Yesaia 27 - ICIGHAN BIBILO

¹ Sha iyange la TER Una ôr Leviatan, iyô i yevese fefa la, ijir, a sanker Na u gendeghee u kehen u taver, kua Leviatan, iyô i hulen nure nu nure la, shi Una wua darakon u a lu shin zegemnger la kpaa.

² Sha iyange la sule u ikon i wain u dedoo ua lu; yô, ter nen u icam.

³ Mo TER, M ngu kuran u; Me urun u hanma shighe; sha u ma or môm nana̱ de vihin u ga yô, Me kuran u tugh kua tetan.

⁴ M yugh je ga; usagher kua usaa ma ve lu ase ihom a Mo! Yô, ma M te sha a ve, ma M nande ve ci ca

⁵ saa vea gbam ikum, vea hime a Mo, vea hime a Mo je.

⁶ Sha ayange a ken hemen la Yakob una wa amise, Iserael una mondo, una denger, una iv tar cii a atam.

⁷ A tsaha ve er yan tsaha mba ve lu tsahan ve la nahana? Shin i wua ve er yan i wua mba ve wua ve la nahana?

⁸ Ka sha u zendan ve nan ve gbenda, U nenge num a ve ye; A kar a ve kera sha ahumbe Na a taver, sha iyange i ahumbe a a dugh sha ityoughkitaregh la.

⁹ Ka sha kwagh ne je man á kough ifer i Yakob kera ye, mkarkera u kwaghbo na la, ka atam a na ne: Una gema awen a atse a nanden nagh sha mi cii, aa hingir er awen a akpena a i hembe a avur avur yô, Asherim kua atse a nanden kwaghhumandoon sha mi vea kera tile sha je ga.

¹⁰ Gadia gar u lun a gir hingir gbilin, ka ijiir i teman i i mough her kera, i undu i er desereti nahan, wanbua una ya toho heregh je, ka her kpaa una yav ye, man una ya agbaa a na.

¹¹ Zum u agbaa a na aa use kera yô, á kever a kera, kasev vea va, vea nande a sha usu; gadia ka ior mba kaven kwagh ga, ka nahan je man Un u A gbe ve la, Una zungwe ve mhôônom ga, Un u A maa ve la, Una tese ve erdoo Na kpaa ga ye.

¹² Sha iyange la TER Una gbidye alakema, hii hen ifi u Uferati zan zan ar hen uwagh u Igipiti, man á sange ne môm môm á kohol ne, ne ônov mba Iserael.

¹³ Sha iyange la, á tôngo zegeikpamkor, tsô mba ve saa ken tar u Ashiria vea va, kua mba i zende ve kera ve yem ken tar u Igipiti la, vea va civir TER sha icighanwo, ken Yerusalem.