Yeremia 5 - ICIGHAN BIBILO

¹ Zende nen wue sha igbenda i Yerusalem, shi nenge, pine man ker nen sha ityembe na, shin nea fatyô u zuan a oro, shin or môm ngu u nan eren jighilii nan keren mimi; nahan Me de un kwaghbo na.

² Shin vea kaa er: Er TER A lu u uma ne, nahan kpa mba bumun sha aie.

³ TERE, ka mimi ashe Ou a keren gaa? U gbidye ve, kpa nyoon ve ga; U tim ve kera, kpa ve rumun mkôôm ga, ve taver ishiv vev je, hemba vande; ve venda u geman asema.

⁴ Kpa mo m kaa mer: Mban ka a ka apwaaior tsô; mba bumen, gadia ve fa gbenda u TER ga, shin tindi u Aôndo ve kpaa ga;

⁵ yô, me za hen mbavesen, me za ôr kwagh a ve, gadia ve fa gbenda u TER, man tindi u Aôndo ve. Kpa ve cii imôngo ve kever igbur, ve tôndo ikangenev kera.

⁶ Ka nahan man begha u ken ikô una wua ve, icile i ken taaikôngo ia tim ve kera, anyam una kegh hen agar a ve, hanma or u nana due ker, á ande nan, gadia afer a ve ngee, man mhirjime ve kpaa vese.

⁷ Á er nan man Me de u asorabo a ouwe? Ônov ou tam kera, ve gema ve bum mba ve lu mbaaôndo ga la; zum u m koso ve zan zan kuma ve yô, ve er idya, ve tim nongo tu tu hen uya mba mbaagbaga.

⁸ Ka anomanyinya a kehen a zenden wue wue, hanmô nan ngu ngoron imo hen kwase u or u wan ndor a nan.

⁹ Nahan Me kera or iyev sha ci u akaa ne gaa? Kape TER A pin ne; uma Wam kpaa una kera or imbaikurior ne iyev gaa?

¹⁰ Unde nen sha ukpekpe nav, tim kera; kpa de kera been nen cica ga; paa agbaa a na, gadia ka a TER ga.

¹¹ Gadia ya u Iserael kua ya u Yuda ve tsughum tsung je, kape TER A kaa ne.

¹² Ve nyiman TER, ve kaa er: Ka un ga; kwaghbo kpaa una tser se ga; sea nenge a sanker shin ijen kpaa ga.

¹³ Uprofeti vea hingir er ahumbe nahan, kwaghôron ngu ken a ve ga; kape á er a ve je la.

¹⁴ Nahan yô, TER, Aôndo u akum a Sha, ngu kaan nahan er: Er ne er kwagh ne yô, nenge, Me ver kwaghôron Wam ken zwa wou a̱ hingir usu, man ior mban ka ikon, ua hia ve.

¹⁵ Nenge, M ngu van a ikurior igen i ken ica sha a we, we ya u Iserael, kape TER A kaa ne; ka ikurior i been je ga, ka ikurior i tse i tse je, ikurior i u fe zwa u i ga, man u kav kwagh u i er kpaa ga yô.

¹⁶ Gbandeavaan ve ngu er uwar u u lu ivegher yô, ve cii ka anomaior.

¹⁷ Vea ya iyiav youv mbi u sondo, kua kwaghyan wou, vea ya ônov ou mba nomso kua mba kasev; vea ya ikumuile you kua ibua you; man shi vea ya ikon i wain you kua ikon i tur you; agar a ou a a lu a ugir, a u suur sha mi la, vea tim a sha sanker.

¹⁸ Kpa sha ayange shon la kpaa, Me bee ne cii ga, kape TER A kaa ne.

¹⁹ Tsô zum u ne kaa ner: Ka sha ci u nyi TER, Aôndo wase, A er se akaa angan ciili? Nahan u kaa a ve wer: Er ne tem kera, man ne er mbaaôndo mbagenev tom ken tar wen yô, kape nea er ior mbagenev tom ken tar ugen u u lu u wen ga la.

²⁰ Pase kwagh ne ken ya u Yakob, yôô un ken Yuda, kaa wer:

²¹ Shi ungwa nen kwagh ne, ne ior mba lanen kwagh man mbakavenkwagh kpaa ga; ne mba ne lu a ashe, kpa ne mba nengen ga; ne mba ne lu a ato, kpa ne ongo ga ne.

²² Mo je kpaa ne ciam gaa? Kape TER A kaa ne. Ne kera gbidye ikarikase iyol sha ishigh Yagh gaa? Mo u M ver waarawa Mer, u̱ lu mkighir u zegemnger, sha tindi u tsôron u una kar un mayange ga yô; shin agôndo a na a va a taver kpaa, kpa nga a tahav mbu hemban je ga; shin er a te kume nahan kpaa, nga peren u ga.

²³ Kpa ior mban mba a ishima i num man i hendan; ve gba num ve yem kera.

²⁴ Ve kera kaa ken ishima ve kpaa er: Sé shi cia nen TER, Aôndo wase ga, u A nee ura u he kua u masetyô kpaa, sha shighe u u; ashighe a sundan kpaa A ver se a.

²⁵ Afer a en bunde ne akaa angan kera man asorabo a en kpaa yange ne iveren i dedoo.

²⁶ Gadia ken ior Av i zua a aferaior; mba meen er mbakôroninyon ka ve meen ve ngurum inya nahan; ve hôn to, ve kôr ior.

²⁷ Er keiji i i iv a inyon nahan, kape uya vev kpaa ve ngbough a icugh la; ka nahan ve gbe ikôr ve hingir mbanyarev kpaa ye.

²⁸ Ve wa ahôm, ve kôngor ayol, een, ve er kwaghbo je, kar ikaa inya; mba er ijir sha mimi ga, mba eren a ancôgholov sha mimi er i̱ kpe ve iyol kpaa ga; mbaibanave kpaa mba kuren ve ijir sha mi ga.

²⁹ Me kera tsaha akaa ne gaa? Kape TER A pin ne; uma Wam kpaa una kera or imbaikurior ne iyev gaa?

³⁰ Kwagh u kpilighyol u dang er ken tar ne:

³¹ uprofeti mba ôron kwagh sha aie, upristi kpaa mba eren tahav sha ityesen ve, ior Av kpaa doo ve er i lu nahan; tsô nea er nan sha mkuru?