Yesaia 38 - ICIGHAN BIBILO

¹ Tsô sha ayange la Hesekia gba angev je, gba nôngon ku. Nahan profeti Yesaia wan u Amoshi va her a na, va kaa a na er: TER ngu kaan nahan er: Sôr akaa hen ya wou, gadia kpen you, ú war ga.

² Tsô Hesekia gema ishigh nagh hen kpekpe, a sôn TER,

³ a kaa er: TERE, shi umbur er m zende sha ishigh You sha mimi a ishima i jighilii, shi m er akaa a dedoo sha ashe Ou kpaa yô. Nahan Hesekia gba vaan tsung.

⁴ Tsô kwaghôron u TER va hen Yesaia, er:

⁵ Yem, za kaa Hesekia, wer: TER, Aôndo u teru Davidi, ngu kaan nahan er: M ungwa msen wou, M nenge mliam ou kpaa; yô, Me seer we anyom pue kar ataan sha ayange a ou;

⁶ Me yima u kua gar ne sha ikev i tor u Ashiria, man Me kumba gar ne.

⁷ Kwagh ne una hingir we ikav i i dugh hen TER, er TER Una er kwagh u A kaa ne yô:

⁸ Nenge, Me na mure u a gbe sha ihange i anar u tesen mzende u iyange u Ahashi la, una hide ijime ihange pue. Nahan iyange hide ijime ihange pue sha anar henpe i vande karen la.

⁹ Kwagh u Hesekia tor u Yuda nger, zum u a gba angev man a war angev nav la:

¹⁰ M kaa mer: Er ayange am a shi her doo doo nahan kpaa gba u m̱ yem, m̱ nyôr ken ihinda i Sheol; i nyumem anyom a a shim her yô.

¹¹ M kaa mer: Me kera nenge a TER, TER ken tar u mbaumav la ga Me kera nenge a or hen mba ve tem ken tar la ga.

¹² I kar a ijiir yam i teman kera, i tsuwem i kera er ka tenti u orkuranilev nahan, m hule uma wam er ortumenikondo ka nan hule i nahan, A tôndom sha igaikondo; hii pepe zan zan tugh U beem kwagh wam kera.

¹³ M nôngo u huan ving zan zan sev av; er begha nahan, kape A kever akuhe am cii la; hii pepe zan zan tugh U beem kwagh wam kera.

¹⁴ Er gbargbar shin ôô-ôô ve yôôso nahan, kape mo kpaa m zer yôôso gbem la; m vaa, m zungwe er atii nahan; ashe am kenger sha je, hingir mir mir, TERE, kwagh tsulem, hingir ishuur wam.

¹⁵ Shi me kaa nana? A ôrom kwagh, man shi ka Un iyol Na kpaa A er kwagh ne ye; me gba yemen ving sha anyom a am cii, sha ci u ishimavihin yam.

¹⁶ TERE, ka sha akaa angan or ka nan lu uma ye, man ka ken a, uma u jijingi wam a lu jimin ye. Nahan yô, beem angev, m̱ lu uma.

¹⁷ Nenge, bocan wam ne, gema nam mkpeyol, gadia uma wam doo U ishima je, U dugh un shin ihungwa i mtim kera, U gema asorabo am cii U gbihi ken ijime You.

¹⁸ Gadia Sheol fatyô u wuese We ga, man ku kpaa u fatyô u civir We ga; mba ve senen shin ihungwa vea fatyô u suur sha jighjigh Wou ga.

¹⁹ Or u uma, or u uma, ka nan je nana wuese We ye, er mo m eren nyian nahan; ter ka a tese ônov nav jighjigh Wou.

²⁰ TER rumun u yiman mo kpaa; nahan sé wa atsam a ityogholov mbi sha ingyanyinya, sha ayange a uma wase cii, ken iyou i TER.

²¹ Yesaia kaa er: Ve̱ tôô ijen i atam a tur, ve̱ cir sha ityundu, angev mbu̱ bee un.

²² Hesekia kpaa kaa er: Ka nyi i lu ikav i mea kôndo sha iyou i TERE?