Yeremia 50 - ICIGHAN BIBILO

¹ Ka kwaghôron u TER A er sha kwagh u Babilon, sha kwagh u tar u Mbakaldi u sha ikev i profeti Yeremia ne:

² Pase nen akuraior, yôô nen, tim tuta, yôô nen, de kera yeren nen ga, kaa nen, ner: I ngohol Babilon, Bel va ahenge, kwagh hemba Merodaki; ieev nav va ahenge, kwagh hemba akombo a na.

³ Gadia ikurior igen due hen imbusutarimese ngi van num sha a na, ia gema tar na ua hingir ice, ma or nana kera tema ker ga; or kua zendenya kpaa yevese yem.

⁴ Sha ayange la man sha shighe la, kape TER A kaa ne, Mbaiserael vea va, ve kua Mbayuda, vea kôr gbenda vea lu vaan hiden, keren TER, Aôndo ve, kpaa.

⁵ Vea pine kwagh u Shion, vea ver ishigh her a na, vea kaa er: Va, sé zua nen a TER sha ikuryan i tsôron i ia hungul mayange ga yô.

⁶ Ior Av, iyange ve lu er iyôngo i i ndiir yô; mbakuran mba i tsume a i, ve yem a i sha iwo; i zende wue wue sha iwo man agungu, ijiir i tsan i i hungul i.

⁷ Mba ve kohol ve cii ve ya ve; mbaahendanev vev kaa er: Se mba a ibo ga, sha ci u ve er TER, ijiir i teman i perapera la, isholibo, ka TER u A lu ishimaverenkeghen i uter vev la.

⁸ Yevese, due nen ken atô u Babilon kera, due nen ken tar u Mbakaldi, lu nen er ukpev mba ve hemen akumauile nahan!

⁹ Gadia nenge, Me tor ikpelaior i akuraior a vesen ityô, a ken imbusutarimese la, Me er, á va ta num sha Babilon, aa tange ityav sha a ve, ka sha her je man á hemba un ye; avaan a ve aa lu er avaan a orutya u fan ivaan nahan u nana hidi ave gbilin ga yô.

¹⁰ Kaldi una hingir ishar; mba ve sar un la cii vea ide, kape TER A kaa ne.

¹¹ Shin er ne lu sar sar, shin er ne ember, ne mba ne ye ishar sha dyako Wam, shin er ne lu yagh yagh er tulebua u a shoghol iyiav yô, man ne lu ngoron er anomanyinya nahan,

¹² ngô wen una va ahenge tsung, un u a mar ne la una hee; nenge, ken akuraior cii, una hingir u gban ijime cii, taaikôngo man tar u tseghe tseghe man desereti.

¹³ Sha ci u ishima i vihin i TER ma or nana kera tema ker ga, kpa ua hingir ice cii; hanma or u nana kar hen Babilon yô, á kpiligh nan iyol, nana gbire iwer sha atsan a na cii.

¹⁴ Tange nen ityav sha Babilon tser nen, ne mba ne hende mbaada cii; ker nen un, de tangen nen avaan ga; gadia a er TER isholibo.

¹⁵ Ger nen akenge i̱ ningir i̱ tser cii; a na hum ve; mtuunum nam gba, ugir nav kpaa yôhôl, gadia ka iyevoron i TER je ne; or nen un iyev, er a er nahan, shi er di nen a na nahan vough.

¹⁶ Tim ortanivor u ken Babilon kera kua un u a eren tom sha loji sha shighe u sundan la kpaa; sha ci u mvihi u sanker, hanma or nana hide hen ior mba nan man hanma or nana yevese nana yem hen tar u nan.

¹⁷ Iserael ka iyôngo i i num i kera yô, ubegha zenda i; hiihii tor u Ashiria ya un, ken masetyô Nebukadinesar tor u Babilon mase hemben akuhe a na.

¹⁸ Nahan yô, TER u akum a Sha, Aôndo u Iserael, ngu kaan nahan er: Nenge, Me tsaha tor u Babilon kua tar na, er M vande tsahan tor u Ashiria nahan.

¹⁹ Man shi Me hide a Iserael hen ijiir na i yan toho, una yaan toho sha Karmel man Bashan, una ya kwagh sha agungu a Eferaim man ken Gileadi kpaa je una ide.

²⁰ Sha ayange la man sha shighe la, kape TER A kaa ne, á ker iferkwagh i Iserael, kpa ia kera lu ga; man asorabo a Yuda kpaa á zua a mi ga; gadia me de asande a Me shi a her la, kwaghbo ve.

²¹ Kôndo sha tar u Merataim, ta num sha u je, kua sha mba ve tem ken Pekodi kpaa, wua ve, tim kera purututu ken ijime ve, kape TER A kaa ne, man er nen er M kaa ne nahan cii.

²² Ayôôso a utya nga ken tar man mtim u vesen!

²³ Nenge, er i tende man i hembe msabe u tar cii yô! Nenge, Babilon hingir kwagh u cieryol ken akuraior!

²⁴ M hôn u to, u gba ker je, we Babilon, kpa u fa ga; i tser a we man i kôr u kpaa, sha ci u u nenge num a TER yô.

