Yesaia 3 - ICIGHAN BIBILO

¹ Gadia nenge, Ter, TER u akum a Sha, ngu ngohol Yerusalem man Yuda ishuwen kua ishuur kera, ishuwen u bredi cii, kua ishuwen u mnger cii,

² orageegh kua orutya, orjir kua profeti, orkpehenasor kua ortamen,

³ torshoja u nengen sha ior akunduahargber man orcivirigh, orwasen sha kwaghhenen man orfaneev kua orfan ahir a eren.

⁴ Man shi Me ver mbayev vea hingir atiator a ve, ipila kpaa ia tema tor sha a ve.

⁵ Ior vea kighir ayol a ve a ican, hanma or a orgen, man hanma or a or u nan we ndor a nan yô; wanye u kiriki nana cihi tamenor, kape or u gban kera kpaa nana er a orcivirigh la.

⁶ Zum u or nana gema nana kôr anngô u nan ken ya u ter u nan, nana kaa er: U ngu a akondo je, yô, lu orvesen wase, ice i i hingir atihi a alôgh ne i̱ hingir sha ikev you,

⁷ sha iyange la je, nana genger imo, nana venda er: Me fatyô u lun ortwer ga, gadia ken ya wam kwaghyan ngu ga, akondo kpaa ga; de gemem ner, m̱ hingir orvesen u ior ga.

⁸ Gadia Yerusalem nôngo gbev, Yuda kpaa gba; gadia nombor ve kua aeren a ve nga ihom a TER, sha u bamen ashe a Na a icivirigh.

⁹ Msange ve u sha dooshima ngu eren shiada nan ve ibo; mba pasen kwaghbo ve er Sodom nahan, mba yeren kwagh ga. Kwagh tser ve ve! Gadia ve va a kwaghbo sha ayol a ve!

¹⁰ Ter nen orperapera, kaa nen ner, á kpe nan iyol, gadia nana ya atam a aeren a nan.

¹¹ Kwagh á tser iferor! Á kpe nan iyol ga, gadia kwagh u ave a nan a er la, á va er nan un nahan vough.

¹² Ior Av mban, mba ve kighir ve a ican yô, ka mbayev, kasev kpaa mba yan tor sha a ve. Ior Av, mba ve hemen ne la, ka ve je ve tsume a ven ye, man gbenda u ma u ze sha mi la, ve vihi u kera.

¹³ TER mough tile sha, kuma Un u sendegh kwagh, ngu tilen sha sha u ôron ior ijir.

¹⁴ TER Una nyôr ijir a mbatamen mba ior Nav kua atiator a ve: Ka ne je, ne ye sule u wain; kwagh u i ngohol atsanaior sha apera la, ngu ken uya enev.

¹⁵ Inja na nan man ne cagh ior Av, ne er atsanaior icana? Kape Ter, TER u akum a Sha A kaa ne.

¹⁶ Shi TER kaa er: Er ônkasev mba Shion ve te ihagh, ve zenden ve dughun imon ve, ve nyiar ashe, mba zenden zende ve, eren iyar, uvan ahye shin angahar a ve,

¹⁷ nahan yô, TER Una haa ônkasev mba Shion lagh sha ihaghtyo, TER Una pase kunya u idyelegh ve ken igbar.

¹⁸ Sha iyange la je, TER Una kar a mbaagba mba sha hwe la kera kua atsar a kangen sha ityo man aniwerev,

¹⁹ man inyarev mbi ken ato man mbi sha ave, kua akondo a yisan ishigh la kpaa,

²⁰ man mbaadikpo mba kangen sha ityo man mshirim ma shin agbôônangahar man atsar a shin iwenge man akpe a tulali man akpagher,

²¹ man ikunya i sha ave kua i sha ahenga,

²² man akondo a hweegh a haan sha iniongo man akondo a hamben sha avande man a zeren shin iwenge man ankpaam ma kôron sha ave,

²³ man anjingim man ushimi man atsar a sha ityou kua uriga mba haan iyol.

²⁴ Kwagh u hôôn una gema á va lu sha ityough ki kwagh u human doon la; kor ua lu sha ityough ki tsar u shin iwenge la; ityough ki kpurun kia tema sha ityough ki kuran la; ibashôhô una lu sha ityough ki ikondo i zan iniongo a mi la; iyolough ku usugh sha ityough ki mdooashe la.

²⁵ Á wua nomsombaiorov ou sha sanker, anomaior a ou kpaa aa kpe ken utya.

²⁶ Ihindagar na ia vaa, ia zungwen, una shar hen inya aveve.