Yeremia 3 - ICIGHAN BIBILO

¹ A kaa er: Aluer or nan pav a kwase u nan, man a due her a nan a za hingir u orgen, nahan shi nana hide hen kwase laa? Nahan tar la ua kera hôngor tsung je gaa? Man we yô, u er idya a ior kpishi mba u doo ve la, nahan kpaa u ngu fan wer, ú shi ú hide her a Moo? Kape TER A kaa ne.

² Kende ashe ou sha, nenge agungu a penem penem! Ka hanma ijiir man i de yaven a wee? Sha igbenda kpaa, u tema sha u keghen ve, er Orarabia ken taaikôngo nahan; u hôngor tar sha udya ou man dang wou.

³ Ka nahan man i nyume iura, man ura u masetyô kpaa u kera nôô ga ye; nahan kpaa u lu a icul i idyakwase, u rumun u van ahenge ga.

⁴ Kera ka hegen tsô u hii u yilan Mo, wer: Tereme! U ngu Ijende yam i sha iyev av, gaa?

⁵ Una zer yuwen zan zan gbemee? Ishima ia nyoon Un zan zan mkur jee? Nenge, kape u ôr la, kpa u er aferakaa, sha ishima you je.

⁶ Man shi TER kaa a mo sha ayange a tor Yoshia la er: U nenge kwagh u Iserael u a undu mimi na la a er kpa? A unde sha hanma gôgôwo man a nyôr shin hanma tinekon i lun a mure, a er idya heregh.

⁷ Ken masetyô u a bee aeren a akaa angan cii yô, M kaa Mer: hide her a Mo, kpa a hide ga; anngô na u kwase, Yuda u jighjigh ga la kpaa, nenge je.

⁸ Tsô, m nenge, zum u M pav a Iserael u a undu mimi na la sha ci u ityôikaa i idya na la, man M na un takerada u paven ivôson, nahan kpaa, anngô na u kwase, Yuda, u jighjigh ga la, cia ga, kpa un je kpaa a za a za er idya.

⁹ Tsô sha idya na i dang de dang la, tar hôngor, een, a er idya a awen man a ikon.

¹⁰ Nahan kpaa, anngô na u kwase Yuda, u a lu a jighjigh ga la, hide her a Mo, kpa ka sha ishima i môm ga, ka sha igyer tsô, kape TER A kaa ne.

¹¹ Tsô TER kaa a mo er: Iserael u a undu mimi na la, tese er perapera na hemba u Yuda, u a lu u jighjigh ga la.

¹² Za, za yôô akaaôron ne vegher u hen imbusutarimese, kaa wer: Hide, we Iserael u u undu mimi wou la, kape TER A kaa ne; Me kera kenger we a iyugh ga, gadia Mo M ngu u zungwen mhôônom je, kape TER A kaa ne; ishima ia vihim zan zan gbem ga.

¹³ Kpa rumun iferkwagh you er u er TER, Aôndo wou, kwaghbo, man u kaha u ze hen mbaaôndo mbagenev, shin hanma itinekon i lun a mure; man imo Yam kpaa ne kera wa iko sha mi ga, kape TER A kaa ne.

¹⁴ Hide nen, ne ônov mba ne undu mimi wen la, kape TER A kaa ne; gadia Mo M ngu ter wen, nahan Me tôô ne u môm ken gar, uhar ken kwe môm, Me va a ven hen Shion.

¹⁵ Me na ne mbakuran mba sha ishima Yam, mba vea kura ne sha kwaghfan kua mkav yô.

¹⁶ Tsô, zum u né seer a seer, né ngee hen tar ne yô, sha ayange la, kape TER A kaa ne, á kera ôr kwagh er: Areki u ikuryan u TER ga; una kera nyôr ken ishima ga, man shi á kera umbur un ga, á kera ker un ga, man á kera kimbir u eren un kpaa ga.

¹⁷ Hen shighe la, á yila Yerusalem er, ikônough ki torough ki TER; man akuraior aa va kohol her, sha ci u iti i TER ken Yerusalem; mayange vea kera seer u zenden sha mcighir u ishima ve i bo ga.

¹⁸ Sha ayange la, ya u Yuda una zua a ya u Iserael, vea due imôngo ken Imbusutarimese la, vea va nyôr ken tar u M na uter enev dyako yô.

¹⁹ Mo M kaa Mer: Me wa u ken uôn, man Me na u tar u doon, dyako u hemban doon cii u akuraior! Shi M kaa Mer: Wea yilam wer: Terem; man wea kaha ú undum kpaa ga.

²⁰ Kpa, er kwase ka nan undu mimi u nan a nom u nan yô, kape ne kpaa ne undu mimi wen a Mo la, we ya u Iserael, kape TER A kaa ne.

²¹ Ungwa, ikenge sha agungu a penem penem, mliam man zamber u ônov mba Iserael, sha ci u ve kaha gbenda dang, TER, Aôndo ve, hungul ve.

²² Hide nen, ne ônov mba ne undu mimi la, Mo Me wanger m-undu u mimi wen la. Nenge, se mban, se mba van her a We; gadia ka We u lu TER, Aôndo wase ye.

²³ Mimi je, agungu la ka gbilin tsô, ayôôso a sha iwo la; mimi je, ka ken TER, Aôndo wase, myom u Iserael a lu ye.

²⁴ Kpa kwagh u kunya la, ya akaa a uter asev zua a mi sha tom ve la, hii sha iyev asev je, akum a uile kua a abua a ve, ônov vev mba nomso kua mba kasev kpaa.

²⁵ Sé yav nen ken kunya wase, ahenge ase a van a̱ cir se, gadia se er TER, Aôndo wase, kwaghbo, se kua uter asev, hii sha iyev asev je zan zan nyian; man se wa imo i TER, Aôndo wase, iko ga.