Yeremia 4 - ICIGHAN BIBILO

¹ Aluer wea hide yô, we Iserael, kape TER A kaa ne, ka her a Mo ú hide ye; aluer wea dugh akaa a hôngorough a ou sha ishigh Yagh kera yô, nahan kera gba u, ú zende wue wue ga.

² Tsô u bum wer: Er TER A lu u uma yô, sha mimi man sha ijirôron i mimi kua sha perapera; nahan akuraior aa ver ayol a a doo doo ken a Na, shi ka ken a Na aa ta ihagh kpaa ye.

³ Gadia TER ngu kaan a ior mba Yuda kua mba Yerusalem nahan er: Vuul tsa wen, de lee nen ken usagher ga.

⁴ Tsôngo nen ayol a en sha ci u TER, kar nen a apusu a asema a en kera, ne ior mba Yuda kua mba ve tem ken Yerusalem, sha er iyugh Yam i̱ de yeghen er usu nahan, i̱ hia zan zan ma or u pirin nana lu ga ze, sha ci u ifer i aeren a en la.

⁵ Pase nen ken Yuda, man yôô nen ken Yerusalem kaa nen ner: Tôngo ikpamkor ken tar; genger imo, kaa nen ner: Kohol nen, sé nyôr nen ken agar a lun a ugir.

⁶ Tim tuta u̱ ver ishigh ken Shion; yevese nen, ker nen ijiir i waren, de til nen ga; gadia Me va a kwaghbo, una due ken imbusutarimese, ka kwagh u vihin u vesen je.

⁷ Begha due ken ikô na, man ortimin u akuraior, mough, a due hen ijiir na, sha u una gema tar wou u̱ hingir toho dang yô; á tim agar a ou kera, or á kera tema ker ga.

⁸ Sha ci u nahan yô, ta nen ibashôhô uya, gber nen kwelegh, vaa nen, gadia ishima i vihin i tsung i TER la, ngi a gema sha u undun se ga.

⁹ Tsô, sha iyange la je, kape TER A kaa ne, á lan tor ishima, á lan mbatarev asema kpaa; á kpiligh upristi iyol, uprofeti kpaa á kondo ve iyol.

¹⁰ Tsô m kaa mer: Kpe ahii! Ter AÔNDO mimi je U tsugh nongo ne kua Yerusalem tsung je, er U kaa Wer: Nea zua a bem; man sanker gema ngu benden sha uma je.

¹¹ Hen shighe la á kaa ior ne kua Yerusalem er: Ahumbe a tseen a a dugh sha agungu a penem penem ken taaikôngo, nga karen yemen hen wankwase u ior av, kpa ka sha u peer ga, shin sha u wanger kpaa ga;

¹² ahumbe a taver a hemban nga van sha ci Wam; hegen yô, Mo Me ôr ve ijir.

¹³ Nenge, ngu van er ka abeen yô, akekeautya na kpaa nga er hiar nahan; anyinya na wa kpaver hemba ugafa. Kpe ahii, se ne! mba timin se kera!

¹⁴ Ôô iferkwagh ken ishima you kera, we Yerusalem, sha u u̱ war. Ka hanma shighe je man mhen wou u sha ifer u a tem a we ne, una kuree?

¹⁵ Ungwa, imo due ken Dan je, ngi yôôn kwagh, ngi pasen kwaghbo sha agungu a Eferaim.

¹⁶ Ôr nen akuraior kwagh ne! Nenge, yôô nen Yerusalem ner: Mbakasentyav mba van ken tar u caa, mba genger imo sha agar a Yuda;

¹⁷ er mbakuransule nahan, kape ve kase un ve tser la, sha ci u a hendan kwagh a Mo yô, kape TER A kaa ne.

¹⁸ Gbenda wou kua aeren a ou la, va u a akaa ne; ka ifer you ne; mimi je, kwagh ne yuwa, een, nyôr ken ishima je.

¹⁹ Myam ama, myam ama! Nyoon mo ken ishima je, ishima yam ngi tan mo kwe; m kera fatyô u teman ving ga, gayô, m ngu ungwan mkaa u ikpamkor, ikenge i utya je!

²⁰ Mba yôôn mhembe u utya hanma ijiir sha adondo adondo, i vihi tar cii kera; i vihi utenti av kera fese je, kua akondo am a yisan kpaa, ngôôr je ga.

²¹ Shi nan je man me de u nengen a tuta, man me de u ungwan imo i ikpamkoroo?

²² Gadia ior Av lan kwagh, ve fam ga; ka ônov mba lanen kwagh, mba a mkav ga; ve fa u eren iferkwagh, kpa u eren kwagh u dedoo yô, ve fa ga.

²³ M nenge tar, man nenge, u lu dang man gbilin; m nenge Usha kpaa, iwanger ve lu ga.

²⁴ M nenge iwo, man nenge, i tenger, agungu cii kpaa kpegher.

²⁵ M nenge, ma or lu ga, inyon i sha cii kpa, i purugh i yem kera.

²⁶ M nenge sule u doon iyiagh hingir taaikôngo, agar a u cii, i yôhôl a kera sha ishigh ki TER, sha ishigh ki iyugh Na i tsung la.

²⁷ Gadia TER ngu kaan nahan er: Á vihi tar cii kera ua hingir atse; nahan kpaa Me kera tim u Me bee ga.

²⁸ Ka sha ci u kwagh ne, tar ua zungwe, Sha kpaa una hingir il, gadia M ôr kwagh ne man M ver ishima sha mi, Me kera vaa afanyô ga, Me gema ishima Yam sha mi kpaa ga.

²⁹ Hanma gar cii yevese sha ci u iov i mbaanyinyav kua mbakerenavaan; ve nyôr ikô, man ve unde sha avande; i undu hanma gar, ma or môm kera tema ker ga.

³⁰ We u i sar u kera ne, ka nyi u eren ne, er u haa akondo a murufu man u wuha iyol sha ikav mbi zenaria, man u wa tojir sha ashe ou; gbilin je u eren iyol you hwe ye; mbadoon we ishima laha u kera, ve gema mba keren uma wou.

³¹ Gadia m ungwa mliam er ka kwase u nan toghor mar yô, ican er i kwase u nan mar wan u nan u iunda la nahan, mliam ma wankwase u Shion; ngu shirin ishima, naregh ave, kaan er: Kwagh tserem ve! Uma wam vôr sha ishigh ki mbawuanior.