Yesaia 35 - ICIGHAN BIBILO

¹ Taaikôngo man ikpoghonya vea lu sar sar, desereti una ember, una mondo er ishohough nahan,

² una mondo mgbesee, man una ember, una ember a icam zwa; á na un icivir i Lebanon kua icivir i hemban i Karmel man Sharon; vea nenge iengem i TER, icivir i hemban cii i Aôndo wase.

³ Taver nen ave a vôron la, man taver nen anu a kunden la.

⁴ Kaa nen a mba ve lu a ishima i cian kwagh yum la, ner: Taver nen, de cie nen ga; nenge, Aôndo wen Una va a iyevoron; man mtsaha u Aôndo; Una va á va yima ne.

⁵ Tsô á bugh mbaapirashe ashe, man á bugh mbakondonato ato.

⁶ Tsô orkeer nana gba tsuwen er ashim nahan, man nombor u orkondoniker kpaa ua wa icam; gadia mngerem maa due shin inya ken taaikôngo kua uikuwanmbamngerev kpaa ken desereti.

⁷ Waarawa u hian war war ua hingir ityungumnger, man inya i imura i ker i la ia hingir amboramnger; hen ajiir a ugbaseela, ape ve yaven yô, toho ua lu man ikenaika kua ilyôgh kpaa.

⁸ Kômgbenda una lu her, á yila un er Icighangbenda; or u nan lu wang ga yô, nana kar sha mi ga; kpa una lu sha ci ve, mbazenden sha mi kua abumeaior je kpaa vea tsume sha mi ga.

⁹ Begha una lu her ga, ma inyamtswam kpaa ia unde sha mi ga, á tser a ve her ga, kpa mba i yem ve yô, vea zenden sha mi.

¹⁰ Mba TER A paa ve la vea hide, vea va a icam i wan hen Shion; iember i tsôron ia lu ve sha ityou; vea zua a msaanyol kua iember, ishima i vihin kua ishima i shirin ia yevese kera.