Yeremia 34 - ICIGHAN BIBILO

¹ Kwaghôron ne due hen TER va hen Yeremia, zum u Nebukadinesar tor u Babilon, man akumautya na cii, man ityartor i sha won cii i i lu sha ikev na la, man ior cii, ve lu nôngon ityav a Yerusalem man a agar a na cii la, er:

² TER, Aôndo u Iserael, ngu kaan nahan er: Za, za ôr kwagh A Sedekia tor u Yuda, kaa a na wer: TER ngu kaan nahan er: Nenge, Me na gar ne sha ikev i tor u Babilon, una nande un sha usu;

³ we kpaa ú war sha ikev na ga, kpa á kôr u keng, á na u sha ikev na; ashe ou aa nenge ashe a tor u Babilon, zwa na ua ôr kwagh a zwa wou je, man yemen you ken Babilon.

⁴ Nahan kpaa ungwa imo i TER, we Sedekia tor u Yuda; TER ngu kaan sha a we nahan er:

⁵ Ú kpe ku u ishôm ga; ú kpe ku u anange; er i nanden kwagh sha ci u uter ou nahan, ka utor mba tsuaa mba ve vande lun a we la, kape á nande kwagh sha ci wou kpaa la; vea zungwe u, vea kaa er: Aye, tere! Gadia Mo M vande ôron kwagh ne, kape TER A kaa ne.

⁶ Tsô profeti Yeremia ôr akaa angan cii a Sedekia tor u Yuda ken Yerusalem,

⁷ zum u ikumutya i tor u Babilon lu nôngon ityav a Yerusalem, man a agar a Yuda cii a a shi la, ka Lakishi man Aseka je la; gadia ka angan tseegh a mase shin agar a Yuda a a lu agarautya ye.

⁸ Kwaghôron ne due hen TER va hen Yeremia, ken masetyô u tor Sedekia ya ikur a ior mba ken Yerusalem cii la, sha u yôôn er i̱ pase ikpan i̱ tuhwa;

⁹ sha er hanma or nana̱ pase kpan u nan u nomso man kpan u nan u kwase u nan lu Orheberu shin kwase u Heberu; ma or nana̱ de kera gem anngô u nan Oryuda a̱ hingir kpan u nan ga;

¹⁰ nahan atiator cii kua ior cii mba ve nyer ken ikuryan la, rumun er hanma or nana̱ pase kpan u nomso man kpan u nan u kwase, ve̱ de kera lu ikpan ve ga; ve rumun je, ve pase ve ve tuhwa;

¹¹ kpa ken masetyô yô, ve gema, shi ve hide a ikpan i nomso man i ukase, i ve pase ve tuhwa la ve gema i, shi i̱ hingir ikpan i nomso man i ukase her.

¹² Nahan yô, kwaghôron u TER due hen TER va hen Yeremia, kaa er:

¹³ TER, Aôndo u Iserael, ngu kaan nahan er: Mo M ya ikur a uter enev sha iyange i M due a ve ken tar u Igipiti, ken ya u ikpan la, M kaa Mer:

¹⁴ Er anyom ataankarahar a kar kera yô, hanmô wen nana̱ pase anngô u nan u nan lu Orheberu, u nan tee u iyol i nan u yam la, man nan er u u tom anyom ataratar; pase nan tuhwa, na nan gbenda; kpa uter enev lumun imo Yam ga, ato tsô kpaa ve ver her ga.

¹⁵ Kpa ne yô, ne gema, ne er kwagh u a lu vough sha ashe Am, er ne yee i pase ikpan i toho yô, hanma or a or u wan ndor a nan; shi ne ya ikur sha ishigh Yagh ken iyou i i yer i sha iti Yam;

¹⁶ kpa ne gema shi ne hôngor a iti Yam, sha er hanmô wen shi nan hidi a kpan u nan u nomso man kpan u nan u kwase, u lu ne pase ne tuhwa sha ishima ve la; ne gema ve, hingir ne ikpan i nomso man i ukase.

¹⁷ Nahan yô, TER ngu kaan nahan er: Mayange ne ver ato her a Mo ne yôô ner, i̱ pase ikpan i̱ tuhwa ga, hanma or a anngô u nan, man hanma or a or wan ndor a nan; nenge, M ngu yôôn Mer, i̱ pase ne i̱ tuhwa, hingir nen sha ikev i sanker man i bouange kua i ijen, kape TER A kaa ne; Me gema ne né hingir ityartor i sha won cii kwagh u tumbul a min ave.

¹⁸ Me na ior mba ve per atindi a Am, mba ve er sha akaaôron a ikuryan i ve ya sha ishigh Yagh ne ga la, vea hingir er wanbua u ve pav un avegher ahar ve kar her atô u avegher a na la nahan;

¹⁹ atiator a Yuda, man atiator a Yerusalem, mbatomov mba ken ya u tor, man upristi, man ior i hen tar la cii, mba ve kar her atô u avegher a wanbua la,

²⁰ Me na ve sha ikev i mbaihomov vev, man sha ikev i mba ve keren uma ve la; akom a ve kpaa aa hingir kwaghyan u inyon i sha man inyamtoho i shin tar.

²¹ Sedekia tor u Yuda kua atiator a na, Me na ve sha ikev i mbaihomov vev, man sha ikev i mba ve keren uma ve la, man sha ikev i mbautyav mba tor u Babilon, mba ve mough her a ven kera la.

²² Nenge, TER ngu kaan nahan er: Me kaa imo, Me hide a ve hen gar ne; vea nôngo ityav a na, vea ngohol un kpaa, vea nande un sha usu; Me gema agar a Yuda aa hingir atse, or á kera lu ker ga.