Yeremia 48 - ICIGHAN BIBILO

¹ Sha kwagh u Moabi: TER u akum a Sha, Aôndo u Iserael, ngu kaan nahan er: Kwagh tser Nebo! Gadia i tim un kera; Kiriataim hingir kwagh u aheenegh, i ngohol un kpaa; iyouutya hingir kwagh u aheenegh, i yôhôl i kera;

² icivir i Moabi bee kera; ken Heshebon ve wa kwaghbo ishima a na, er: Va nen, sé tim un kera, a̱ de kera lu ikurior ga. We, Mademen kpaa, á gema u ú hingir ving, sanker una dondo u ijime.

³ Ungwa! vaa due ken Horonaim: mvihi man mtim u vesen!

⁴ I tim Moabi; mbayev nav mba kiriki ger mliam.

⁵ Sha ijiir i unden sha Luhiti la, mba haan mliam kôndon; man shin ijiir i hungwan sha Horonaim kpaa, i ungwa vaa u mliam ma mtim.

⁶ Yevese, war nen, lu nen er anihu u tsaasaa ken desereti nahan.

⁷ Gadia, er u suur sha ityom you kua sha inyaregh you, nahan we kpaa á hemba u; Kemoshi una za ken uikangen, a upristi nav man atiator a na imôngo.

⁸ Ortimin una va ta sha hanma gar, ma gar una war ga; pev kpaa una vihi kera, man á tim ijiir i i lu shambe shambe la kera, er TER A kaa nahan.

⁹ Na Moabi akper, a̱ purugh a̱ war; agar a na aa hingir atse, ma or nana tema keregh ga.

¹⁰ Ifan i̱ kôr or u nan er tom u TER asema ahar la, man ifan i̱ kôr or u nan nyum sanker u nan awambe yô.

¹¹ Moabi tema kpe un iyol, hii iyev na je, a tsa a akase a na her, ma or gema un haa ken ityegh kigenegh ga, man shi a za ken uikangen kpaa ga; ka sha ci u nahan man mnyohom nam ma undu un ga, man ihuma na kpaa i gem kposo ga ye.

¹² Nahan yô, nenge, ayange nga van, kape TER A kaa ne, Me tindi un a mbahaan, vea haa un, vea undu un ityev nav gbilin; shi vea hembe ityev vev kera.

¹³ Moabi una va ahenge sha ci u Kemoshi, er ya u Iserael lu va ahenge sha ci u Betel, u ve suur sha mi la nahan.

¹⁴ Ka nyi man ne kaan ner: Se mba mbaageev man anomaior a utya?

¹⁵ I tim Moabi kera, ve kôndo ve nyôr ken agar a na, man ikaior na i hemban cii la, sen sha u i̱ za wua ve, kape Tor A kaa ne, u i yer iti Na er TER u akum a Sha la.

¹⁶ Mtim u Moabi mgbôghom u van, man kwagh u bo ngu van fefa u va tseren un,

¹⁷ Ne mba ne kase un cii, zungwe nen un, kua ne cii mba ne fe iti na kpaa; kaa nen ner: Nenge, er i kever tôgh ku taver, gbough ku doon ashe la!

¹⁸ Hungwa sha iengem you la, we wankwase u u tem sha Dibon, tema hen inya i tseghe tseghe; gadia or u a tim Moabi la va ta num sha a we, a tim ayouautya ou a taver.

¹⁹ Tile hen kpegbenda, jinge, we u u tem hen Aroer la, pine or u yevese man kwase u yevese waren la, kaa wer: Ka nyi i ere?

²⁰ Kunya kôr Moabi, gadia i yôhôl un; ger nen mliam, gbire nen vaa, pase nen ken Arnon, er i tim Moabi kera yô.

²¹ Ijirôron va sha tar u shambe shambe, sha Holon man sha Yasa man sha Mefaati,

²² man sha Dibon man sha Nebo man sha Bete-dibela-taim,

²³ man sha Kiriataim man sha Bete-gamul man sha Bete-meon

²⁴ man sha Kerioti man sha Bosera, sha agar a ken tar u Moabi cii a lun ca man a lun ikua kpaa.

²⁵ I gber korough ku Moabi, uwegh nagh sombo, kape TER A kaa ne.

²⁶ Er un a̱ hunde, gadia tseen sha TER yum; Moabi una vingir sha isho na, una hingir kwagh u lahan kpaa.

