Yeremia 51 - ICIGHAN BIBILO

¹ TER ngu kaan nahan er: Nenge, Me kpoghol jijingi u ortimin akaa kera la, a̱ va ta sha Babilon man sha ior mba asema a ve a hendan a Mo la.

² Me tindi Babilon a mbayegher, vea yegher un, vea er tar na ua hingir gbilin; gadia vea kase un a num vea tser, sha iyange i ican la.

³ Orivaan nana henda ada u nan sha or u hendan ada kua sha or u nan til sha a rigautya u nan iyol la; de tsegh nen ikaior ve ga; tim nen akumautya na kera cii purututu.

⁴ A haa ve inya kpenegh sha utya, ken tar u Mbakaldi, a avav iyol sha igbenda i u.

⁵ Gadia Aôndo, TER u akum a Sha ta Iserael man Yuda kera ga, shin er tar ve u mgbough a ibo hen Icighan u Iserael nahan kpaa.

⁶ Yevese, due ken atô u Babilon kera, hanma or nana̱ yima uma u nan; i̱ de kera timin ne kera sha ifer na ga; gadia ka shighe u iyevoron i TER je ne, ngu kimbin un sha ieren na.

⁷ Babilon vande lun iyongo i zenaria sha uwegh ku TER, i i na tar cii u hunde la; akuraior ma wain na, nahan akuraior hunde.

⁸ Babilon gba fese, tim je; gbidye nen un ivaa; za nen un a icigh sha ci u mnyoonom nam, alaghga una war.

⁹ Ma se wanger Babilon, kpa a wanger ga; sé undu nen un, sé yem nen hanma or hen tar u nan; gadia ijirôron na ar Sha je, i kôndo a i sha zan zan za ar sha kwavaôndo je.

¹⁰ TER due a perapera wase ken igbar; va, sé za pase nen tom u TER, Aôndo wase, ken Shion.

¹¹ Hor nen avaan, kôr nen iperutya ave! TER tor jijingi u utor mba Media ityô gadia awashima Na sha kwagh u Babilon yô, ka u timin un kera, gadia ka iyevoron i TER je la, iyevoron i tempel Na.

¹² Tim nen tuta sha u nôngon ityav a ugir mba Babilon, seer taver nen ajiir a kuran, ver nen mbakuran, sôr nen ajiir a yeren her; gadia TER wa ishima man A kure kwagh u A ôr sha ior i Babilon kpaa.

¹³ We, u u tem hen mngerem ma kpishim, man inyaregh ki ngeen we ne, mkur wou va ve, mtsera wou sha gbenda u bo la iv ve.

¹⁴ TER u akum a Sha A bum iyol Na er: Mimi je, Me iv u a ikpelaior er ikomon nahan; vea ger u akenge a mhembe.

¹⁵ Ka un A gbe tar sha tahav Nav man A ver tar sha won cii sha kwaghfan Na, man A samber Usha sha mkav Na ye:

¹⁶ ka Una ôr kwagh yô, mngerem hura sha Usha, ka A er tulugh a due ken akighir a tar a kôndo sha; A er inyiar sha ci u ura, man A due a ahumbe ken ayou a Na a koson akaa ker.

¹⁷ Hanma or nan hingir orlanenkwagh nan ban a mfe; hanma or u nan eren tom sha zenaria nan va ahenge sha ieev mbi nan mbi gban a gba la; gadia ieev mbi nan mbi keren a ker mbila, ka kwagh u icughugh je, ma iôôn ngi ken mbi ga.

¹⁸ Mbi gbilin tsô, ka tom u icughugh; sha shighe u mtsaha u mbi yô, mbia saa ishe.

¹⁹ Kpa kwar u Yakob ngu er mbi nahan ga, gadia un ka or maan akaa cii, man Iserael kpaa ka nongo u u lu dyako Na je yô; TER u akum a Sha ka iti Na je la.

²⁰ We, u ngum msabe man ikav Yav mbi utyav; ka sha a we man M hemben akuraior avur avur ye; ka sha a we man M timin ityartor kera ye;

²¹ ka sha a we M hemben nyinya man orhendan un avur avur ye; ka sha a we M hemben kyekyeutya man u nan undu sha min la avur avur ye;

²² ka sha a we M hemben nomsoor kua kwase avur avur ye; ka sha a we M hemben tamenor man wanye avur avur ye; ka sha a we M hemben wanyekwaor man iniunkwase avur avur ye;

²³ ka sha a we M hemben orkuranilev man ikumuile i nan avur avur ye; ka sha a we M hemben orsule man abua a nan a kpelan ikyekye la avur avur ye; man shi ka sha a we kpaa M hemben ugomna man mbatarev avur avur ye.

