Yeremia 41 - ICIGHAN BIBILO

¹ Tsô sha uwer u sha utaankaruhar la, Ishemael wan u Netania, wan u Elishama, u ken tsombor u tor, man u ken mbatamen mba tor, man ior pue a na imôngo, ve va hen Gedalia wan u Ahikam hen Misepa; ve ya kwaghyan heregh imôngo, ken Misepa.

² Tsô Ishemael wan u Netania a ior mba puev mba ve lu a na imôngo la, ve mough sha, ve wua Gedalia wan u Ahikam wam u Shafan sha sanker; ve wua un, u tor u Babilon ver un gomna sha tar shon la.

³ Ishemael shi wua Mbayuda mba ve lu a na imôngo cii, mba ve lu a Gedalia hen Misepa la, man Mbakaldi mba ve lu her, ve lu mbautyav la.

⁴ Tsô sha iyange i sha uhar i ken ijime i a wua Gedalia la, ma or kpaa nan lu a fa ga la,

⁵ ior mbagenev, akunduanyiin due ken Shekem man ken Shilo kua ken Samaria, ve va, ve torough ander a ve kera, ve lu a akondo a anden iyol, man ve ese avav iyol, ve lu a iniav mbi sha samuyia man kwaghhumandoon sha u van a mi hen iyou i TER.

⁶ Nahan Ishemael wan u Netania due hen Misepa sha u za keghen ve gbenda, lu vaan zan; tsô, zum u a kohol ve yô, a kaa a ve er: Va nen hen Gedalia wan u Ahikam.

⁷ Tsô, zum u ve nyôr ken atô gar yô, Ishemael wan u Netania wua ve, haa ve shin ijôr, wen kua ior mba ve lu a na imôngo la.

⁸ Kpa ior vev mbagenev pue kaa a Ishemael er: De woo se ga, gadia se koso akaa ken myer ken toho, ka alakema man shair man mkurem man iyough. Nahan a de, a kera wua ve a anmgbianev vev imôngo ga.

⁹ Ijôr i Ishemael gbihi akom a ior mba a wua la cii shimi, a ikom i Gedalia imôngo, lu ijôr i vesen i tor Asa dugh sha ci u cian Baasha tor u Iserael la yô. Ishemael wan u Netania gema iv i sha mba a wua la.

¹⁰ Nahan Ishemael kura asande a ior a a shi hen Misepa la cii, yem a ve uikangen: ka ônkasev mba tor kua ior mba ve shi ken Misepa cii, mba Nebusaradan orhemen u mbakurantor wa Gedalia wan u Ahikam sha ikev la; Ishemael wan u Netania gema kura ve, yem a ve uikangen, nahan a mough a gba yemen hen Mbaamon.

¹¹ Kpa zum u Yohanan wan u Karea man mbahemenev mba mbautyav mba ve lu a na imôngo la cii, ve ungwa aun a kwaghbo u Ishemael wan u Netania a er la cii,

¹² nahan ve kura ior cii, sha u za nôngon ityav a Ishemael wan u Netania; ve za kohol un hen kpe u mngerem ma hen Gibeon la.

¹³ Tsô zum u ior mba ve lu a Ishemael cii ve nenge a Yohanan wan u Karea, man mbahemenev mba mbautyav mba ve lu a na imôngo cii la yô, ve gba ember.

¹⁴ Nahan ior cii mba Ishemael kura hen Misepa yem a mi uikangen la, ve hembe, ve yem ve za kohol Yohanan wan u Karea.

¹⁵ Kpa Ishemael wan u Netania war sha ikev i Yohanan a ior anigheni, a yem hen Mbaamon.

¹⁶ Nahan Yohanan wan u Karea man mbahemenev mba mbautyav mba ve lu a na imôngo la, ve kua a asande a ior cii, a Ishemael wan u Netania kôr hen Misepa yem a ve uikangen ken masejime u a wua Gedalia wan u Ahikam la; lu mbautyav man kasev man mbayev kua mbatomov mba ken ya u tor, a hide a ve hen Gibeon;

¹⁷ tsô ve mough ve za tema hen Geruti-kimham, u a lu ikua a Betelehem la, ve ver ishima u za nyôron ken Igipiti

¹⁸ sha ci u cian Mbakaldi; gadia ve lu cian ve, sha ci u Ishemael wan u Netania wua Gedalia wan u Ahikam, u tor u Babilon ver un gomna sha tar shon la yô.