Yeremia 49 - ICIGHAN BIBILO

¹ Sha kwagh u Mbaamon: TER ngu kaan nahan er: Iserael ngu a ônov je gaa? ngu a or u yan dyako na gaa? Ka nyi man Milkom a ye dyako u Gadi man ior nav kpaa ve tem ken agar a na?

² Nahan yô, nenge, ayange nga van, kape TER A kaa ne, a Me na á ungwa shishavaa u utya sha Raba u Mbaamon; una hingir atihialôgh, man agar a na a kiriki yô, á nande a sha usu; tsô Iserael una ya dyako u mbala mba ve ye un dyako la, kape TER A kaa ne.

³ Vaa, we Heshebon, gadia i tim Ai kera; ngor nen mliam ônkasev mba Raba, ta nen akondo uya, zungwe nen, yevese nen hurugh hurugh, her atô u ugar mba ishulev; gadia á yem a Milkom uikangen a upristi nav man atiator a na imôngo.

⁴ Ka sha ci u nyi man u te ihagh sha upev mba gbulumaa, pev wou u doon akaa laa? we wankwase u jighjigh ga ne, we u u suur sha inyaregh you, man u kaan wer: Ka an nana mough num a mo?

⁵ Nenge, Me haa u mciem iyol, kape TER A kaa ne, TER u akum a Sha, ú cia mba ve kase u la cii; á zenda ne, hanma or nana za sha ishigh ki nan jighilii, or u shi kohol mba ve yevese la nana̱ kera lu ga.

⁶ Kpa ken masetyô shi Me dugh Mbaamon ken uikangen kera, kape TER A kaa ne.

⁷ Sha kwagh u Edom: TER u akum a Sha ngu kaan nahan er: Kwaghfan kera ngu ken Teman je gaa? Mhen u mbakavenkwagh saa kera? Kwaghfan ve ndiiri?

⁸ Yevese nen, hide nen ijime, tema nen ken ajiir a zan, ne mba ne tem ken Dedan, gadia Me va a mtim u Isou sha a na, sha shighe u Me va tsaha un la.

⁹ Aluer mbasundan atam a wain vea va hen a we yô, vea kera shi ma kwagh her er á yar twar ga. Aluer mbaiv va tugh yô, vea vihi akaa kera, zan zan á kuma ve.

¹⁰ Gadia Mo M sar Isou, M bugh ajiir a na a yeren, una kera fatyô u yeren iyol na ga; i tim vor na kua anmgbianev nav man mbawanndor a na; un kera ngu ga.

¹¹ Undu ancôgholov ou, Me kura ve ve̱ lu uma; kasev mba côgholov ou kpaa, ve̱ suur sha a Mo.

¹² Gadia TER ngu kaan nahan er: Nenge, ve mba i ver ve u man iyongo ga la kpaa, vea ma kpee je, man hire we ve, ú kera zua a mtsaha ga yee? Ú war mtsaha ga, ú ma keng.

¹³ Gadia M bum iyol Yam, kape TER A kaa ne: Bosera una hingir kwagh u kpilighyol, kwagh u aheenegh, ijiir i gbilinigh man kwagh u ifan; agar a na cii aa hingir atse gbem sha won.

¹⁴ M ungwa loho due hen TER, man i tindi ortyom hen akuraior, er: Kohol nen, va ta nen num sha a na, wa nen ago iyol sha u nôngon ityav.

¹⁵ Gadia, nenge, M gema u, u hingir kwagh u kiriki ken akuraior, man kwagh u lahan hen ior.

¹⁶ Mcieryol wou u u cier iyol man ihagh i tan i ishima you la, tsugh u, we u u tem ken ikwe i avande, we u u lu a agee sha ityough ki igungu; shin er u we iya you sha ijiir i taven sha er gafa nahan kpaa, ka sha her je Me hungwa a we shin inya ye, kape TER A kaa ne.

¹⁷ Nahan Edom una hingir kwagh u kpilighyol; hanmaor cii u nana kar her a na yô, á kpiligh nan iyol, nana gbire iwer sha atsan a na cii.

¹⁸ Er mtim u Sodom man Gomora man agar a a wa ndor a ve la nahan, kape TER A kaa ne, ma or nana kera tema heregh ga, man shi ma wan u or nana za shir ker kpaa ga.

