Yesaia 12 - ICIGHAN BIBILO

¹ Sha iyange la ú kaa wer: Me wuese We, TERE, gadia shin er U yugh a mo, nahan kpaa iyugh You kar kera, man U ngu surun mo ishima.

² Nenge, ka Aôndo A lu myom wam ye; me suur sha a Na me cia ga; gadia TER AÔNDO ka agee am kua icam yam man shi A hingir myom wam kpaa.

³ Nahan yô, ka sha iember je né tsugh mngerem shin azôr a myom ye.

⁴ Sha iyange la kpaa nea kaa ner: Wuese nen TER, yila nen sha iti Na, pase nen ityom Na hen ior, ter nen Un er i kende a iti Na sha yô.

⁵ Wa nen TER icam, gadia A er akaa a doon a hemban cii; kwagh ne a̱ hingir ken igbar sha tar cii.

⁶ Genger imo, er ikenge, we u u tem ken Shion ne, gadia Icighan u Iserael u A tem hen atô wou ka u hemban cii je.