Yesaia 31 - ICIGHAN BIBILO

¹ Kwagh á tser mba ve yem shin Igipiti sha u za keren iwasen, man ve suur sha anyinya, shi ve suur sha akekeautya, sha ci u a ngee yô, man sha mbaanyinyav, sha ci u ve taver kpishi yô, kpa mba kenger sha Icighan u Iserael ga, man mba keren TER kpaa ga!

² Nahan kpaa Wen kpaa ka u fan kwagh je, Una va a kwaghvihin, Una hide a kwaghôron Na ijime ga; Una mough num a ya u mbaerenafer kua a iwasen i mba ve eren iferkwagh la kpaa.

³ Mbaigipiti ka ior tsô, ka Aôndo ga, anyinya a ve kpaa ka inyam tsô, ka jijingi ga; zum u TER Una naregh uwegh Nagh yô, u nan wase la nana nôngo gbev, u nan ngohol iwasen la kpaa nana gba, ve cii vea tim imôngo.

⁴ Gadia TER kaam nahan er: Er begha man gumbegha ka a ta kume sha inyam na i a woo nahan, shin á yila ikpela i mbakuranilev sha u va tan num sha a na je kpaa, una wa imo ve iko ga man una cia ayôôso a ve kpaa ga; kape TER u akum a Sha kpaa Una sen sha u va nôngon ityav a uwo u Shion kua a igungu na kpaa la.

⁵ Er inyon ka i purugh i gbidyen akper nahan, kape TER u akum a Sha kpaa Una kura Yerusalem la; Una kura un, Una war un, Una de un, Una yima un.

⁶ Gema nen hile nen her a Na, Un u ne undu Un la, ne ônov mba Iserael.

⁷ Gadia sha iyange la, hanma or nana ta ieev mbi nan mbi sha azurfa kera, kua ieev mbi nan mbi sha zenaria, mbi ave a en a er i hingir ne kwaghbo la.

⁸ Zum la Orashiria una kpe ku u sanker, kpa ka sha u or ga; sanker kpaa á lu u ior ga, una wua un; una yevese sanker, man ikaior na ia hingir mbaerentom u kpan.

⁹ Vande na ua saa kera sha ci u mciem, atiator a na kpaa aa undu tuta sha ci u mciem; kape TER A kaa ne, Un u usu Na u lu ken Shion man usu Na u iwaagh u lu ken Yerusalem kpaa la.