Yeremia 30 - ICIGHAN BIBILO

¹ Kwaghôron ne due hen TER va hen Yeremia, er:

² TER, Aôndo u Iserael, ngu kaan nahan er: Nger akaaôron a M er a we cii ken takerada.

³ Gadia, nenge, ayange nga van, kape TER A kaa ne, a Me gema mlu u ior Av Iserael man Yuda, kape TER A kaa ne, Me hide a ve hen tar u lu M na uter vev yô, vea ngohol u, ua hingir sha ikev ve kpaa.

⁴ Angan ka akaaôron a TER ôr sha Iserael kua sha Yuda.

⁵ Gadia TER ngu kaan nahan er: Se ungwa imo i ikarikase, ka i mcie, ka i bem ga.

⁶ Shi pine nen ase, nenge, nomsoor maren kpa? Hii nan man M nenge hanma or nan suur ave shin iwenge, er kwase ka nana toghol mar man ishiv cii mbi gema mbi hingir peng nahana?

⁷ Wuu! Gadia iyange shon gba ikôr je gande agen cii; ka shighe u ican i Yakob je la; kpa á yima un sha i.

⁸ Tsô sha iyange shon la, kape TER u akum a Sha A kaa ne, Me sombo igbur na sha mon ve, Me tôndo ikangenev vev, ior i tar ugen ia kera gema ve er vea er ve tom ga,

⁹ kpa vea er TER, Aôndo ve, tom, kua tor ve Davidi u Me ver ve la.

¹⁰ Nahan yô, de cie ga, we Yakob wanakiriki Wam, kape TER A kaa ne, man ishima i̱ de nyian we ga, we Iserael; gadia, nenge, Me yima u ken ica je man vor wou kpaa ken tar u u lu uikangen ker la; Yakob una hide, ishima ia yôhôl un, una mem kpaa; ma or nana kera ta un mciem iyol ga.

¹¹ Gadia M ngu a we je, kape TER A kaa ne, sha u yiman we; gadia Me tim akuraior cii, a M sambe u ken a la; kpa we yô, Me tim u cii ga, kpa me tsaha u akuma akuma, Me gba den we nahan tsô ga.

¹² Gadia TER ngu kaan nahan er: Iyolvihin you, i vihi kpen kpen, man avav a ou kpaa ka a nyoon tsung je.

¹³ Ma or u tan ken a we nan ngu ga; man icimbiv mbi been angev ou kpaa, mbi sha ci wou ga.

¹⁴ Mba ve soo u cii, u hungul ve, mba pinen we ga; gadia M gber u ivav sha inja i orihom, m tsaha u ornyoonshima je, sha ci u ifer you vese, asorabo a ou kpaa ngee.

¹⁵ Ka nyi man u vaa sha ci u mvihi u i vihi u iyol, er mnyoonom ou ma been ga nahana? Sha ci u ifer you vese, asorabo a ou kpaa ngee ngun ve M er u akaa ne nahan ye.

¹⁶ Nahan yô, mba ve ye u cii, á ya ve; mbaahendanev ou ci ca cii vea za ken uikangen; mba ve ngohol we akaa sha apera cii, ve di kpaa á ngohol di a ve sha apera; mba ve gem u u hingir ve ishar i yan cii, Me gema di ve, vea hingir kwagh u yan ishar sha mi.

¹⁷ Gadia Me hide u a mkpeyol, Me bee u avav je, kape TER A kaa ne, sha ci u ve yer u er: or u i te un kera yô, ka Shion je u ma or nan kera pin un ga yô.

¹⁸ TER ngu kaan nahan er: Nenge, Me gema mlu u utenti mba Yakob, uya nav vea kôrom mhôônom, á maa gar na sha ice na, man iyou i tor kpaa sha ijiir i i la vough je.

¹⁹ Tsô á ungwa imo i iwuese ken a ve kua imo i mba ve lu sar sar yô; man shi Me seer ve vea ngee, vea kera ndahar ga; Me shi Me kende ve sha, vea kera lu kwagh u ikoogh ga ze.

²⁰ Ônov vev kpaa vea hingir er ngise nahan, mkohol ve kpaa una hingir igbekeke sha ishigh Yagh, man Me tsaha mba ve kighir ve a ican cii.

²¹ Ortaregh ve á lu or u ken a ve ayol a ve, man or u nan tem tor ken a ve kpaa nana due ken a ve, Me kporom a nan, nana mgbôghom a Mo; gadia ka an je nana cihi nana kporom her a Mo? Kape TER A kaa ne.

²² Nea lu ior Av, Mo kpaa Me lu Aôndo wen.

²³ Nenge, zegeahumbe u TER, ka iyugh, i dugh ye, ka hiar je; ka sha ityough ki mbaaferev je a va te ye.

²⁴ Ishima i vihin i TER ia hide ga, saa Una kure man Una er awashima Na; sha ayange a masetyô yô, né va kav inja i kwagh ne.