Yeremia 52 - ICIGHAN BIBILO

¹ Sedekia lu anyom ikundu kar môm zum u a ya tor la; a tema tor ken Yerusalem anyom pue kar môm; iti i ngô na er Hamutal, wan u Yeremia u ken Libena.

² A er ifer sha ishigh ki TER sha inja i Yehoyakim lu er la cii.

³ Ka sha ishima i vihin i TER akaa ne er ken Yerusalem man Yuda, zan zan A ta ve sha ishigh Nagh kera ye. Sedekia gema hendan a tor u Babilon.

⁴ Tsô, sha inyom i sha utaankarunyiin i a ya tor la, uwer u sha pue, ayange a u di kpaa pue la, Nebukadinesar tor u Babilon za va, a mbautyav nav cii, er una nôngo ityav a Yerusalem; ve haa afo, shi ve maa ayou a taver, ve kase un.

⁵ Nahan i kase gar la zan zan ar sha inyom i sha pue kar môm i tor Sedekia la.

⁶ Sha uwer u sha unyiin, ayange a u ataankaranyiin la, ijen gba kpishi ken gar, nahan ior mba ken tar la kera zua a kwaghyan ga.

⁷ Tsô i pev gilgar, mbautyav cii yevese, ve due ken gar tugh hen hunda u u lu hen haregh u ukpekpe uhar, mba ve lu hen sule u tor la—Mbakaldi gema kase gar, tser—ve yem gbenda u u ver ishigh hen Araba la.

⁸ Kpa mbautyav mba Mbakaldi zenda tor ityô, ve za kohol Sedekia hen kpuun kpuun u Yeriko; mbautyav nav cii sambe undu un.

⁹ Nahan ve kôr tor, ve yem a na hen tor u Babilon hen Ribela ken tar u Hamati; a ôr un ijir.

¹⁰ Tor u Babilon wua ônov mba Sedekia mba nomso sha ashe na; man mbatarev mba Yuda cii kpaa, a wua ve ken Ribela.

¹¹ A ongor Sedekia ashe, a kange un sha mshir tor u Babilon maa yem a na sha Babilon, a za wa un ken gaadi zan zan a kar kpen.

¹² Tsô sha uwer u sha utaan, ayange a u pue la, ka inyom i sha pue kar utaankarunyiin i tor Nebukadinesar, tor u Babilon je la. Nebusaradan, orhemen u mbakurantor, u a til sha ishigh ki tor u Babilon la, za va ken Yerusalem;

¹³ a nande iyou i TER, man iyou i tor man ayou a ken Yerusalem cii, hanma iyou i vesen, a nande i sha usu.

¹⁴ Mbautyav mba Mbakaldi cii mba ve lu a orhemen u mbakurantor la, ve hembe ugir mba Yerusalem cii, ve ningir ve tser.

¹⁵ Mbagenev ken mbaatsanev man ior mba ve shi ken gar, man mba ve na ayol a ve sha ikev i tor u Babilon, man asande a ikpelaior a a shi her la, Nebusaradan orhemen u mbakurantor kura ve cii, yem a ve uikangen.

¹⁶ Mbaatsanev mbagenev mba ken tar la yô, Nebusaradan orhemen u mbakurantor undu ve er ve̱ lu mbanengen sha ishule i wain man i uyia.

¹⁷ Mtôm ma togulam ma ma lu ken iyou i TER, man asange a pendan utasa sha mi kua zegetasa u togula mba ve lu ken iyou i TER la, Mbakaldi hembe ve avur avur, kura utogula yem a mi ken Babilon.

¹⁸ Ityev kpaa, man ushebul man akambe a sôron amenger a mi man utasa man mbaahwa man ikav mbi togula mbi i eren tom a mi la, ve kura ve yem a mi.

¹⁹ Ayongo man agbande a usu man utasa man ityev man udaarmbaamengerev man mbaahwa man agbande; akaa a i er a sha zenaria man a i er a sha azurfa kpaa, orhemen u mbakurantor kura, yem a mi.

²⁰ Mtôm mhar man zegetasa môm, man abua pur kar ahar a togula a a lu shin ityô i tasa la, man asange a pendan utasa sha mi a tor Solomon er sha ci u iyou i TER, togula u i er ikav mbin a mi cii myohom nam gande u karen.

²¹ Sha kwagh u mtô la yô, ityaven ki ityôgh ki mômough lu aseva pue kar anigheni, indi na lu aseva pue kar ahar, icivir na lu ahôaveegh anyiin; ki lu a ho kimi.

²² I ta indyuruku u togula sha ki; ityaven i indyuruku u môm lu aseva ataan; man kper kua upomegraneti lu sha indyuruku vegher u sha ningir tser, ve cii lu sha togula; ityôgh ki sha uhar la kpaa lu di nahan a upomegraneti.

²³ Upomegraneti lu akunduanyiingber kar ataratar sha akpe; kohol upomegraneti cii lu deri sha kper la ningir tser.

²⁴ Orhemen u mbakurantor la kôr pristi u vesen Seraia man Sefania pristi u dondon sha a na la, man mbakuranhunda, ior itiar,

²⁵ man shi ken gar, a kôr orhemen u i wa un mbautyav sha ikev yô, a ior itiankarihiar mba lun a tor, mba i zua a ve ken gar yô, man orngeren u kurutya u a kohol ior mba ken inya la sha ci u utya yô, man ior akunduatar mba ken inya mba i zua a ve ken atô u gar yô.

²⁶ Nebusaradan orhemen u mbakurantor kôr ve, va a ve hen tor u Babilon hen Ribela.

²⁷ Nahan tor u Babilon wua ve hen Ribela ken tar u Hamati. Kape i kura Yuda ken tar ve kera i yem a ve uikangen la.

²⁸ Ka ior mba Nebukadinesar yem a ve uikangen ne: Sha inyom i sha utaankaruhar la, Mbayuda dubu utar man ikundu ka utar;

²⁹ sha inyom i sha pue kar anigheni i Nebukadinesar la, a kura ior deri anigheni man ikundugber kar uhar ken Yerusalem, a yem a mi uikangen;

³⁰ sha inyom i sha ikundu kar utar i Nebukadinesar la, Nebusaradan orhemen u mbakurantor kura Mbayuda deri utaankaruhar man akunduahar ka utaan, yem a ve uikangen; kohol ior cii ve lu dubu unyiin man deri ataratar.

³¹ Tsô sha inyom i sha ikundugber kar utaankaruhar i Yehoyakin, tor u Yuda, lu ken kwar la, uwer u sha pue kar uhar, ayange a u ikundu kar ataan la, Evil-merodaki tor u Babilon, sha inyom i a ya tor la, a kende a Yehoyakin tor u Yuda sha, a dugh un ken gaadi kera;

³² a ôr kwagh a na dedoo, a kende ikônough nagh ki torough sha hemba mkônom ma utor mba ve lu a na ken Babilon la.

³³ A er un akondo a ken gaadi kera, a haa un agen, man a gema yan kwagh a na imôngo, sha ayange a uma na cii.

³⁴ Sha kwagh u gbayol na kpaa, tor u Babilon lu nan un kwar na gbem, hanma iyange a lu zuan a kwar na sha ayange a uma na cii zan zan ku na.