¹⁹ Nenge, nana kôndo er begha u a dugh hen gborikô u Yordan sha u za tan num sha ijiir i ilev mbi ye toho her gbem yô; gadia Me zenda ve heregh kera fese, man wen u i tsough un la, Me ver un sha i; gadia ka an nan lu er Mo? Man ka anti je nana verem iyange? Man ka an nan lu orkuranilev u nana tile sha ishigh Yagha?

²⁰ Yô, ungwa nen mhen u TER u A hen sha Edom; man awashima Na u a we sha ior i Teman; mimi je, ônov mba kiriki mba ikumuile, á kôr ve á kpela á yem a mi; mimi je, á cier ijiir ve i teman la iyol a ve.

²¹ Ihuran i mgbe ve la, na tar tenger; mliam hura ar hen zegemnger u Nyian.

²² Nenge, nana kôndo nana purugh er gafa nahan nana samber akper a nan sha Bosera; man sha iyange la ishima i anomaior a Edom ia hingir er ishima i kwase u toghol mar nahan.

²³ Kwagh u Damaseku. Hamati va ahenge kua Arpadi kpaa, gadia ve ungwa gwa u bo, iyol kpe ve; ishima i zungwen ngi er zegemnger nahan, fatyô u lun ving ga.

²⁴ Damaseku hingir seelee, a gema ijime u yevese, ikarikase gbidye un iyol; ican man ishima i zungwen tser un tsung, er ka kwase u toghol mar nahan.

²⁵ Nenge, er gar u icivirigh ne a kera lu a or ga yô! ka gar u iember la.

²⁶ Nahan yô, ikaior na ia gba sha igbenda na, man mbautyav cii á er ve, vea huan ving sha iyange la, kape TER u akum a Sha A kaa ne.

²⁷ Me keer usu sha gilgar u Damaseku, ua hia ayouator a Benhada.

²⁸ Kwagh u Kedar man ityartor i Hasor, i Nebukadinesar tor u Babilon hemba i la. TER ngu kaan nahan er: Mough, za nen hen Kedar, za tim ior mba ve lu vegher u sha ityoughkitaregh la.

²⁹ Á kura utenti vev man akumauile a ve; á kura akondo a ve a tenti, man ikav vev cii man urakumi vev, á yem a mi; á ngor imo, á kaa a ve er: mcieryol kase tser!

³⁰ Yevese yem nen ca, tema nen shin ajiir a zan, ne mba ne tem ken Hasor, kape TER A kaa ne; gadia Nebukadinesar tor u Babilon hen kwagh sha a ven, a wa kwaghbo ishima a ven.

³¹ Mough, kôndo nen hen ikurior i i tem bem bem a ishima i nyian ga la, kape TER A kaa ne, i i lu a ihinda man uishindan kpaa ga, man i tem tseke u i la.

³² Urakumi vev vea hingir ishar man akumauile a ve á kura a kera; Me sambe ve sha hanma ahumbe, ve mba ve hondo a-ase kera la; Me va ve a kwaghbo sha hanma vegher cii, kape TER A kaa ne.

³³ Hasor una hingir ijiir i teman i ugbaseela, ia lu ice gbem sha won, ma or nana kera tema ker ga, man shi ma wan u or nana za shir ker ga.

³⁴ Kwaghôron u TER u a va hen profeti Yeremia sha kwagh u Elam, sha hiihii u Sedekia hii teman tor ken Yuda la, A kaa er:

³⁵ TER akum a Sha ngu kaan nahan er: Nenge, Me sombo ada u Elam, ka agee ve a hemban je la.

³⁶ Me va a ahumbe a anyiin a a dugh sha azongo a anyiin a Sha sha Elam, Me sambe ve sha ahumbe la cii; mba i zende ve ken Elam la, ma ikurior i vea za ker ga yô, ia lu ga.

³⁷ Me er Elam una cia mbaihomov nav man mba ve keren uma na a ku; Me va a kwaghbo sha a ve, ka iyugh Yam i yeghen je la, kape TER A kaa ne; man shi Me na sanker una dondo ve ijime, zan zan Me tim ve kera;

³⁸ Me ver ikônough Yagh ki torough ken Elam, Me tim tor kua atiator ker kera, kape TER A kaa ne.

³⁹ Kpa sha ayange a masetyô yô, Me dugh Elam ken uikangen kera, kape TER A kaa ne.