Yeremia 28 - ICIGHAN BIBILO

¹ Tsô sha inyom la, sha mhii u mtemtor u Sedekia tor u Yuda, inyom i sha unyiin, man uwer u sha utaan la yô, profeti Hanania wan u Asur, Orgibeon ôr kwagh a mo ken iyou i TER sha ishigh ki upristi kua ior cii, a kaa er:

² TER u akum a Sha, Aôndo u Iserael, ngu kaan nahan er: M vihi igbur i tor u Babilon kera.

³ Er anyom ahar a lu a kuma ga yô, Me shi Me hide a ikav mbi iyou i TER cii ken ijiir ne, mbi Nebukadinesar tor u Babilon iyange kura hen ijiir ne yem a mi sha Babilon la;

⁴ shi Me hide a Yekonia wan u Yehoyakim tor u Yuda hen ijiir ne, kua mbauikangenev mba Yuda cii, mba ve yem sha Babilon la, kape TER A kaa ne, gadia Me vihi igbur i tor u Babilon la kera.

⁵ Nahan profeti Yeremia gba ôron kwagh a profeti Hanania sha ishigh ki upristi man sha ishigh ki ior cii mba ve tile ken iyou i TER la,

⁶ profeti Yeremia gema kaa er: Amen, TER ma A er nahan; TER ma A er sha akaaôron a ou a u tsengeôron ne cii, sha u hiden a ikav mbi iyou i TER man mbauikangenev cii ken Babilon hen ijiir ne.

⁷ Nahan kpaa, ungwa ase kwaghôron ne u me ôr sha ato ou kua sha ato a ior cii ne:

⁸ Uprofeti mba ve vande lun a mo kua a we kpaa ngise la ve ôr kwaghôron u profeti sha ityar kpishi man sha uzegembaityartor, sha kwagh u utya man sha kwaghbo man sha bouange kpaa.

⁹ Profeti u a pase er bem una lu la, zum u kwaghôron u profeti la una va kure sha mi vough yô, nahan sha shighe la á fa er profeti la, a lu profeti u TER A tindi un mimi je yô.

¹⁰ Nahan profeti Hanania kôr igbur i sha mon u profeti Yeremia la, vihi kera.

¹¹ Tsô Hanania ôr kwagh sha ishigh ki ior cii kaa er: TER ngu kaan nahan er: Kape Me vihi igbur i Nebukadinesar tor u Babilon er anyom ahar aa lu a kuma ga yô, sha mon u akuraior cii kera. Nahan profeti Yeremia kôr gbenda yem a nagh.

¹² Tsô kwaghôron u TER va hen Yeremia, ken masetyô u profeti Hanania vihi igbur i sha mon u profeti Yeremia la kera, kaa er:

¹³ Za, za kaa Hanania, wer: TER ngu kaan nahan er: U vihi agbur a ikon kera, kpa u gema u er agbur a iyôô sha ityough ki angara.

¹⁴ Gadia TER u akum a Sha, Aôndo u Iserael ngu kaan nahan er: M har igbur i iyôô sha mon u akuraior ne cii, sha u a̱ er Nebukadinesar tor u Babilon tom; vea lu sha ikev na; M shi M na un inyamtoho kpaa.

¹⁵ Nahan profeti Yeremia kaa a profeti Hanania er: Ungwa ase, Hanania, TER tindi u ga, kpa we u na ior mban ve suur sha aie;

¹⁶ nahan yô, TER ngu kaan nahan er: Nenge, Me zenda u sha tar kera; ú kpe ken inyom ne je, sha ci u u tese wer, i̱ hendan kwagh a TER yô.

¹⁷ Tsô profeti Hanania maa kpe sha inyom shon la je, sha uwer u sha utaankaruhar la.