Yeremia 9 - ICIGHAN BIBILO

¹ Ityough yagh ma ki lu ase mngerem man ishe yam kpaa ma i lu ase imbor i mlia, ma m vaa tugh kua tetan sha ci u mba i woo ve ken wankwase u ior av la!

² Ma m lu ase a ijiir i tsan ker ken taaikôngo, i i ver sha ci u mbakaren gbenda, ma m pav a ior av, ma m undu ve! Gadia ve cii ka udyambaiorov je, ikumior i lun a jighjigh ga.

³ Ka ve henda nombor ve er ka ada u aiegh nahan, ve taver hen tar la, kpa lu sha mimi ga, gadia mba zan hemen hemen sha ifer, kpa Mo yô, ve kera fam ga, kape TER A kaa ne.

⁴ Hanma or nana̱ er teghelee sha huror u nan, de kera suur sha ma anmgbian ga, gadia hanma huror nan zenden anger.

⁵ Hanma or ka nan tsugh huror u nan, mba er kwagh sha mimi ga; ve tese nombor ve u eren aie, ve er dang je ve vôr a mi.

⁶ Ya wou ngu ken atô u icugh, sha ci u icugh ve yô, ve venda u fan Mo, kape TER A kaa ne.

⁷ Nahan yô, TER u akum a Sha ngu kaan nahan er: Nenge, Me sough ve, Me kar ve; gadia Me er nana ase, sha ci u wankwase u ior Ava?

⁸ Nombor ve ka ivaan je, i van a ku, ngu er icugh, or ka nan ôr kwagh u bem sha zwa a or u nan wa ndor a nan, kpa ken ishima i nan yô, nan lu dughun nev.

⁹ Nahan Me kera or ve iyev sha ci u akaa ne gaa, kape TER A pin ne, Me kera or imbaikurior ne iyev gaa?

¹⁰ Me gber kwelegh sha ci u iwo, man sha ci u ajiir a ilev yan toho ken taaikôngo la, Me zungwe; gadia i nande a, a hia je ma or fatyô u karen her ga; man i kera ungwa mliam ma uile ga, inyon i purugh sha kua ishôso i ken toho cii nyôngoso, yem kera.

¹¹ Me gema Yerusalem una hingir atihi a alôgh ijiir i tsan i ugbaseela; Me gema agar a Yuda á hingir atse, ma or nana kera tema ken a ga.

¹² Ka anti je nan lu orfankwagh u nana kav kwagh nee? Wen u zwa u TER u er kwagh a nan sha u nana pase kwagh nee? Ka sha ci u nyi man tar u saa ishe, u hie er taaikôngo nahan je or kera karen ken u ga?

¹³ TER gema kaa er: Ka sha ci u ve gbihi tindi Wam u M ver sha ishigh vegh la kera, man ve wa imo Yam iko ga, shi ve zende sha i kpaa ga;

¹⁴ kpa ve zende sha asema ve a cighir, ve dondo Ubaal, er uter vev lu tesen ve yô.

¹⁵ Nahan yô, TER u akum a Sha, Aôndo u Iserael ngu kaan nahan er: Nenge, Me koso ior mban sha kon u yuwan, man Me na ve mngerem ma meghem ve̱ ma.

¹⁶ Me tsenda ve ken akuraior, a uter vev kua ve kpaa ve fe a ga yô; shi Me tindi sanker una dondo ve ijime, zan zan Me tim ve.

¹⁷ TER u akum a Sha ngu kaan nahan er: Ver nen ishima, yila nen kasev mba vaan ku, ve̱ va; tindi nen, i̱ za yila kasev mba hemban fan kwagh ve̱ va;

¹⁸ ve̱ er fefa, ve̱ va gber kwelegh sha ci wase, sha u ashe ase a̱ haa mliam, akurashee kpaa a̱ ndoor mliam ga ga ga.

¹⁹ Gadia i ungwa imo i mlia je ken Shion: U wuu, i tim se kera! Se va ahenge kpishi, sha ci u se undu tar ne, sha ci u ve hembe uya asev kera yô.

²⁰ Nahan ne kasev ungwa nen kwaghôron u TER, ato en a̱ ngohol mkaanem ma sha zwa Na, tese nen ônkasev enev u gberen kwelegh, man hanmô nana̱ gema nana̱ tese di ugen icam i mzungu ne:

²¹ Gadia ku unde sha uwindou asev, u nyôr sha ayou a utor asev, sha u wuan mbayev sha igbenda, man mbayevikaior sha ityembe.

²² Ôr kwagh kaa wer: TER ngu kaan nahan er: Akom a ior aa gba er ihôghonov mbi sôron sule a min shin inya nahan, man er atihi a uyia ken ijime i orsundan nahan, man or á kera kura a kpaa ga.

²³ TER ngu kaan nahan er: Orfankwagh a̱ de te ihagh sha kwaghfan u nan ga, orageegh kpaa a̱ de te ihagh sha agee a nan ga, ornyar kpaa a̱ de te ihagh sha inyaregh ki nan ga;

²⁴ kpa u i sar nan ka tan ihagh yô, nana̱ ta ihagh sha kwagh ne, er nan kav man shi nan fam, er Mo M lu TER u eren dedoo, u ôron ijir sha mimi man u eren perapera sha tar, gadia ka akaa ne a doom ye, kape TER A kaa ne.

²⁵ Nenge, ayange nga van, kape TER A kaa ne, a Me tsaha mbala mba i tsenge ve, kpa ve tsenge ishima ga la;

²⁶ ka Igipiti man Yuda man Edom man Mbaamon man Moabi, kua mba ve hondon a-ase cii, mba ve tem ken desereti la; gadia akuraior ne cii tsôngo ga, man ya u Iserael cii kpaa ve tsôngo asema ga.