Yesaia 24 - ICIGHAN BIBILO

¹ Nenge, TER ngu geman tar hingir gbilin, ngu vihin u kera hingir ice, ngu geman mlu u u, hingir nzughul nzughul, ngu samben mba ve tem sha u kera.

² Tsô er mba ken inya ve lu nahan, kape pristi kpaa una lu la; er kpan a lu nahan, kape ter na kpaa una lu la; er kpankwase a lu nahan, kape ngô na kpaa una lu la; er oryamenkwagh nan lu nahan, kape orteenkwagh kpaa nana lu la; er or u nan injô nan lu nahan, kape or u yan injô kpaa nana lu la; er or u pwaren or inyaregh wan mtsera sha mi nan lu nahan, kape or u kimbin injô hiden a mtsera sha mi kpaa nana lu la.

³ Tar ua hingir gbilin purututu man á sar u purututu kpaa; gadia TER ôr kwagh ne nahan.

⁴ Tar ngu zungwen, ngu usen, tar sha won cii ngu vôron, ngu usen; ashagbaior a ken tar nga uren.

⁵ Tar iyol i u je kpaa u hôngor sha ci u mba ve tem sha u la; gadia ve per atindi, ve wa aeren a sha ba iko ga, ve vihi ikuryan i tsôron.

⁶ Ka nahan man ifan i ker tar, man mba ve tem sha u kpaa ve lu yan ican sha ibo ve ye; ka nahan man i nande mba ve tem sha tar kera, ior ve shi her kpeghee ye.

⁷ Wain u he ngu zungwen, kon u wain ngu usen, mba i saan ve iyol cii mba shirin ishima;

⁸ iember i agbande a kuhwan huan, ayôôso a mba ve lu gur gur kpaa bee cii, iember i molo kpaa huan.

⁹ Mba kera me wain a icam zwa ga; msôrom ma taver ma vihi mbaman ken zwa.

¹⁰ Gar u lun nzughul nzughul, i yôhôl un kera; i wuhe hanma iyou, sha u ma or môm nana̱ de nyer ker ga yô.

¹¹ Mliam ma sha igbenda sha ci u wain; msaanyol cii gema wa ime, iember kar shin tar kera.

¹² Kwagh u a mase shin ken gar yô, ka di alôgh tsô, i hembe hundagar vughô vughô.

¹³ Gadia kape á va lu shin tar hen akuraior je la, er mndoor u kon u olev nahan man er twaryaren u atam a ikon i wain zum u i bee sunda kera yô.

¹⁴ Mba genger imo ember gur gur; sha ci u icivir i TER i hemban la, mba genger imo hen vegher u shin zegemnger.

¹⁵ Nahan yô, civir nen TER sha vegher u sha iwanger la; sha ityar i hen kpe u zegemnger, civir nen iti i TER, Aôndo u Iserael.

¹⁶ Hii shin ikighir i tar je, se ungwa atsam er: I̱ wuese orperapera. Kpa mo m kaa mer: M ngu saan, kwagh tserem ve! Mbaatsereghev mba eren kwagh sha atseregh, een ka sha atseregh mbaatsereghev ve eren kwagh ye.

¹⁷ Mciem man ihungwa i hônon kua to vea bur u, we, u u tem shin tar ne!

¹⁸ Or u nan yevese iov i mcie, nana gba shin ihungwa i hônon, man shi or u nan dugh shin atô u ihungwa i hônon la, nana gba ken to; gadia i bugh ahura a Sha, man amagh a taregh kpaa tenger.

¹⁹ Tar yôhôl puru, tar hembe avur avur, tar tenger cii.

²⁰ Tar hingir zemba ze zemba er orhundenmsôrom nahan, ngu tenger er daarkura yô; tindi u peren u u yuhwa sha u, ua gba, mayange ua kera mough ga.

²¹ Tsô sha iyange la, TER Una tsaha akum a Sha a a lu Sha la, kua utor mba tarev mba shin tar kpaa.

²² Á kohol ve ijiir i môm er ka i kohol mbakwarev shin ihungwa i zan kweng nahan, á wuhe ve ken gaadi, ayange á karen kpishi yô, á va tsaha ve.

²³ Zum la kunya ua kôr uwer, ua hingir nyian, iyange kpaa kunya ua kôr i; gadia TER u akum a Sha Una tema tor sha uwo u Shion kua ken Yerusalem kpaa, man sha ishigh ki mbatamen Nav yô, iengem ia lu.