Yesaia 18 - ICIGHAN BIBILO

¹ Ehee! Tar u uvan akper u u lu yande uifi mba Kushi la,

² u ka u tindi mbatyomov sha zegemnger, sha utso mba ikenaika sha mnger, er: Yem nen, ne mbatyomov mba zenden fefa, za nen hen ikurior i taven i kôngor iyol, hen ior i i cier ior iyol, mba ikua ikua man mba ken ica kpaa, ikurior i taver agee man i ndyaren ior, i uifi pav tar ve la.

³ Ne mba ne tem sha won cii, man ne mba ne tem sha tar kpaa, zum u á kende tuta sha, sha iwo yô, nenge nen, man zum u á tôngo korough kpaa, ungwa nen!

⁴ Gadia TER kaa a mo nahan er: Me lu ving, Me kenger ken ijiir Yam i teman, er mtsee u war war sha mte u iyange, er ibeenegh ki irkpiigh ken mtsee u sha shighe u sundan iyiagh yô.

⁵ Gadia er sunda lu a kuma ga la, zum u uikparen ndoor kera man imondon á hingir ityamegh ki wain ki vian yô, Una paa agbaa sha ahô a sôron ikon, uiceren kpaa Una asegh ve kera.

⁶ Á gema ve imôngo cii, vea hingir kwagh u inyontswam i sha iwo, man u inyamtoho i sha tar; inyontswam ia ya ve inyom man inyamtoho sha tar cii ia ya ve fam.

⁷ Hen shighe la je, á za va TER u akum a Sha a iwua ken ikurior i taven i kôngor iyol, ken ior i i cier ior iyol, mba ikua ikua man mba ken ica kpaa, ikurior i taver agee man i ndyaren ior, i uifi pav tar ve la, á va a mi hen ijiir i iti i TER u akum a Sha, ka hen uwo u Shion je la.