Yeremia 40 - ICIGHAN BIBILO

¹ Kwaghôron ne due hen TER, va hen Yeremia, ken ijime i Nebusaradan, orhemen u mbakurantor, pase un tuhwa ken Rama la, zum u a tindi er i̱ za va a na, er a lu a ahye ave, a mbauikangenev mba Yerusalem kua Yuda cii imôngo, mba i lu yemen a ve uikangen sha Babilon la.

² Orhemen u mbakurantor la kua a Yeremia, man a kaa a na er: Ka TER, Aôndo wou je, a ter kwaghbo ne sha ijiir ne ye;

³ TER kpaa va mi, man A er er A vande teren la nahan vough; gadia ne er TER isholibo, ne wa imo Na iko ga, ka nahan man kwaghbo ne a tser ne ye.

⁴ Hegen yô, nenge, dughun yam we ahye sha ave kera nyian ne. Aluer a doo u u zan a mo imôngo sha Babilon yô, va, me ver ishima sha a we dedoo; kpa aluer wea nenge a doo u u zan a mo imôngo sha Babilon ga kpaa, de kera tsô; nenge, tar cii ngu sha ishigh you, henpe u nenge i doo u, man i lu u pe zan cii yô, gba zan her tsô.

⁵ Tsô er a lu a hide ga la, a kaa a na er: Nahan kpaa, hide, za hen Gedalia wan u Ahikam, wan u Shafan, u tor u Babilon a ver un gomna sha agar a Yuda la, tema a na, a ior imôngo; shin za henpe u nenge i lu u pe zan yô. Nahan orhemen u mbakurantor la na un inyaregh ki kwaghyan man iwua; tsô a na un gbenda.

⁶ Nahan Yeremia yem hen Gedalia wan u Ahikam, hen Misepa, a za tema a na a ior imôngo mba ve shi ken tar la yô.

⁷ Tsô zum u mbahemenev mba akumautya mba ve lu ken akôngo la, ve kua ior vev, ve ungwa aun er tor u Babilon ver Gedalia wan u Ahikam, gomna sha tar la, man a wa un nomso man kasev man mbayev man atsanaior a hen tar la, a i yem a ve uikangen ken Babilon ga la, sha ikev,

⁸ nahan ve va hen Gedalia hen Misepa, lu Ishemael wan u Netania man Yohanan kua Yonatan ônov mba Karea, man Seraia wan u Tanhumeti man ônov mba Efai Ornetofa, man Yesania wan u Ormaakati, ve a ior vev.

⁹ Gedalia wan u Ahikam wan u Shafan bum a ve man ior vev, kaa er: De cie nen u eren Mbakaldi tom ga; tema nen ken tar man er nen tor u Babilon tom, tsô á kpe ne iyol.

¹⁰ Kpa mo yô, nenge me tema hen Misepa sha u tilen sha ishigh ki Mbakaldi, mba vea va her a vese yô; kpa ne yô, kohol nen zar u wain, man atam a ikon sha wangernyom, man mkurem, koso nen ken atum a en, man tema nen ken agar a en a ne ngohol a yô.

¹¹ Er Mbayuda mba ve lu ken Moabi cii man ken Mbaamon man ken Edom kua mba ve lu ken ityar la cii, ve ungwa aun er tor u Babilon undu asande ken Yuda, je, a ver Gedalia wan u Ahikam, wan u Shafan gomna sha a ve;

¹² nahan Mbayuda cii za hide ken ajiir a i zenda ve, ve yem ker la, ve va hen tar u Yuda, ve za hen Gedalia hen Misepa; nahan ve kohol zar u wain man atam a ikon a sha wangernyom kpen kpen.

¹³ Tsô Yohanan wan u Karea man mbahemenev mba akumautya mba yan ve lu ken tangeutya la cii, ve va hen Gedalia hen Misepa,

¹⁴ ve kaa a na er: U shi fa er Baali tor u Mbaamon a tindi Ishemael wan u Netania er a̱ va wua u kpa? Kpa Gedalia wan u Ahikam na ve jighjigh ga.

¹⁵ Nahan Yohanan wan u Karea ôr kwagh a Gedalia hen Misepa ken myer je, er: Shi de, m̱ za wua Ishemael wan u Netania, ma or kpaa nana fa ga; ka sha ci u nyi man una gba wuan we, man Mbayuda mba ve kohol her a we cii vea sambe, man asande a Yuda a a shi her la, vea saa ishe nahana?

¹⁶ Kpa Gedalia wan u Ahikam kaa a Yohanan wan u Karea er: De eren kwagh ne ga; gadia u ngu wan Ishemael aie iyol.