²⁴ Me or Babilon iyev kua ior i Kaldi cii, sha ifer ve cii, i ve er ken Shion sha ishigh yenegh yô, kape TER A kaa ne.

²⁵ Nenge, M ngu ihom a we, we uwo u timin akaa kera ne, kape TER A kaa ne, we u u timin tar cii kera ne; Me naregh uwegh sha a we, Me menger we sha avande kera, Me gema u ú hingir uwo u hian;

²⁶ á kera bugh ma iwen her a we sha ci u wan sha zongo shin sha ci u wan imagh a mi kpaa ga, kpa ú hingir ice gbem sha won, kape TER A kaa ne.

²⁷ Tim nen tuta sha tar, tôngo nen ikpamkor ken akuraior, ver akuraior, tsegha a sha u tan num sha a na, yila ityartor i Ararati man Mini man Asekenashi sha u tan num sha a na; ver kurutya sha u nôngon ityav a na, na anyinya a̱ kôndo er ikomon nahan.

²⁸ Ver akuraior, tsegha a sha u tan num sha a na, utor mba Media, ugomna man mbatarev nav cii, man tar u a ye tor sha mi cii.

²⁹ Nahan tar ngu tenger, ngu zômon iyol sha mnyoon; gadia awashima u TER sha Babilon la ngu her taveraa sha u geman tar u Babilon u̱ hingir ice, ma or nana kera tema ker ga.

³⁰ Mbautyav mba Babilon de u nôngon ityav, ve gba teman ken ayou a ve a utya tsô; agee ve saa; ve hingir er kasev nahan; i nande ajiir a na a teman sha usu; i kever uishindan nav kera.

³¹ Oryevese yevese za zua a ugen, man orkaanloho ugen kpaa za kohol ugen, sha u za pasen tor u Babilon er i ngohol gar na hanma vegher yô;

³² ahongo kpaa i ngohol a, i nande azande sha usu, cier mbautyav iyol.

³³ Gadia TER u akum a Sha, Aôndo u Iserael ngu kaan nahan er: Wankwase u Babilon ngu er ka ijiir i gbiren iyiav sha shighe u i kindigh i la nahan; ica ia gba ga tsô shighe u á sunda un una kuma.

³⁴ Nebukadinesar tor u Babilon, yam, a vihim kera, a verem inya er ikagh ki lun gbilin nahan, a menam er zegeiyô nahan, a iv iyav nav a akaa nyohon am; a gbihim kera.

³⁵ Kwagh u iperagh u i erem man u i er iyol yam la kpaa a̱ hide sha Babilon! Or u teman ken Shion a̱ kaa nahan; awambe am a̱ hire sha ityough ki mba ve tem ken Kaldi la! Yerusalem kpaa a̱ kaa nahan.

³⁶ Nahan yô, TER ngu kaan nahan er: Nenge, Me ta ikaa a we, man Me or iyev sha ci wou; Me uma zegemnger na, man Me na imbormnger na kpaa ia uma.

³⁷ Babilon una hingir atihialôgh, ijiir i teman i ugbaseela, kwaghcieryol man kwagh u gbiren iwer a min, ma or una kera tema her ga.

³⁸ Vea ta kume imôngo er agumabegha nahan; man vea kpela iker er ônov mba begha mba kiriki nahan.

³⁹ Zum u isharen ve ia yegh yô, Me er ve iniongo, man Me er, vea hunde; sha er ve̱ hume ve̱ gba mnyam, ve̱ yav gbem sha won, ve̱ de kera nderen ga yô, kape TER A kaa ne.

⁴⁰ Me sen a ve er ka agumaiyôngo hen ijiir i sôngon yô, man er anomaiyôngo man ukpev nahan.

⁴¹ Nenge, i hemba Sheshaki, man i ngohol icivir i tar cii kera. Nenge, er Babilon a hingir kwagh u cieryol hen akuraior!

⁴² Zegemnger va ar sha Babilon; i cir un sha agôndoamnger.

⁴³ Agar a na a vesen hingir atse, tar u ombor man desereti, tar u ma or nana tema ker ga, man shi u wan u or nan kar her ga yô.

