Yesaia 19 - ICIGHAN BIBILO

¹ Mkaanem ma Aôndo sha Igipiti. Nenge, TER tema sha ibeenegh ki zenden fefa, ngu van hen Igipiti; akombo a Igipiti aa gbidye akarkase iyol sha ishigh Nagh, ishima i Igipiti kpaa ia sough ken vanger na.

² Me tor Mbaigipiti ityô, Mer ve̱ ta num sha Mbaigipiti; vea nôngo ityav hanma or a anngô u nan man hanma or a or u wan ndor a nan, gar a gar man tartor a tartor.

³ Jijingi u Igipiti una vôr ken vanger. Me vihi awashima na kera, una hingir gbilin; vea hen kwagh a akombo man a mbayangenakombo man a ujijingi mba mbakpenev kua ujijingi mba tsengan pasen akaa.

⁴ Me gema Mbaigipiti Me na ve sha ikev i ter u wan tswam, tor ugen u nyoon ishima una tema tor sha a ve, kape Ter A kaa la, TER u akum a Sha.

⁵ Mngerem maa uma ken zegemnger, ifi una uma, una gba ikpegheregh.

⁶ Iwagh kpaa ia huma, mbaakpambamngerev mba Igipiti vea panden a pande mngerem vea uma, ikenaika man ilyôgh vea use.

⁷ Ijande hen ifi u Nil, hen kpe u Nil, man akaa a lôôn hen Nil cii, aa uma, ahumbe aa kar a mi sha.

⁸ Mbakôronishu vea vaa vea zungwe kua mbahaan tsuwe shin ifi u Nil la cii kpaa; man mbasamber ukper sha mnger vea ure.

⁹ Mbaeren tom u saghen ada, kunya ua kôr ve, kua mbatumen akondo a pupuu la kpaa.

¹⁰ Mtôm nam ma suur sha mi la, á hembe ma avur avur, man mbaerentom sha tôndo cii, asema aa vihi ve.

¹¹ Atiator a Soan ka ior mba lanen kwagh dedoo je; mhen u mbahenen kwagh a Farao mba ve hembe fan la, hingir ibumegh dang. Hii nan man ne kaan a Farao ner: Mo m ngu wan u mbafankwagh, wan u utor mba tsuaa je, nahana?

¹² Nahan mbafankwagh ou mbala mba hana? De ase, ve̱ pase u hegen, i̱ fa kwagh u TER u akum a Sha A we ishima u eren Igipiti yô.

¹³ Atiator a Soan hingir abumeaior, utor mba Nofi kpaa i tsugh ve; ve mba ve lu iwen sha zongo i uipaven nav, la, ve na Igipiti tsume.

¹⁴ TER haa jijingi u tumbuluu sha a ve; ve na Igipiti tsume sha ityom na cii er orhundenmsôrom ka nan zenden ze ze ze sha isho i nan nahan.

¹⁵ Mayange á shi Igipiti a ma tom ga, u ityough shin tsa, shin ndaregh ku ivilegh shin ikenaika, vea er ga.

¹⁶ Sha iyange la Mbaigipiti vea hingir er kasev nahan, vea gbidye akarkase iyol, vea cia kpaa, sha ci u mkundu u uwegh ku TER u akum a Sha ku A kundu sha a ve la.

¹⁷ Tar u Yuda ua hingir Mbaigipiti kwagh u cieryol, or nana ter ve kwagh u u yô, vea cia, sha ci u awashima u TER u akum a Sha A we sha a ve la.

¹⁸ Sha iyange la agar ataan aa lu ken tar u Igipiti a a er kwagh sha zwa u Kanaan, man aa bumun TER u akum a Sha, ugen ken a á yila un er: Gar u mtim.

¹⁹ Sha iyange la atse a TER a nanden nagh sha mi aa lu ken atô u tar u Igipiti, man iwen i i tim i sha, sha u umbur TER ia lu sha ikighir i u.

²⁰ Á hingir ikav kua shiada u TER u akum a Sha ken tar u Igipiti; shighe u vea vaa a TER sha ci u mba ve kighir ve a ican la yô, Una tindi ve a oryiman man orageegh u nana yima ve yô.

²¹ TER una pase iyol Na hen Igipiti, man Mbaigipiti vea fa TER sha iyange la; een, vea civir Un sha nagh ku sôngon kua iwua kpaa, vea tsegha zwa a TER, vea er sha mi kpaa.

²² TER Una tsaha Igipiti, una tsaha man Una shi á sôr; tsô vea gema asema vea hide hen TER; Un kpaa, Una rumun msen ve, man Una sôr ve.

²³ Sha iyange la kômgbenda una due ken Igipiti u zan Ashiria; Orashiria nana nyôr ken Igipiti man Origipiti kpaa nana nyôr ken Ashiria; Mbaigipiti vea civir Aôndo a Mbaashiria imôngo.

²⁴ Sha iyange la Iserael una lu u sha utar a Igipiti man Ashiria imôngo, vea lu iveren i dedoo hen atô u tar cii;

²⁵ gadia TER u akum a Sha ver ve, kaa er: I̱ ver ior Av Igipiti doo doo man tom u ave Am Ashiria kua dyako Wam Iserael.