ungwa gaa? I kaa ne sha hiihii je gaa? Ne kav sha mgbetar je gaa?

²² Ka Un u A undu kpighikiki u tar shin, A tema sha la, mba ve tem sha u kpaa, mba er mbaahungwa yô; A naregh Usha er ikondo i vel vel nahan, A samber ve er tenti u teman ker yô;

²³ A gema atiator hingir gbilinkwagh; mbatarev kpaa a gema ve ve hingir kwagh u gbilinigh.

²⁴ I môôr ve ica ngi a gba ga; i lôô ve ica ngi a gba ga; er itine ve i lu a kôr amise shin inya ica ngi a gba kpaa ga, A ta ahumbe sha a ve, ve use kera; hiar a va kura ve kera er atighir a uwua nahan.

²⁵ Tsô ne karem sha an, u Me lu vough a nana? Kape u A lu Icighan la A pin la.

²⁶ Kende nen ashe a en sha, nenge nen: ka an nan gbe akaa ne, nan dugh a akum a ve sha iyenge ve, nan yer a cii sha ati ati? Sha mvese u agee a Na man sha ci u mtaver u tahav Nav, mô môm u lun ga ngu ga.

²⁷ We Yakob, ka nyi u kaan nahan, man we Iserael, u er kwagh u kaa wer: Gbenda wam ngu myer hen TER; man u kuren mo ijir sha mimi kpaa, Aôndo wa iko sha mi ga ase?

²⁸ U vande fan gaa? M-ongo kpaa, u ungwa gaa? TER ka Aôndo u tsôron je, Orgban u akighir a tar, gbe uwer ga, ver kpaa ga, mkav Na gande u timen fan.

²⁹ Ka A na or u nan ver la agee, man A seer or u nan taver ga la agee.

³⁰ Shin er mbayevikaior je kpaa iyol i kpe ve, ve ver nahan, man mbaageev kpaa ve lu nôngon gbev je,

³¹ nahan kpaa, mba ve veren ashe sha TER yô, vea hide a agee a ve her; vea kôndo sha sha akper er ugafa nahan; vea yevese, kpa vea vôr ga; vea zende, kpa iyol ia kpe ve ga.