Yeremia 24 - ICIGHAN BIBILO

¹ TER tesem, yô, nenge, akese ahar a atam a tur lu sha ishigh ki tempel u TER; lu ken masejime u Nebukadinesar tor u Babilon yem a Yekonia wan u Yehoyakim, tor u Yuda, uikangen, kua atiator a Yuda, man mbaeren tomaveegh kua mbavareniwa kpaa, a due a ve ken Yerusalem kera, a va a ve sha Babilon la.

² Ikese i môm lu a atam a tur a dedoo je, er ka atam a tur a ka a vande vian nahan; man ikese igen la yô, lu a atam a tur a vihin tsung je, vihi je gande u yan a.

³ Tsô TER kaa a mo er: Ka nyi u nenge a mi Yeremia? M kaa mer: Atam a tur; a doon la, a doo kpishi; man shi a bo la gema vihi tsung, vihi je gande u yan a.

⁴ Nahan kwaghôron u TER va her a mo, er:

⁵ TER, Aôndo u Iserael, ngu kaan nahan er: Er atam a tur a dedoo a lu nahan, kape Me wa Mbayuda mba i yem a ve uikangen la iko, mba M tindi ve, ve mough hen ijiir ne, ve yem ken tar u Mbakaldi la, sha u eren a ve dedoo.

⁶ Gadia Me ver ashe Am sha a ve sha u eren a ve dedoo, shi Me hide a ve hen tar ne; Me maa ve, Me yôhôl ve ga; Me môôr ve, Me wuhe ve ga.

⁷ Me na ve ishima sha u vea fa er Mo M lu TER yô; vea hingir ior Av je, Mo kpaa Me lu Aôndo ve, gadia vea hide her a Mo a ishima i môm.

⁸ Man er atam a tur, a a vihi gande u yan a la, a lu nahan— mimi je TER ngu kaan nahan er: Kape Me er a Sedekia tor u Yuda, man atiator a na man asande a Yerusalem mba ve shi ken tar la, man mba ve tem ken tar u Igipiti;

⁹ Me gema ve vea hingir ityartor i sha won cii kwagh u tumbul a min ave, man u timin kera, sha u eren ve kwagh u bo; vea hingir kwagh u iheenegh man u ôron injakwagh a mi, man ilyahan man kwagh u lun a ifan iyol ken ajiir a Me zenda ve vea yem ker la cii.

¹⁰ Me tindi ve a sanker man ijen kua bouange, zan zan á tim ve ken tar u M na ve kua uter vev la, kera.