²⁵ TER bugh ijiir i koson ikav mbi utyav Nav, man A due a ikav mbi utyav mbi iyugh Na; gadia Ter, TER u akum a Sha ngu a tom u eren ken tar u Mbakaldi.

²⁶ Va, va ta num sha a na, va ken hanma ian cii, bugh iuna na, kohol un, ta atihi atihi er iyiav nahan, tim un kera purututu, ma kwagh na a̱ de shin her ga.

²⁷ Wua agumabua na cii; i̱ sen a mi sha u za sôngon. Kwagh tser ve! gadia iyange ve i va ve, ka shighe u mtsaha ve je ne.

²⁸ Ungwa! Imo i mba ve yevese ken tar u Babilon ve war la, sha u za pasen ken Shion iyevoron i TER Aôndo wase, iyevoron i tempel Na.

²⁹ Yila mbakerenavaan, ve̱ kohol imôngo, ve̱ ta num sha Babilon, mba ve hende mbaada cii; haa nen afo kase nen un tser; ma or u keregh nana̱ de waren ga; or un iyev sha ieren na; er a er nahan, shi er di nen a na nahan vough; gadia a cihi TER, Icighan u Iserael.

³⁰ Nahan ikaior na ia gba sha igbenda na, man mbautyav nav cii á er ve vea huan ving sha iyange la, kape TER A kaa ne.

³¹ Nenge, M ngu ihom a we, we u u moron iyol ne, kape Ter, TER u akum a Sha A kaa ne; gadia iyange you i va ve, ka shighe u Me tsaha u je ne.

³² U moron iyol la, una nôngo gbev, una gba ma or u moughon a na sha nana lu ga; Me keer usu ken agar a na a vesen, ua hia hanma kwagh u a kase un cii.

³³ TER u akum a Sha ngu kaan nahan er: I kighir Mbaiserael kua Mbayuda imôngo; man mba ve kura ve ve yem a ve uikangen la cii, ve kôr ve gbang gbang, ve venda u nan ve gbenda.

³⁴ Orpaan ve ngu a agee, TER u akum a Sha, ka iti Na je la; Una ta ikaa ken a ve doo doo, sha u Una na tar mmem yô, kpa ior i ken Babilon yô, Una tumbul a ve.

³⁵ Sanker a̱ va sha Mbakaldi, kape TER A kaa ne, man sha ior i ken Babilon, man sha atiator a na kua sha mbafankwagh nav kpaa!

³⁶ Sanker a̱ va sha mba ve hagher sha kwaghôron, ve̱ hingir abumeaior, sanker a̱ va sha anomaior a na, mciem ma̱ haa ve iyol.

³⁷ Sanker a̱ va sha anyinya a ve, man sha akeke a ve a utya, man sha ior anza kposo kposo mba ve lu ker a na kpaa, ve̱ hingir er kasev nahan; sanker a̱ va sha inyaregh vegh, i̱ kura ki kera.

³⁸ Icegh ki̱ va sha mngerem nam, ma uma kera; gadia ka tar u ieev je, akombo a ve la er ve, ve nyôr ihundu.

³⁹ Nahan yô, inyamtoho i ken desereti a ugbaseela vea tsaan ker, ukonkofi kpaa vea luun ker; ma or nana kera tema ker sha won je ga; man shi á kera tema her ga zan zan sha ikov ikov cii.

⁴⁰ Er Aôndo yôhôl Sodom man Gomora man agar a a wa ndor a ve nahan, kape TER A kaa ne, kape ma or nana kera tema ker ga, man shi ma wan u or nana kera za shir ker kpaa ga.

⁴¹ Nenge, ior due hen imbusutarimese, mba van; ikurior i vesen man utor kpishi mba moughon sha akighir a tar je.

⁴² Ve kôr ada uwe man iwange, ka mbavihin kwagh tsung je, mba a mhôônom ma zungwen ga; ikenge ve ngi er kumetan u zegemnger nahan, ka mbahendan anyinya kpaa; ve wa ago iyol er or u nan kange iyol i utya nahan, sha u nôngon ityav a we, we wankwase u Babilon.

⁴³ Tor u Babilon ungwa ve, ave na maa shir livaa; ican tser un man mnyoonom kôr un er kwase u toghor mar nahan.

⁴⁴ Nenge, nana kôndo er begha u a dugh ken gborikô u Yordan nahan, nana va ta num sha ijiir i ilev mbi ye toho her gbem yô, gadia Me na, vea yevese heregh kera fese; man wen u i tsough un la, Me ver un sha i; gadia ka an nan lu er Mo? Man ka anti je nana verem iyange? Man ka an nana lu orkuranilev u nana tile sha ishigh Yagha?

⁴⁵ Yô, ungwa nen mhen u TER u A hen sha Babilon, man awashima Na u A we sha tar u Mbakaldi la; mimi je, ônov mba kiriki mba ikumuile, á kôr ve á kpela ve á yem a mi; mimi je nana er, á cier ijiir ve i teman la iyol a ve.

⁴⁶ Myee u i yôô er: I hemba Babilon kera la, na tar tenger, mliam hura ken akuraior.