Yeremia 6 - ICIGHAN BIBILO

¹ Yevese nen, ker nen ijiir i waren ne ônov mba Benyamin, due nen ken Yerusalem kera. Tôngo nen ikpamkor ken Tekoa, man kende nen a ikav sha, sha Bete-hakerem, gadia kwaghbo u ken imbusutarimese ngu kenger kua zegemtim kpaa.

² U doon ashe man u fan ican ga la, Me tim un kera, ka wankwase u Shion je la.

³ Mbakuranilev a akumauile ve, vea va her a na; vea tim utenti vev vea kase un á tser; hanmô ve nana ya toho hen ijiir i nan.

⁴ Kohol nen iyol i nôngon ityav a na; mough sha, sé kôndo nen er iyange i lu sha tembe ne je. Kpa! kwagh tser se ve! gadia iyange ngi been, mure u aikighe ngu lihen!

⁵ Sé mough nen, sé kôndo nen tugh, sé za hembe nen ayou a na a tor!

⁶ Gadia TER u akum a Sha ngu kaan nahan er: Paa nen ikon na, haa nen atihi a inyaagh a̱ tav sha, sha u nôngon ityav a Yerusalem; ka gar u á or un iyev je la; kwagh ugen ngu ken a na ga, saa u eren kwagh sha mkighir.

⁷ Er ijôr i dugh mngerem nahan, kape un kpaa a dugh aferakaa na la; mba ungwan ipila man mkighir ker a na; angev kua avav nga sha ishigh Yagh gbem.

⁸ We Yerusalem, rumun ityesen, sha er uma Wam a̱ de vende u ga yô; man sha er M̱ de gem u u̱ hingir ice, tar u lun a orteman ker ga, ze.

⁹ TER u akum a Sha ngu kaan nahan er: Yar nen twar u asande a Iserael a a shi her la, er twar u kon u wain nahan; gema uwegh shi za sha agbaa, er orsundan atam a wain nahan.

¹⁰ Ka an je Me ôr kwagh a nan, Me pase nan man vea ungwa? Nenge, ve tsôngo ato sha u vea ungwa kpaa ga; nenge, kwaghôron u TER kpaa hingir ve kwagh u lahan, a kera doo ve je ga.

¹¹ Nahan yô, M mgbough a iyugh i TER; M wa ishima je M vôr. Haa i sha mbayev mba sha gbenda u ken gar, kua sha mkohol u mbayevikaior cii; gadia nom vea kwase u nan kpaa á kôr ve, orvesen a or u ayange a nan a iv la kpaa.

¹² Uya vev vea hingir uya mba ior mbagenev, man ishule ve kua kasev cii kpa; gadia Me naregh uwegh Agh sha num, sha mba ve tem hen tar ne, kape TER A kaa ne.

¹³ Gadia hii sha u kiriki zan zan ar sha u vesen, hanmô ve cii maa nan iyol sha mtsera u dang; man hii sha profeti zan zan ar sha pristi, hanmô ve cii, nan ngu eren kwagh sha icugh.

¹⁴ Mba nenge pe been ior Av angev sha sha tseegh, mba kaan er: Bem, bem; kpa bem ngu ga.

¹⁵ Ve va ahenge sha ci u ve er kwagh u ndôhôrshima yô; nahan kpaa kunya ngu ken ve côhin je ga, gadia ve fa ahenge a van kpaa ga; nahan yô, vea gba a mbagban imôngo; sha shighe u Me va tsaha ve la, vea nôngo gbev, kape TER A kaa ne.

¹⁶ TER ngu kaan nahan er: Tile nen sha igbenda, nenge nen, pine nen igbenda i tse, henpe gbenda u doon shi u lu yô, zende nen sha u, tsô nea zua a mmem sha ci u uuma enev; kpa ve kaa er: Ka se ka zenden sha mi ga.

¹⁷ Man shi M ver ne mbakuran, Mer: Ver nen ato sha mkaa u ikpamkor; kpa ve kaa er: Ka se ka veren ato ga.

¹⁸ Sha ci u nahan yô, ungwa nen, ne akuraior, man fa nen, ne ikumior, kwagh u a lu ken a ve yô.

¹⁹ Ungwa, we tar, nenge, M ngu van a kwaghbo sha ior mban, ka atam a mbamhen vev je la; gadia ve ver ato sha akaaôron a Am ga, tindi wam kpaa, ve venda un.

²⁰ Ka sha ci u nyi i shi i vem a kwaghhumandoon hen Sheba, man kalamu u human doon ken tar u icaa? Iniav yenev mbi nanden ka kwagh u rumun ga, man iniav yenev mbi sôngon kpaa doom ga.

²¹ Sha ci u nahan yô, TER ngu kaan nahan er: Nenge, Me ver akaa a nôngon gbev sha ishigh ki ior mban; uter a ônov vev imôngo vea nôngo gbev sha a, orwanndor a ikar na kpaa vea saa ishe.

²² TER ngu kaan nahan er: Nenge, ior mba van shin tar u Imbusutarimese la, ikurior i vesen ngi moughon sha avegher a tar a gban ca la.

²³ Ve kôr ada ken uwe, kua iwange; ka mbavihinkwagh je, mba a mhôônom ma zungwen ga ikenge ve ngi er kumetan u zegemnger nahan, mba hendan anyinya, er or u nan kange iyol i utya nahan, sha u nôngon ityav a we, we wankwase u Shion.

²⁴ Se ungwa gwa ve, ave ase shir livaa; ican tser se, mnyoonom kpaa kôr se er ka kwase u toghor mar nahan.

²⁵ De dugh nen ken akôngo ga, man de kera zenden nen sha gbenda ga; gadia sanker u orihom ngu ker, mcieryol kpaa kase tser.

²⁶ We, wankwase u ior av, ta ibashôhô uya, vingir sha mtwe; zungwe, er ka i zungwe wan u a lu môm nahan, gber kwelegh, gadia ortimin ngu va burun se a bur.

²⁷ M gema u M ver u orkaren man ortimenakaa ken ior Av, sha u u̱ fa man u̱ kar gbenda ve.

²⁸ Ve cii, ka mbahendan tsung je, mba zenden anger; ka togula man iyôgh ki iligh ve lu ye; ve cii ka mbaeren dang je.

²⁹ Akpaaiwaagh nga tan ahumbe sha agee; inyelegh hia ken usu; ka gbilin tsô ve ser ye, gadia i kar a mbaaferev kera ga.

³⁰ Mba yer ve er, azurfa u i te kera, sha ci u TER A te ve kera yô.