Yesaia 28 - ICIGHAN BIBILO

¹ Kwagh á tser idyer i tor i gengeseyol i mbahundenmsôrom mba Eferaim man imondon u usen kera, u mdooashe na u tsung la, u a lu sha ityough ki pev u doon sule yum, u mba wain a gbihi ve inya la!

² Nenge, Ter ngu a orageegh u taver iyol, er ura u awomboogh man ijeverahumbe u vihin kwagh nahan, er ura u tamen u mngerem ma sar avenge nahan, u ka u haa akaa inya sha agee.

³ Idyer i tor i gengeseyol i mbahundenmsôrom mba Eferaim la, á shoghol un angahar je;

⁴ man imondon u usen kera u mdooashe na u tsung la, u a lu sha ityough ki pev u doon sule la, una hingir er ka ityamegh ki tur ki ki vie fefa er shighe lu a kuma ga yô; or nana nenge a ki, tsô er ki lu nan sha uwe la, maa nana ya ki je.

⁵ Sha iyange la TER u akum a Sha Una hingir asande a ior Nav a a shi her la er ka idyer i tor i icivirigh man tsar u doon ashe nahan,

⁶ man jijingi u ijirigh u or u nan tem sha u ôron ijir la, man agee a mba ve daan ityav sha ihinda ve hidi a mi ijime yô.

⁷ Mban kpaa ve hingir mee sha zar u wain man zemba ze zemba sha msôrom ma yuwan; pristi kua profeti ve hingir mee sha msôrom ma yuwan, wain nzughul a ve, ve hingir zemba ze zemba sha msôrom ma yuwan; mpase u sha mnenge kera wanger ve ga, mba nôngon gbev sha ijirôron.

⁸ Gadia utebul cii iv a isho i ndôhôr ishima je, ma ijiir i wang kera ngi ga.

⁹ Ka anti je, i lu un ka tesen nan mfe? Man shi ka anti je i lu un ka pasen nan, nana kar loho u i ôr laa? Ka mba ve de atumba man i kôr ve hen atumba kera laa?

¹⁰ Gadia ka tindi sha tindi, tindi sha tindi, icin i tan sha icin tan, icin i tan sha icin i tan, heen kpeghee, keela kpaa kpeghee.

¹¹ Mimi je! Ka sha ior mba ve er zwa u i kav u ga man sha nombor ugen kposo Una ôr kwagh a ior ne ye;

¹² Un u A kaa a ve er: Ngun ka mmem je ne, na nen u vôron la mmem; man ka ngun man a lu mkunduyol je ye, nahan kpaa ve rumun u ungwan ga.

¹³ Ka nahan man kwaghôron u TER una hingir ve tindi sha tindi, tindi sha tindi, icin i tan sha icin i tan, icin i tan sha icin i tan, heen kpeghee, keela kpaa kpeghee; sha u ve̱ za, ve̱ gba ajimejime, ve̱ sombo, ve̱ gba ken kwaghhônon, i̱ kôr ve.

¹⁴ Nahan yô, ungwa nen kwaghôron u TER, ne mbanahantar mban, ne mba ne hemen ior mba ken Yerusalem!

¹⁵ Gadia ne kaa ner: Se ya ikur a ku, se zua zwa a Sheol, zum u bocan u van sha agee una va karen la, una va hen vese ga; gadia se gema aie hingir se ijiir i yeren, man se yer ayol ase ken icugh je.

¹⁶ Nahan yô, Ter AÔNDO ngu kaan nahan er: Nenge, M tim iwen ken Shion Mer, i̱ lu imagh, iwen i i kar i, iwen i injaa i sha zongo, i imagh ki i, ki lu dông yô; u nan ne jighjigh yô, nan kumbur sha kwagh ga.

¹⁷ Me gema ijirôron ia hingir kor u karen kwagh a mi man perapera una hingir kor u sôron kwagh a mi sha u a̱ lu jighilaa yô; awombo aa kar a ijiir i aiegh i yeren ker la kera, ijiir i waren ker kpaa, mngerem maa kuwa a i kera.

¹⁸ Á bunde ikuryan yen a ku la kera, man mzoughzwa wen a Sheol la una taver ga; zum u bocan u van sha agee la una karen yô, una shoghol ne angahar.

¹⁹ Hanma shighe u una kar cii, una kura ne kera; gadia una kar ayange ayange tugh kua tetan kpaa; u kaven kwagh u i pase la, á lu kwagh u cieryol kpen kpen.

²⁰ Gadia gambe á yina u or nana naregh iyol i nan sha mi; kwagh u cirin iyol kpaa á yina igbanger u or nana cir iyol i nan sha mi.

²¹ Gadia TER Una mough sha er lu vande eren sha uwo u Perashim la nahan, ishima ia nyoon Un er lu vande eren shin pev u Gibeon nahan, sha u eren tom Na, tom u kpilighyol je! man u eren ieren Na--ieren Na i kpiligh iyol tsô!

²² Nahan yô, de hingir nen mbanahantar ga, sha u i̱ de kera nyôôso ikangenev yenev ga yô; gadia m ungwa hen Ter, TER u akum a Sha, kwagh u mtim u i we ishima u eren sha tar cii.

²³ Kegh nen ato, ungwa nen imo Yam, ver nen ato, ungwa nen kwaghôron Wam.

²⁴ Ortsôghol ka nan zer tsôghol gbem sha u lôôn ivoro? Ka nan zer vuul hemben akpen a inyaagh gbeme?

²⁵ Zum u nana vande saren a vaanaa, nan kera hamber nee, man nan ta ishwa, man nan lôô alakema sha nongo nongo man shair hen ijiir i i ver la, man shi agase kpaa sha kpe u u gaa?

²⁶ Gadia Aôndo na ngu pasen un vough, ngu tesen un.

²⁷ Gadia mba shoghol nee sha ikyekye i kpelan inya ga, man shi mba menger ikaver u ikyekye i shoghol iyiav sha ishwa ga, kpa mba gbidi nee sha aga man ishwa kpaa sha ankon.

²⁸ Alakema u eren bredi a mi la or hemben unu? Ei, ka nan zer gbidyen gbem ga; shin er ka nan kar a ikaver u ikyekye kua anyinya sha mi kpaa mba hemben un ga.

²⁹ Kwagh ne kpaa ka hen TER u akum a sha a dugh ye, Un u A lu a mhen u kpilighyol kua kwaghfan u hemban cii la.