²⁷ Shin yan Iserael lu u kwagh u lahan ga ase? I kohol un hen mbaiv, shin hanma shighe u ka wea teren un u jingir ityougho?

²⁸ Undu nen agar, za tema nen ken barwo, ne mba ne tem ken Moabi la; lu nen er atii u a we ya na hen kpe u ijem vegher u keela nahan.

²⁹ Se ungwa gwa u iyolmoron i Moabi—tseen tsung je— icivir na man ityough ki kehen nagh man imanger na, man iyolgengese na.

³⁰ TER kaa er: Mo M fa ishima na i vihin, ngi ma kwagh ga; ihagh na i kaan i er ma kwagh ga.

³¹ Nahan yô, me vaa Moabi, een, me vaa Moabi cii genger genger, me zungwe ior i Kir-hereshi.

³² Me vaa je á hemba mvaa u Yaser la, we kon u wain u Shibema; agbaa a ou samber per zegemnger je, za ar sha zegemnger u Yaser, ortiminakaa va ta num sha atam a ou a inyom, kua sha mtende u atam a ou a ikon i wain.

³³ Nahan i kar a msaanyol man iember ken sule u dedoo u uyia kua ken tar u Moabi kera; man shi M na zar u wain, u bee hen ahungwa a shoghol atam a wain; or nana kera shoghol a a ayôôso zwa ga; ayôôso shon aa hingir er ka ma ayôôso ga yô.

³⁴ Sha mliam ma Heshebon la, ve genger imo je zan zan za ar sha Eleale man sha Yahashi, man hii ken Soar zan zan ar sha Horonaim man Egelati-shelishiya kpaa; gadia mngerem ma Nimerim kpaa maa uma maa ta ikembegh.

³⁵ Man shi Me na er or u nan ne nagh ku sôngon sha ijiir i taven kua u nan nanden mbaaôndo mba nan la nagh, nana kera lu ken Moabi ga yô, kape TER A kaa ne.

³⁶ Nahan yô, ishima yam ngi jandegh imo er ka alaketa nahan sha ci u Moabi, man ishima yam ngi jandegh imo er alaketa nahan sha ci ior mba Kir-hereshi; gadia inyaregh ki a zough a mi la saa ishe.

³⁷ Hanma ityough i torough ki; hanma indyer i hondo i kera; ave cii i gber a avav, hanma or ta ikondo uya.

³⁸ Sha ityembe i sha ityoriyoughough i Moabi cii, man sha igbenda na hingir ukwelegh cii; gadia M hembe Moabi er ka ityegh ki ki kera lu or a inja ga yô, kape TER A kaa ne.

³⁹ Nenge, er i hembe un! Mba vaan! Nenge, er Moabi a gem ijime a kunya iyol! Kape Moabi una hingir mba ve kase un cii kwagh u ilyahan man kwagh u cieryol la.

⁴⁰ Gadia TER ngu kaan nahan er: Nenge, una purugh er gafa nahan, una samber akper sha u tan num sha Moabi.

⁴¹ I ngohol agar, i hembe ayouautya a taver; asema a mbaageev mba Moabi aa hingir er ishima i kwase u toghor mar nahan sha iyange shon la.

⁴² Á tim Moabi kera una kera lu ikurior ga, gadia tseen sha TER yum.

⁴³ Mciem, man ihungwa kua to vea bur u, we u u tem ken Moabi, kape TER A kaa ne.

⁴⁴ Or u nan yevese mciem nana gba shin ihungwa, man or u nan due shin ihungwa yô, nana gba ken to, gadia Me va un, ka Moabi la, a inyom i mtsaha ve la, kape TER A kaa ne.

⁴⁵ Mba ve yevese la ve tile shin mure u Heshebon a agee iyol shio; gadia usu due ken Hesebon, man nomborusu kpaa ken atô u Shihon, u hia a-ase a Moabi man ihaghtyo i mbaerenayôôso.

⁴⁶ Kwagh á tser u, we Moabi! Ior mba Kemoshi saa ishe, gadia i yem a ônov ou mba nomso uikangen man ônov ou mba kasev kpaa hingir uikangen.

⁴⁷ Nahan kpaa, Me dugh Moabi ken uikangen kera sha ayange a masetyô, kape TER A kaa ne. Ka mkur u ijir i i ôr Moabi je ne.