Yeremia 7 - ICIGHAN BIBILO

¹ Kwaghôron ne due hen TER, va hen Yeremia, er:

² Tile hen hunda u iyou i TER, yôô kwaghôron ne her, kaa wer: Ungwa nen kwaghôron u TER, ne mba ken Yuda cii, mba ve nyer sha ihinda ne sha u za civir TER yô.

³ TER u akum a Sha, Aôndo u Iserael, ngu kaan nahan er: Sôr nen igbenda yen kua aeren a en, nahan Me na, né tema hen ijiir ne.

⁴ De suur nen sha kwaghôron u aiegh ner: Tempel u TER, tempel u TER, ka tempel u TER je ne! ga.

⁵ Gadia aluer nea sôr igbenda yen kua aeren a en wang yô, man aluer nea ôron ijir sha mimi a hanma or yô;

⁶ aluer nea eren shiror, man ancôghol kua kwasecôghol ican ga, man nea haa awambe a or u ishôôgh inya hen ijiir ne ga man shi nea dondo mbaaôndo mbagenev nea vihin ayol a en kpaa ga yô,

⁷ nahan Me na, né tema hen ijiir ne, ken tar u M na uter enev ne, gbem sha won.

⁸ Nenge, ne yô, ne mba suur sha kwaghôron u aiegh u lun a inja ga.

⁹ Ne gema ne ii, ne wua or, ne er idya, ne bum sha aie, ne nande Baal nagh, ne dondo mbaaôndo mbagenev mba ngise ne fa ve ga,

¹⁰ tsô ne va tile sha ishigh Yagh, ken iyou ne, i i yer i sha iti Yam, ne kaa ner: I yima se ve! sha u se̱ eren akaa a ndôhôrshima ne cii, zee?

¹¹ Nahan iyou ngin, i i yer i sha iti Yam, i̱ hingir bar u mbanumungbenda sha ashe a en zee? Nenge, Mo, M nenge a mi, kape TER A kaa ne.

¹² Shi za nen hen ijiir Yam i i lu ken Shilo la, henpe M na, iti Yam vande lun her tsuaa la, za nenge nen kwagh u M er i, sha ci u iferkwagh i ior Av Iserael la.

¹³ Nahan, er ne er akaa ne cii yô, kape TER A kaa ne, man gema M lu ôron kwagh a ven, pepe kua aikighe, kpa ne ungwan ga; shi M yila ne kpaa, kpa ne vengese ga;

¹⁴ sha ci u nahan yô, iyou ne, i i yer i sha iti Yam, i ne suur sha mi la, man ijiir i M na ne kua uter enev, Me er a i vough er M er a Shilo nahan.

¹⁵ Me ta ne sha ishigh Yagh kera, vough er M vande tan anmgbianev enev, vor u Eferaim la cii kera nahan.

¹⁶ Nahan yô, we, de kera eren msen sha ci u ior mban ga, man shi de genger mliam shin msen sha ci ve ga, man shi de zamber a Mo sha ci ve ga, gadia Me ungwa u ga.

¹⁷ U kera nenge kwagh u ve eren ken agar a Yuda kua sha igbenda i Yerusalem gaa?

¹⁸ Mbayev kohol ikon, uter keer usu, kasev hôr mwem, sha u kaan torkwase u Sha la kuese a min, man sha u toon mbaaôndo mbagenev iniav mbi man, sha u vea bamem yô.

¹⁹ Ka Mo je ve bamem yee? Kape TER A kaa ne. Mba kera eren a er ican ayol a ve geman van a kunya sha ishiv vev gaa?

²⁰ Sha ci u nahan yô, Ter AÔNDO ngu kaan nahan er: Nenge, á haa iyugh Yam kua ishima i vihin Yam sha ijiir ne, sha or man sha zendenya man sha ikon i ken akôngo, kua sha iyiav mbi hen inya; ia hia a kera, á pir i ga.

²¹ TER u akum a Sha, Aôndo u Iserael ngu kaan nahan er: Gema iniav yenev mbi nanden, magh nen sha iniav yenev mbi sôngon, gba yan nen inyam kera tsô.

²² Gadia zum u M due a uter enev ken tar u Igipiti la, M ôr kwagh a ve ga, m kaa ve kwagh sha kwagh u iniav mbi nanden shin mbi sôngon kpaa ga.

²³ Kpa tindi ne M wa ve, M kaa Mer: Ver nen ato sha imo Yam, nahan Me hingir Aôndo wen, man shi ne kpaa né hingir ior Av, man zende nen sha gbenda u M kaa ne la cii, sha u i̱ kpe ne iyol yô.

²⁴ Kpa ve wa iko ga, man shi ve ver ato kpaa ga, kpa ve za sha mbamhen vev man sha mcighir u asema ve a bo la, ve hide ijime, ve za hemen ga.

²⁵ Hii sha iyange i uter enev due ken tar u Igipiti la je, zan zan nyian, M lu tindin ne a mbatomov Av, uprofeti cii, ayange ayange, pepe kua aikighe kpaa;

²⁶ nahan kpaa ve wam iko ga, man shi ve ver ato kpaa ga, kpa ve nômbo ikôr; ve hemba uter vev dang u eren.

²⁷ Nahan ú ôr ve akaa angan cii, kpa vea wa u iko ga; shi ú yila ve, kpa vea vengese ga.

²⁸ Nahan kaa a ve wer: Ungun ka nongo u wan imo i TER, Aôndo ve, iko ga je ne, ngu rumun mkôôm kpaa ga; mimi saa kera, i dugh un ken zwa ve kera.

²⁹ Tôndo ice you i sha ihyaghtyo, haa kera, gber kwelegh zungwe sha agungu a penem penem, gadia TER gbihi man A undu ikov i A yugh i la.

³⁰ Gadia ônov mba Yuda er iferkwagh sha ishigh Yagh, kape TER A kaa ne; ve ver akaa a ve a ndôhôrshima ken iyou i i yer sha iti Yam sha u vea hôngor i yô.

³¹ Ve maa ajiir a taven sha a Tofeti, u a lu shin Pev u Ben-hinom la, sha u vea nande ônov vev mba nomso kua mba kasev sha usu, kwagh u M ne zwa ga, man shi a nyer ken ishima Yam kpaa ga yô.

³² Nahan yô, nenge, ayange nga van, kape TER A kaa ne, a á kera yila un er Tofeti ga, shin Pev u Ben-hinom kpaa ga, kpa á yila er Pev u Wuan Ior heregh; gadia vea ii ken Tofeti sha ci u ijiir i iin ia kera shi ape genegh ga yô.

³³ Akom a ior mban aa hingir kwaghyan u inyon i sha man u inyamikume i shin tar, ma or kpaa nana zenda i kera ga.

³⁴ Zum la Me na imo i ahan man imo i iember man imo i orkwasehe man shi imo i kwasehe kpaa, vea been ken agar a Yuda man sha igbenda i Yerusalem kpaa, gadia tar la ua hingir atse.