Yeremia 47 - ICIGHAN BIBILO

¹ Kwaghôron u TER ne va hen profeti Yeremia sha kwagh u Mbafiliti, er Farao lu a hembe Gasa ga la.

² TER ngu kaan nahan er: Nenge, mngerem ma moron shin imbusutarimese, maa hingir ifi u saren avenge, maa uve tar man kwagh u a lu ken u cii, gar kua mba ve tem ker cii; ior vea gbire ivaa man mba ve tem ken tar la cii, vea ger mliam.

³ Sha ci u acin a apande a anyinya na, man sha ayem a akekeautya a na, man sha mhor u akaver a a, uter kera gema ashe ijime ape ônov vev lu ga, sha ci u ave ve hingir livaa;

⁴ sha ci u iyange i i lu van sha u timin Mbafiliti cii, man sha u wuan hanma orwasen u nan shi ken Tiru man Shidon la kera; gadia TER Una tim Mbafiliti, ka asande a a shi her ken icile i Kafetor je la.

⁵ I tolough Gasa ityough kera; i tim Ashekelon kera, ka asande a a shi shin pev je la; shi nan je man né de u gberen avav iyolo?

⁶ we sanker u TER, shi nan je man ú meme? Shindi iyol you ken var wou, mem, huan ving.

⁷ Á er nan man una huan ving, er i lu TER je A kaa er a̱ er iyongo a Ashekelon man a kpe u zegemngere? Ka keela A ver un ye.