Yeremia 31 - ICIGHAN BIBILO

¹ Hen shighe la, kape TER A kaa ne, Me hingir Aôndo u icombor i Iserael cii, ve di vea gema á hingir ior Av.

² TER ngu kaan nahan er: Ior mba ve wer sanker, ve zua a mhôônom ma zungwen ken desereti; ka Iserael je la, er a lu yemen sha u za memen yô.

³ TER ande her a mo ken ica je, kaa er: Een, u doom ishima sha dooshima u tsôron je, ka sha ci u nahan M udugh we sha erdoo ye.

⁴ Me shi Me maa u, tsô ú lu her, we iniunkwase u Iserael; á shi á er u hwe sha anigingav ou, tsô ú due, ú za vine amar a mba ve numbu sar sar la.

⁵ Ú shi ú môôr ikon i wain sha iwo i Samaria; mbamôôr vea môôr man shi vea ya atam a i kpaa.

⁶ Gadia iyange ia va, i mbakuran mba sha iwo i Eferaim vea genger imo vea kaa er: Mough nen, sé kôndo nen sha Shion hen TER, Aôndo wase.

⁷ Gadia TER ngu kaan nahan er: Wa nen icam, ember nen Yakob, ember nen ikurior i i lu ityough ki akuraior yô; yôô nen, wuese nen, kaa nen ner: TER yima ior Nav, ka asande a Iserael a a shi her je la.

⁸ Nenge, Me va a ve shin tar u Imbusutarimese, Me kohol ve sha akighir a tar, mbaapirashe man mbakeer man kwase a iyav kua kwase u toghol mar, vea lu a ve imôngo; ka ikumior i vesen ia hide heen ye.

⁹ Vea va a mliam ashe je, man ka sha mzamber Me hide a ve ye. Me va a ve hen ukungômbamngerev, sha gbenda u nôô, henpe vea ta nguhar kera ga yô; gadia Mo M ngu Iserael ter je, man Eferaim ka wan Wam.

¹⁰ Ungwa nen imo i TER, ne akuraior, pase nen i hen ityar i hen kpe u zegemnger i ken ica la; kaa nen ner: Wen u A sambe Iserael la, Una kohol un, una kura un er orkuranilev ka nan kura ikumuile nahan.

¹¹ Gadia TER paa Yakob, A yima un sha ikev i or u nan hembe un agee yô.

¹² Vea va man vea wa atsam sha igungu u Shion, vea sen gudu gudu hen mdoom ma TER, hen alakema man zar u wain, man hen mkurem, man hen agum a iyôngo man a ibua; uma ve una hingir er sule u i urun u mngerem yô, vea kera shi lu gbuu mayange je ga.

¹³ Hen shighe la iniunkwase ia ember ia vinen amar, kua ikaior man mbatamen imôngo kpaa; gadia Me gema ijungwen ve ia hingir iember, Me sur ve ishima man Me na vea ember er ishimavihin ve i bee yô.

¹⁴ Me na uma u upristi una mgbough a ahôm, man ior Av kpaa vea ide sha mdoom Am, kape TER A kaa ne.

¹⁵ TER ngu kaan nahan er: Ungwa! Imo ken Rama, kwelegh man mliam ma vaan tsung; Rahel ngu vaan ônov nav; a venda ishima i surun sha ci u ônov nav, gadia kera mba ga.

¹⁶ TER ngu kaan nahan er: Yange imo you mliam, man ashe ou kpaa a̱ de kera hee mliam ga, gadia á na u injar sha tom wou, kape TER A kaa ne; man vea due ken tar u mbaihomov vev vea hide.

¹⁷ Ishimaverenkeghen ngi ken mlu wou u masetyô, ka ape TER A kaa ne; ônov ou vea hide hen tar ve.

¹⁸ Mimi je, M ungwa Eferaim lu toghor iyol, kaan er: U tsaham, er gumbua u a lu a hool a igbur ga yô, kape i tsaham la; gemam, tsô me gema; gadia ka We U lu TER, Aôndo wam, ye.

¹⁹ Ken masejime u m gema la, m vaa afanyô; man ken masejime u i kôôm mo la, m gbidye uwegh sha nam, m va ahenge, een, zan zan kundam iyol, gadia m tôô iheen i iyev av je.

²⁰ Eferaim ka wan u ishima ishima udoon mo ishima kpen kpen gaa? Gadia hanma shighe u ka Mea teren un sha ishimavihin yô, M gba umbur un di sha gbashima je, nahan yô, a sar ishima Yam tsung, mimi je, Me zungwe un mhôônom, kape TER A kaa ne.

