Yesaia 1 - ICIGHAN BIBILO

¹ Mpase u Yesaia wan u Amoshi, u a nenge sha kwagh u Yuda kua Yerusalem, sha ayange a Ushia man Yotam man Ahashi kua Hisekia, utor mba Mbayuda.

² Ungwa nen, ne Usha; ver ato we tar kpaa, gadia TER ôr kwagh er: M koso ônov, m yese ve, kpa ve je, ve gema ve hingir iyongo a Mo.

³ Bua fa or na, jaki kpaa fa kpese u ter u i, kpa Iserael yô, fa ga, ior Av mba henen kwagh ken ishima ga.

⁴ Kwagh á tser ne! Ne ikurior i eren kwaghbo, Ne ior mba ne lu a iferkwagh i yuhwan ne, ne tsombor u mbaaferev, ne ônov mba eren dang! Ve undu TER, ve laha Icighan u Iserael, ve pav a Na, ve hile ijime.

⁵ Ka nyi shi i lu ne pe i̱ seer gbidyen ne, er ne taver ishima u undun gbenda? Ityough cii gba angev, kua ishima cii kpaa ure.

⁶ Hii shin akevangahar zan zan ar sha ityo je, ijiir i dedoo ngi ga, saa agbir man atange, man avav a kô, i kam a ga, ikange a kpaa ga, i leghem a sha mkure kpaa ga.

⁷ Tar wen hingir toho; agar a en, i nande a sha usu; ishule yen kpaa, ior mba tar ugen mba yan i sha ishigh yenegh je; i hingir toho, bee er ior mba tar ugen ve vihi u kera cii nahan.

⁸ Man i undu wankwase u Shion er ka ityumbe i ken sule u wain yô, man shi er daarkura u ken sule yô, man shi er gar u ityav mbi kase un mbi tser yô.

⁹ Aluer TER u akum a Sha Una shi se asande ciôn her ga yô, ma se hingir er Sodom nahan, shi ma se hingir er Gomora nahan.

¹⁰ Ungwa nen kwaghôron u TER, ne mbavesen mba Sodom; ver nen ato sha ityesen i Aôndo wase, ne ior i Gomora!

¹¹ Ka nyi i gbem a iniav yenev mbi sôngon kpishi laa? kape TER A pin la. Iniav mbi nanden mbi sha anomaiyôngo, man ahôm a uicighanmbaabuav duem ishima; awambe a abua man a agumaiyôngo kua a ukpev kpaa, kera doom ga.

¹² Shighe u ka nea vaan sha ishigh Yagh yô, ka an nan ker kwagh ne her a ven er ne̱ va ne̱ va ndyar ityembe Yam dang dang nahana?

¹³ Mayange shi de kera vaan nen a iniav sha lanshima ga; kwaghhumandoon kpaa kam kwagh u hôngorough je; uwer u he man iyange i memen, kua mlehe u sha mbamkohol kpaa— M kera fatyô u rumun iferkwagh a mkohol u iniongo imôngo ga.

¹⁴ Iwer yen i he man uiniongo enev mba sha ashighe ashighe la ve duem ishima, nyôrom iyol a mi, iyol kpem u wan ishima a mi.

¹⁵ Zum u ka nea naregh ave a en yô, M gema M yer ne ishigh Yagh kera; zum u ne seer a seer eren mbamsen kpishi kpaa, M ver ato ga; ave a en iv a awambe.

¹⁶ Ôô nen ayol, wanger nen ayol a en; kar nen a ifer i aeren a en sha ishigh Yagh kera; de nen akaabo a eren;

¹⁷ hen nen u eren kwagh u dedoo; ker nen kwagh u jighilii, yange nen ipilaor; er nen a ancôgholov dedoo, ôr nen ijir i kwasecôghol, wase nan.

¹⁸ Va nen ase, sé hen nen kwagh imôngo, kape TER A kaa ne; shin er asorabo a en a nyian bong, nahan kpaa aa kungu er awombo nahan; shin er a nyian er kpagh nahan kpaa aa kungu er mou nahan.

¹⁹ Aluer nea rumun nea ver ato yô, né ya mdoom ma tar la;

²⁰ kpa aluer nea venda, nea hendan kpaa yô, á wua ne sha sanker; gadia kape zwa u TER u kaa la.

²¹ Er nan man gar u mimi a hingir idyakwase nahana, wen u a mgbough a mimi la! Perapera yan lu ker a na, kpa hegen yô, mase kan mbawuanior tseegh ve lu ker ye.

²² Azurfa wou iyôgh ki mimi ga nungwa sha mi; wain wou kpaa i nungwa mngerem sha mi.

²³ Atiator a ou ka mbaahendanev, akar a mbanumungbenda; hanmô ve nan soo inyaregh ki yamen ishô a mi, mba keren injar; mba er ijir i kuran ancôgholov ga, mba we kasev mba côgholov iko sha ijir kpaa ga.

²⁴ Ka nahan man Ter, TER u akum a Sha, Uageegh u Iserael A kaa er: Ata! Me yôhôl ishima Yam sha mbaahendanev Av, Me or iyev sha mbaihomov Av;

²⁵ Me kende uwegh Agh sha a we, Me wanger atsaase a ou kera er sha mtse nahan, me dugh iyôgh you ki mimi ga la kera cii;

²⁶ Me hide a mbaajiriv ou her, er tsuaa nahan, man mbawasentor kpaa er sha hiihii nahan; ken masetyô, á yilan we er, gar u perapera, gar u mimi.

²⁷ Á yima Shion sha ijirôron i mimi, kua mba ve gem ishima ken a na kpaa, á yima ve sha perapera.

²⁸ Kpa mtim u mbaperenatindi kua u mbaasorabo una va shighe môm, man mba ve undu TER kpaa, á tim ve kera.

²⁹ Gadia kunya ua kôr ne a ikon i terebin i i sar ne la, nea va ahenge kpaa, sha ci u ishule i ikon i ne tsough i la.

³⁰ Gadia nea hingir er kon u terebin u ikya na i use yô, man er sule u ikon u mngerem ma lu ker yô.

³¹ Or u ageegh kpaa nana hingir er vuwe ada nahan, tom u nan kpaa ua lu er amaramausu nahan, ve uhar cii vea hia imôngo, ma or u pirin nana lu ga.