Yesaia 16 - ICIGHAN BIBILO

¹ Tindi nen aniyôngov sha ci u tor u tar la, i̱ mough a mi hen Sela i̱ kar a mi sha gbenda u ken taaikôngo, i̱ yem a mi sha uwo u wankwase u Shion.

² Er inyon i i purugh wue wue, man shi er iya i i sough i nahan, kape ônkasev mba Moabi ve lu hen ahongo a Arnon la.

³ Wase henen, kure ijir sha mi vough, na mure wou a̱ hingir er tugh nahan shighe u iyange i kom sha tembe la; yer mba i num ve kera la; de pasen u a yevese la ken igbar ga.

⁴ De mba i num ve kera la, ve̱ tema a we imôngo, gema hingir Moabi ijiir i yeren ortimin; gayô zum u orkighir nana kera lu ga yô, mtim una bee man mbandyaren ior shin angahar vea bee shin tar kera yô,

⁵ zum la á tar ikônough ki torough sha erdoo man orgen nana tema sha mi sha jighjigh, ken tenti u Davidi, u nana ôr ijir, nana keren mimi man nana eren kwagh sha perapera fefa je.

⁶ Se ungwa agwa u iyolgengese i Moabi, a gengese iyol tsung je, man imanger na man iyolgengese na man icihi na; ihagh na i kaan ka gbilinkwagh je.

⁷ Ka nahan man Moabi una vaa Moabi, hanma or nana vaa; azen a atam a wain a ombor a Kir-hareseti la, nea zungwe a, á kondo ne iyol gbong.

⁸ Gadia ishule i ikon i wain i Heshebon i use kua kon u wain u Shibema; utor mba akuraior gber agbaa a na a a ar hen Yaser, a zende hulugh hulugh a za nyôr ken desereti la; agbaa a u samber zan zan a per zegemnger.

⁹ Ka nahan man me haa mliam a mliam ma Yaser imôngo ye, me vaa kon u wain u Shibema, me ur u sha mliam am, we, Heshebon man Eleale, gadia vaautya ger sha shighe u kohol atam a ou la, kua sha sunda wou kpaa.

¹⁰ I tôô iember kua msaanyol ken sule u ikon i umen atam kera; ken ishule i wain á ungwa atsam a wan ker ga, man ikenge i iember kpaa ga, ma or u shoghol nana kera shoghol wain la ga, m-erikenge u iember la, i kure.

¹¹ Ka nahan man myam am ma eren imo er adiguve nahan sha ci u Moabi kua ishima yam kpaa sha ci u Kir-hereshi ye.

¹² Tsô zum u Moabi va man a vôr iyol na sha ijiir i taven sha yô, man a nyôr ken icighanjiir na sha u eren msen kpaa yô, una fa ma kwagh ityô ga.

¹³ Ka kwagh u TER ôr sha Moabi sha ayange a tsuaa je ne.

¹⁴ Kpa hegen yô, TER ôr kwagh kaa er: Er anyom atar, sha inja i anyom a or eren tom sha tôndo nahan, a lu a kuma ga je tsô á gema icivir i Moabi ia hingir kwagh u lahan a ior nav mba ve ngee la cii; asande a na a a shi her la aa hingir hicu, aa kuma kwagh ga.