Yesaia 37 - ICIGHAN BIBILO

¹ Tsô zum u tor Hesekia ungwa kwagh ne yô, a ande akondo a na, a haa iba iyol, a za nyôr ken iyou i TER.

² Nahan a tindi Eliakim u a nengen sha ya u tor, man Shebena orngeren kua upristi mba tamen, ve haa aba iyol, ve za hen profeti Yesaia wan u Amoshi.

³ Ve za kaa un er: Hesekia ngu kaan nahan er: Iyange ne ka iyange i ican je, man i mtsaha kua ilyahan kpaa; gadia ônov kuma u á mar ve yô, kpa agee a maren ve nga ga.

⁴ Alaghga TER, Aôndo wou, Una, ungwa akaaôron a Rabeshake, u ter na tor u Ashiria, a tindi un er a̱ tuhwa Aôndo u uma la yô, man Una tsaha un sha akaaôron a TER, Aôndo wou, A ongo la; nahan yô, ma u shi kende imo ma u er msen sha ci u asande a a shi her yô.

⁵ Tsô mbayev mba tor Hesekia mba ve hen Yesaia yô,

⁶ Yesaia gema kaa a ve er: Za kaa nen ter wen nahan ner: TER ngu kaan er: De cie akaaôron a u ongo, a mbayev mba tor u Ashiria ve tohom sha a la ga.

⁷ Nenge, Me na jijingi ugen ker a na, una ungwa agwa, tsô una hide una yem ken tar na la; Me na una kpe ku u sha sanker ken tar na la.

⁸ Tsô Rabeshake hile yô, za kohol tor u Ashiria lu nôngon ityav a Libena; gadia vande ungwan er a mough hen Lakishi kera yô.

⁹ Tsô er a ungwa er i lu ôron kwagh u Tirhaka, tor u Etiopia, er: A due sha u va nôngon ityav a we–er a ungwa nahan yô, a tindi mbatyomov hen Hesekia a kaa er:

¹⁰ Za kaa nen Hesekia tor u Yuda nahan ner: Aôndo wou u u suur sha a Na la, A̱ de tsughun we kaan er, á na Yerusalem sha ikev i tor u Ashiria ga ze.

¹¹ Nenge, u ungwa kwagh u tor mba Ashiria lu er a ityar cii er ve tim i purututu la, nahan we yô, ú wara?

¹² Mbaaôndo mba akuraior, a uter av tim a la, ve yima a kpa? —ka Goshan man Haran man Resev kua ônov mba Eden mba ve lu ken Telasar la.

¹³ Tor u Hamati man tor u Arpadi man tor u gar u Sefarvaim man u Hena kua u Iva la, mba hana?

¹⁴ Er Hesekia ngohol washika sha ikev i mbatyomov mbala, ôr yô, Hesekia kôndo, za sha iyou i TER, a samber un sha ishigh ki TER.

¹⁵ Tsô Hesekia sôn TER, kaa er:

¹⁶ We, TER u akum a Sha, Aôndo u Iserael, We, u U tem sha ucerubi, ka We tseegh U lu Aôndo u ityartor i sha won cii ye, ka We je, U gbe Sha man tar ye.

¹⁷ TERE, ver ato, ungwa TERE, bugh ashe, nenge, ungwa akaaôron a Senakeribi cii, a a tindi sha u lahan Aôndo u uma ne.

¹⁸ Mimi je, TERE, utor mba Ashiria tim akuraior la cii kua ityar ve kpaa,

¹⁹ ve gbihi mbaaôndo vev ken usu kpaa; gadia ve ka mbaaôndo mimi ga, kpa ka tom u ave a ior tsô, ikon kua awen; ka nahan man ve tim ve ye.

²⁰ Yô, TERE, Aôndo wase, shi yima se sha ikev na, ityartor i sha won i̱ fa er We u lu TER tswen yô.