⁴⁴ Me tsaha Bel ken Babilon, Me dugh kwagh u a men ken zwa na la; akuraior kpaa aa kera za her a na lugh lugh ga; gilgar u Babilon kpaa gba.

⁴⁵ Ior Av, due nen ken atô na kera, hanma or nana̱ yima uma u nan sha ishima i vihin i tsung i TER la.

⁴⁶ Ishima i̱ de yen ne ga, man shi de cie nen gwa u á va ungwa hen tar la ga, gadia gwa ua va ken inyom i môm, man shi inyom igen kpaa shi ua va; aeren a aperagh aa lu sha tar, ortaregh una mough num a ortaregh.

⁴⁷ Nahan nenge, ayange nga van a Me tsaha ieev mbi Babilon mbi gban a gba, tar na cii ua va ahenge, man ior nav mba i woo ve cii, vea gba ker atô na.

⁴⁸ Nahan Sha man tar man akaa a a lu kimi cii, vea wa atsam, á ember mgbe u Babilon gba la; gadia mbatimin vea due hen imbusutarimese vea va her a na, kape TER A kaa ne.

⁴⁹ Babilon una gba sha ci u mba i woo ve ken Iserael la, di er ior mba i woo ve sha won la, ve gbe inya sha ikev i Babilon nahan.

⁵⁰ Ne mba ne wer sanker, yem nen, de til nen ga; umbur nen TER ken ica, man Yerusalem a̱ lu ne ken ishima.

⁵¹ Se va ahenge, gadia se ungwa tarnahan; kunya cir se ishigh cii, gadia ior mba ken nongo ugen va nyôr ken ajiir a tseghan a iyou i TER.

⁵² Nahan yô, nenge, ayange nga van, kape TER A kaa ne, a Me tsaha ieev nav mbi gban a gba la; man ken tar na cii, mba i gber ve avav vea kine.

⁵³ Shin er Babilon una kôndo Sha, shin er una taver ayouautya na sha ijiir i taven, nahan kpaa mbatimin akaa kera vea due her a Mo vea ar her a na, kape TER A kaa ne.

⁵⁴ Ungwa! Mliam ma ken Babilon, man mvihi u vesen u ken tar u Mbakaldi la!

⁵⁵ Gadia TER ngu timin Babilon kera, man ngu yangen ayôôso a vesen a ken a na la; agôndoamnger a ve, nga tan kume er mngerem ma kpishim nahan, ihuran i akenge a ve kende Sha;

⁵⁶ gadia ortimin va ta sha a na, ka sha Babilon je la, i kôr mbautyav nav, i sombo mbaada vev avur avur kpaa; gadia TER ka Aôndo u oron iyev je, Una or iyev kpee je.

⁵⁷ Me na atiator a na á hunde kua mbafankwagh nav, man ugomna nav, man mbahemenev nav, man mbautyav nav kpaa; vea gba mnyam vea saa yaven gbem sha won, vea nder ga, kape Tor A kaa ne, TER u akum a Sha ka iti Na je la.

⁵⁸ TER u akum a Sha ngu kaan nahan er: Á yohôr gilgar u Babilon u civir la purututu, á nande ugôgômbaihindav nav sha usu; nahan ior er tom gbilin, akuraior kpaa er ayol a ve ican gbilin, ka sha ci u usu tsô.

⁵⁹ Ka kwaghôron u profeti Yeremia kaa Seraia wan u Neria, wan u Mahaseya je ne, zum u a yem ken Babilon a Sedekia tor u Yuda imôngo ken inyom i sha unyiin i a ya tor la. Seraia lu orvesen u mbakuran ya u tor je.

⁶⁰ Yeremia nger akaa a bo a á va tser Babilon la cii ken ruamabera, ka akaaôron angan cii a i nger a sha Babilon ne.

⁶¹ Yeremia shi kaa a Seraia er: Zum u ú za ar sha Babilon yô, ver ishima u ôron akaa ne cii,

⁶² kaa wer: We TER, ka We U ôr kwagh sha ijiir ne Wer, Ú sar i kera er ma or nana kera tema ken i ga yô, shin or, shin zendenya kpaa ga, kpa i̱ hingir ice gbem sha won.

⁶³ Tsô, zum u ú bee u ôron ruamabera ne yô, kange un iwen man gbihi un ker atô u Uferati;

⁶⁴ shi kaa wer: Kape Babilon una mire ne, mayange una kera due sha ga, sha ci u kwagh u bo u Me va a mi sha a na la. Ka mkur u akaaôron a Yeremia je ne.