Yesaia 23 - ICIGHAN BIBILO

¹ Mkaanem ma Aôndo sha Tiru. Gbire nen ivaa ne utso mba Tarshishi, gadia i tim un kera, zan zan ma ya kera shi ga, ma gbenda u nyôron ker kpaa ngu ga; hii hen tar u Kitim je, i pase ve nahan.

² I̱ kondo ne iyol, ne mba ne tem hen kpe u zegemnger; mbakasuav mba Shidon mba ve peren zegemnger la, ve iv u a akaa.

³ Sha uzegembamngerev i va a ivor i Shihor, ka iyiav mbi Nil, i nyôr a mi ken na, a gema a hingir kasua u akuraior je.

⁴ Kunya u̱ kôr u, we Shidon, gadia zegemnger ôr kwagh, garutya u zegemnger ngu kaan er: M ya ican sha iyav mbu toghol ga, m mar ga, m koso mbayevikaior ga, shi m yese anuunaukase kpaa ga.

⁵ Zum u Igipiti za ungwa abaver yô, cier ve iyol je, sha ci u abaver a sha Tiru la.

⁶ Per, za hen Tarshishi; gbire nen vaa, ne mba ne tem hen kpe u zegemnger!

⁷ Ka gar wen u ember yagh yagh je ne, u mhii na a lu ngise je, u angahar a na lu zan a na ca sha u za tsan ken ityar igen ne?

⁸ Ka an nan we kwagh ishima a Tiru nahana, un u lu kôron ior tor, u mbakasuav nav lu ashagbaior, u mbayamen kasua a na lu mbaciviriv mba sha wono?

⁹ TER u akum a Sha, ka Un A we ishima sha u vihin iyolgengese i icivir la cii, sha u heen mbaciviriv mba sha won cii ye.

¹⁰ Samber ken tar wou er ifi u Nil nahan, we wankwase u Tarshishi, ma kwagh u tsulen we kera ngu hegen ga.

¹¹ A naregh uwegh Nagh sha zegemnger, A tenger ityartor; TER na zwa sha Kanaan er i̱ tim agarautya a na kera.

¹² Man shi A kaa er: Á kera lu u iyol yagh yagh mayange ga, we iniunkwase i i nzughul a we ne, wankwase u Shidon; mough sha, per za ken Kitim, keela kpaa ú za zua a mmem ga.

¹³ Nenge, tar u Mbakaldi--ikurior i i kera lu ga ne; Ashiria ver u sha ci u inyamtoho i ken ikôngo; ve maa ugôgômbaayoughouv vev mba taven, ve yôhôl ayou a utor a u, ve gema a mi hingir atihi a alôgh.

¹⁴ Gbire nen ivaa, ne utso mba Tarshishi, gadia garutya wen i tim un kera.

¹⁵ Tsô, sha iyange la yô, á hungul Tiru zan zan á kuma anyom akunduatargber je, á kuma sha ayange a tor môm; sha mkur u anyom akunduatargber la yô, á hingir Tiru er i kaa ken icam i idyakwase nahan:

¹⁶ Tôô molo, kuhwa, zende ken gar, uwe, idyakwase u i hungul we ne; kuhwa, imo i̱ due dedoo, wa atsam kpishi, i̱ umbur we.

¹⁷ Ken masejime u anyom akunduatargber á kar kera la yô, TER Una va sôr Tiru, nahan una hide sha tom na u sha tôndo, una er idya a ityartor i sha won cii i i lu sha tar yô;

¹⁸ mtsera u sha kasua na kua injar na la, á lu TER icighankwagh; á ombo ki ga, á koso ki kpaa ga; gadia mtsera u kasua na una lu sha ci u mba ve tem sha ishigh ki TER yô, sha u ve̱ ya, i̱ kuma ve, man sha ci u akondo a doon ashe.