Yeremia 43 - ICIGHAN BIBILO

¹ Tsô zum u Yeremia kure u ôron kwagh a ior cii, sha akaaôron a TER, Aôndo ve, cii, a TER, Aôndo ve, A tindi un a mi her a ve yô, ka akaaôron angan cii,

² nahan Asaria wan u Hoshaia man Yohanan wan u Karea man ior mba kehen ityough cii, ve ôr kwagh, ve kaa a Yeremia er: Ka aie u eren ye; TER, Aôndo wase, tindi u sha u kaan er: De ze nen ken Igipiti sha u za teman shir ker ga, ze;

³ kpa ka Baruki wan u Neria a toron we ityô sha u nan se sha ikev i Mbakaldi ve̱ wua se, ve̱ yem a vese uikangen sha Babilon ye.

⁴ Kape Yohanan wan u Karea man mbahemenev mba mbautyav cii kua ior cii ve kera wa imo i TER iko sha u teman ken tar u Yuda ga la.

⁵ Kpa Yohanan wan u Karea man mbahemenev mba mbautyav cii, ve kura asande a Yuda a a shi her cii, a a due ken akuraior cii, a i zenda ve ve yem ker la, a hide a va tema ken tar u Yuda la;

⁶ nomso man kasev man mbayev man ônov mba tor mba kasev man hanma or u Nebusaradan orhemen u mbakurantor yan undu sha ikev i Gedalia wan u Ahikam wan u Shafan la, man profeti Yeremia kua Baruki wan u Neria,

⁷ ve yem ken tar u Igipiti; gadia ve wa imo i TER iko ga, ve yem zan zan ve za nyôr hen Tahapanheshi.

⁸ Nahan kwaghôron u TER va hen Yeremia ken Tahapanheshi er:

⁹ Tôô awen a tamen sha uwe, yer a shin inya i hôron ken tembe u u lu sha hunda u ya u Farao ken Tahapanheshi la, sha ashe a ior mba Yuda;

¹⁰ kaa a ve wer: TER u akum a Sha, Aôndo u Iserael, ngu kaan nahan er: Nenge, Me tindi, i̱ za kua a Nebukadinesar tor u Babilon, wanakiriki Wam, man Me ver ikônough nagh ki torough sha awen angan a M yer ne; una samber butu na u tor sha a.

¹¹ Una va, una va hemba tar u Igipiti; mba i ver ve ku la vea za ken ku, mba i ver ve ikangenev la, vea za ken uikangen je, man mba i ver ve sanker la, vea za sha sanker je.

¹² Me keer usu ken uya mba mbaaôndo mba Igipiti; una nande ve, una yem a ve uikangen; una cir tar u Igipiti iyol, er orkuranilev ka nan cir ikondo i nan nahan; una due keregh bem bem.

¹³ Shi una hembe mtôm ma awenem ma tempel u iyange, ma ma lu ken tar u Igipiti la; man una nande uya mba mbaaôndo mba Igipiti sha usu.