²¹ Tsô Yesaia wan u Amoshi tindi loho hen Hesekia, kaa er: TER, Aôndo u Iserael, ngu kaan nahan er: Sha kwagh u msen u u senem sha kwagh u Senakeribi tor u Ashiria la yô,

²² ka kwaghôron u TER A kaa sha a na ne, er: Iniunkwase, wankwase u Shion ngu lahan we, ngu sen we sha ilyahan; wankwase u Yerusalem ngu jingir ityough ken ijime you.

²³ Ka an je u laha nan, man u toho nan kpaa? Man ka an je u hagher sha nan sha kwaghôrono, u kenden ashe sha sha ihagher kpaa? Ka sha Icighan u Iserael je.

²⁴ Ka sha mbayev ou u laha TER ye, u kaa wer: Sha ikpila-akeke yam, m unde sha ajiir a taven a sha iwo zan zan ken atô u Lebanon, me gber ugôgômbausedar nav man uicighanmbaikonov mba fer nav, me za ar sha ityough nagh shaala je, hen pe ikô na i hembe wan la.

²⁵ M time azôr, m ma mngerem ma ken ityar igen, M uma asalegh a ifi u Igipiti cii sha akevangahar a am ne.

²⁶ U ungwa er M vande eren akaa la tsuaa, man M ver a ngise je kpaa, gaa? Hegen yô, M kure a sha mi vough, ka nahan man u tim agar a lun a ugir, u gema a, a hingir atihi alôgh ye.

²⁷ Ka nahan man mba ve tem ken a, ve kera lu a agee iyol ga ye, asema yina ve, kondo ve iyol, ve hingir er toho u ken akôngo nahan, man er gwergwe nahan man er toho u u mende sha uha, man shi er sule u alakema u a wa asange ga nahan.

²⁸ Kpa M fa mtem wou man mdugh wou man mnyer wou kua ihundugh ki u hundu sha a Mo kpaa.

²⁹ Er u hundu sha a Mo, man imanger you i u manger la, i va nyerem ker ato yô, nahan Me wa tsuwe Wam ken ihinga you, kua lijam Wam kpaa ken zwa wou, Me hide a we sha gbenda u u ve mi la.

³⁰ Kwagh ne una hingir we ikav: inyom ne né ya kwagh u a gbe menden iyol na tsô yô, inyom i sha kpaa né ya kwagh u una shi á mende la, kpa sha inyom i sha utar la yô, lôô nen, sunda nen, môôr nen ikon i wain, ya nen atam a i.

³¹ Asande a a wer ken ya u Yuda a a shi her la, shi aa wa amise shin inya, man á ume atam sha.

³² Gadia ka ken Yerusalem asande a a shi her yô, aa due, man sha uwo u Shion kpaa mbawaren vea due; gbashima u TER u akum a Sha Una er kwagh ne.

³³ Ka nahan man TER A kaa sha kwagh u tor u Ashiria la, er: Una nyôr ken gar ne ga, una ker ivaan ker ga, una kende perutya sha ishigh nagh ga man una ta tihinya sha u nôngon a na kpaa ga.

³⁴ Gbenda u a ve mi la, ka sha u je una hide ye, kpa una nyôr ken gar ne ga, kape TER A kaa la.

³⁵ Me kumba gar ne, Me yima un sha ci Wam iyol Yam kua sha ci u wanakiriki Wam Davidi kpaa.

³⁶ Tsô ortyom u TER due za wua ior dubu deri man dubu akunduanyiin kar utaan ken afo a Mbaashiria. Zum u ior nder pepe yô, nenge, ve lu akom gbulugh gbulugh.

³⁷ Nahan Senakeribi tor u Ashiria mough hide, yem, a za tema ken Nineve.

³⁸ Tsô er a gure ken iyou i Niseroki, aôndo na la yô, ônov nav Adrameleki man Shareser ve wua un sha sanker, maa ve yevese ve yem ken tar u Ararati. Wan na Esar-hadon gema tema tor sha ityough nagh.