Yesaia 22 - ICIGHAN BIBILO

¹ Mkaanem ma Aôndo sha pev u Mpase la. Ka nyi i er u, man we a ior ou cii, ne undu sha ityouv mbi ayoughouv nahana?

² We, u ikenge i genger genger i mgbough ker a we ne, gar u ngeen a ayôôso, gar u iember! Mba i woo ve ken a we la, ka sha sanker i woo ve ga, man shi ka ken utya ve kpe kpaa ga.

³ Mbahemenev ou cii yevese imôngo, ve lu a mbaada ga, i kange ve a kange; ior ou mba i kohol ve cii, i kange ve nongo, ve yevese ve yem ca je.

⁴ Ka nahan man m kaa mer: Tôô ashe sha a mo kera, m vaa mliam ma vihin tsung; de nenge u surun mo ishima sha mtim u wankwase u ior av ga.

⁵ Gadia ka iyange i ayôôso je, man i ndyaren shin angahar man i mnzughul i Ter, TER u akum a Sha A ne shin pev u Mpase ne; ka mhembe u i hembe ugilmbaagarev man amo a genger yilan iwo.

⁶ Elam yô, tôô gbandeavaan a akekeautya man mbautyav kua mbaanyinyav; Kir kpaa bugh perutya.

⁷ Apev a ou a hemban doon la mgbough a akekeautya, mbaanyinyav kpaa tange ityav hen hundagar.

⁸ A bugh Yuda kwaghyisan na kera. Tsô sha iyange la ú gema ashe ú nenge ikav mbi tswamev ken Iyou i Ikô.

⁹ Ne nenge ajiir a tsehen a sha gar u Davidi la, er a ngee; ne kohol mngerem ma shin Ityungu u Shin la ijiir i môm.

¹⁰ Ne ôr iyenge i ayou a Yerusalem, ne hembe ayou sha u taver gilgar a mi;

¹¹ ne time ijiir i ombon mngerem her atô u ugilgar uhar sha ci u mngerem ma Ityungu u Tse la; kpa ne ver ishima sha Un u A er kwagh ne ga, man Un u A ver kwagh ne ngise ngise la kpaa, ne wa Un iko ga.

¹² Sha iyange la, Ter, TER u akum a Sha, yila kaa er, i̱ vaa, i̱ zungwe, i̱ hondo ityough, shi i̱ ta ikondo uya;

¹³ kpa nenge ase, msaanyol ngu kua iember; mba sôngon abua, mba wuan iyôngo, mba yan inyam man mba man wain; sé gbaa yan nen akaa man akaa tsô, gadia kper se mba kpen.

¹⁴ TER u akum a Sha A pase iyol Na sha ato am er: Mimi je, á paa ne sha ibo ne ga zan zan né kar kpen, kape Ter A kaa ne, TER u akum a Sha.

¹⁵ Ter, TER u akum a Sha ngu kaan nahan er: Za ase hen orvesen shon, ka hen Shebena, u a nengen sha ya u tor la, kaa wer:

¹⁶ Ka nyi u eren heene? Man ka an u lu a nan heene, je u tim uwar hen ijiir nee? We u u time uwar sha ci wou iyol you sha, man u time ijiir i teman sha ci wou iyol you ken vande ne!

¹⁷ Nenge, TER Una ta u kera sha agee, we, or ne, Una hule u gbang gbang,

¹⁸ Una hule u, Una ta u kera er bol nahan ken tar u gbanger; heera yô, ú kpe, keela kpaa, akeke a ou a imanger you la aa lu; uwe, kunya u ya u teru!

¹⁹ Me dugh u ken tom wou kera, man shi sha ijiir you la kpaa á tule u kera.

²⁰ Tsô, sha iyange la, Me yila wanakiriki wam Eliakim wan u Hilkia,

²¹ Me haa un riga wou, Me zer un kwange wou kpaa, shi Me wa un tahav ou sha ikev; una hingir ter u mba ve tem ken Yerusalem kua sha ya u Yuda kpaa.

²² Me gema ishindan i ya u Davidi Me penda un sha avande na, una bugh man orwuhen nana lu ga, una wuhe man orbughun kpaa nana lu ga.

²³ Me mande un er kusa nahan hen ijiir i tiaver; una hingir ya u ter na ijiir i teman i icivirigh;

²⁴ á har myohom ma ya u ter na cii sha a na, uiceren kua agbaa, hanma anikav u kiriki, hii sha utasa zan zan ar sha mbaagu cii.

²⁵ Sha iyange la, kape TER u akum a Sha A kaa la, kusa u i mande un hen ijiir i tiaver la una tsuwa, á gber un kera, una gba, ikav mbi i har sha mi cii á saa ishe; gadia TER kaa nahan.