²¹ Tim akav a ou a tesen gbenda, man shi er mtôm ma tesen gbenda; ver ishima sha kômgbenda, ka gbenda u ngise u za sha u la; shi hide, we iniunkwase i Iserael, shi hide hen agar a ou ne.

²² Shi nan je man ú de u tan akpelan, we wankwase u u undu mimi wou ne? Gadia TER gba kwagh ugen u he shin tar: kwase nana kura nomsoor!

²³ TER u akum a Sha, Aôndo u Iserael, ngu kaan nahan er: Shi vea ôron kwagh ne ken tar u Yuda man ken agar a na, zum u Me gema mlu ve la er: TER A̱ ver u doo doo, we ya u perapera, we icighanwo.

²⁴ Yuda man agar a na cii, vea tema kimi imôngo; mbashirensule kua mbazenden sôôso ikumuile.

²⁵ M na uma u orvôron kundu un iyol, man hanma or u ishima i yen nan kpaa M taver nan ishima.

²⁶ Tsô m nder m kende ashe sha, mnyam am yô, doom tsô.

²⁷ Nenge, ayange nga van, kape TER A kaa ne, a Me ta vor u or man vor u zendenya ken ya u Iserael kua ya u Yuda.

²⁸ Tsô, er lu M ver ishima sha a ve u wuhen man u yôhôl man u karen a mi sha, man u timin man u vihin ve kera la, kape Me gema Me ver ishima sha u maan man u môôr ve la, kape TER A kaa ne.

²⁹ Sha ayange la vea kera kaa er: Uter ya atam a ikon i wain a angen, nahan anyi a mbayev vev dura, ga.

³⁰ Kpa hanma or nana kpe sha ci u ifer i nan; man hanma or u nan ye atam a ikon i wain a angen yô, ka nan anyi á dura nan ye.

³¹ Nenge, ayange nga van, kape TER A kaa ne, a Me ya ikuryan i he a ya u Iserael kua ya u Yuda;

³² kpa ia kera lu sha inja i ikuryan i M ya a uter vev ayange a M kôr ve uwegh sha u duen a ve ken tar u Igipiti la ga—ikuryan Yam i ve vihi la, shin er M lu ter ve je nahan kpaa, kape TER A kaa ne.

³³ Kpa ikuryan i Me ya a ya u Iserael er ayange ne á kar kera yô, ka i ne, kape TER A kaa ne: Me ver atindi Am ken atô ve je man shi Me nger a ken asema a ve kpaa; nahan Me lu Aôndo ve, ve di kpaa vea lu ior Av.

³⁴ Nahan hanmô ve nana kera tese or u wan ndor a nan, shin anmgbian u nan er: Fa TER ga; gadia ve cii vea fam, á hii sha u kiriki ve zan zan ar sha u vesen, kape TER A kaa ne; gadia Me de ve ifer ve, asorabo a ve kpaa Me kera seer u umbur a ga.

³⁵ TER u A ne iwanger sha ci u iwanger i atetan, man mzende u uwer man asan sha ci u iwanger i utu, Un u A kpianger zegemnger, je agôndo a na kpaa a te kume; TER u akum a Sha, ka iti Na je la, ngu kaan nahan er:

³⁶ Aluer aeren a sha atindi atindi angan aa kar sha ishigh Yagh kera yô, kape TER A kaa ne, nahan vor u Iserael kpaa ua kera lu ikurior sha ishigh Yagh sha won ga.

³⁷ TER ngu kaan nahan er: Aluer á fatyô u karen mtav u Sha, man á fatyô u timen fan amagh a taregh yô, nahan Mo kpaa Me ta vor u Iserael kera cii, sha ci u akaa a ve er la cii, kape TER A kaa ne.

³⁸ Nenge, ayange nga van kape TER A kaa ne, a á maa TER gar la, á hii sha gôgôyou u taven u Hananel je á za ar hen Hundagar u Zongo.

³⁹ Kor u karen kwagh a mi ua kar ua yem jighilii sha igungu u Garebi, ua ningir ua yem hen Goa.

⁴⁰ Pev u akom cii man u mtwe man akôngo la cii zan zan á ar hen uwagh u Kideron, hen iniuugh ki Hundagar u Nyinya vegher u sha ityoughkitaregh la, vea hingir TER icighankwagh; á kera wuhe ve man á kera yôhôl ve sha won kpaa ga.