Yesaia 15 - ICIGHAN BIBILO

¹ Mkaanem ma Aôndo sha Moabi. Ka ken tugh môm tsô, i tim Ar u Moabi kera a saa ishe ye; ka ken tugh môm tsô, i tim Kir u Moabi kera a saa ishe ye.

² Wankwase u Dibon kôndo sha ajiir a taven sha, sha u za vaan; Moabi ngu vaan sha Nebo kua sha Medeba; ityouv vev cii kpul, hanma indyer cii kpaa i hondo i kera.

³ Mba tan mzemba uya sha akômaigbinda ve; mba sha ihaav vev man sha ityembe ve kpaa, hanma or ngu vaan haan mliam tsung.

⁴ Heshebon kua Eleale ve ger mliam, mba ungwan imo ve zan zan za ar hen Yahashi je; ka nahan man mbautyav mba Moabi ve gbidye vaa genger genger ye, ishima ngi tenger un ker.

⁵ Ishima yam ngi vaan sha ci u Moabi; ior nav mba yevese, ve za ar hen Soar, hen Egelati-shelishiya, gadia gbenda u kôndo sha Luhiti la, mba kôndon u a mliam zwa je; man sha gbenda u zan sha Horonaim la kpaa mba geren mliam gbidyen vaa.

⁶ Gadia mngerem ma Nimerim ma saa ishe; toho uma, akaa a hômon kpaa use; ma kwagh u ndor kera ngu ga.

⁷ Nahan kwagh u ve zough a mi i ngee i gande la, man kwagh u ve koso kera la, vea kura, vea per a mi hen Uwagh u ikon i wilou.

⁸ Vaa u gbidyen kase tar u Moabi cii, mliam nam ar hen Egelaim, mliam nam ar hen Beer-elim.

⁹ Gadia awambe iv shin mngerem ma Dimon; nahan kpaa Me shi Me seer Dimon ican, Me va a begha hen Mbamoabi mba ve wer mbala, man hen asande a a shi ken tar la.