Yesaia 20 - ICIGHAN BIBILO

¹ Inyom i Tartan za va hen Ashedodi la, shighe u Sargon tor u Ashiria tindi un la, man a nôngo ityav a Ashedodi a hemba un je,

² hen shighe la TER ôr kwagh sha ikev i Yesaia wan u Amoshi, kaa er: Za, za sagh ikondo i aivegh shin iwenge you kera man shi tsuwa akôv a ou shin angahar kpaa. Tsô a er nahan, a gba zenden idyelegh, a akôvangahar kpaa ga.

³ Tsô TER kaa er: Er wanakiriki Wam Yesaia a lu zenden idyelegh anyom atar, a akôvangahar kpaa ga yô, sha u i̱ lu ivande man ikav sha kwagh u Igipiti man sha kwagh u Kushi yô,

⁴ kape tor u Ashiria una yem a mbakwarev mba Igipiti man Mbakushi mba i zende ve ken tar ve kera la, mbayevikaior kua mbatamen, idyelegh a akôv kpaa ga, man asenatôôgh a ve ken won; kape kunya ua kôr Igipiti je la.

⁵ Á kondo ve iyol, vea va ahenge sha ci u Kushi u ve suur min la, man Igipiti ihagh ve la.

⁶ Sha iyange la mbateman ken tar u hen kpe u zegemnger ne, vea kaa er: Nenge ase, kape ishuur wase a lu ne, henpe se yevese se za ker iwasen sha u sé war sha ikev i tor u Ashiria yô; nahan yô, se er nan man sé wara?